បន្ទាយមានជ័យៈ ក្នុងមួយថ្ងៃៗ សត្វស្លាបជាច្រើនប្រភេទនៅខេត្តបន្ទាយមានជ័យ កំពុងតែរងការបបាញ់ ពីសំណាក់ព្រានយកមកដាក់តាំងលក់តាមផ្លូវជាតិចំនួន២ខ្សែរ ក្នុងស្រុកព្រះនេត្រព្រះ និងក្រុងប៉ោយប៉ែត។
សត្វស្លាបដែលត្រូវបានព្រានប្រមាញ់ លក់អោយឈ្មួញតាមហាង និង អាជីវករលក់ដូរតាមផ្លូវភាគច្រើនជាសត្វ សត្វច្រិច សត្វលលក សត្វមាន់ទឹក សត្វកុក សត្វដុំដោ ហើយពេលខ្លះទៀតប្រជាពលរដ្ឋនិយាយថា អាចមានដល់គ្រាល ដែលជាសត្វត្រូវបានអភិរក្សនៅស្រុកភ្នំស្រុកក៏មានដាក់លក់នៅលើទីផ្សារផងដែរ ។
សត្វស្លាបទាំងនេះត្រូវបាន ព្រានប្រមាញ់ ដោយវាយលុប ដាក់អន្ទាក់ ដាក់ថ្នាំបំពុល ជាដើម ។ ហើយយកមកលក់អោយតាមហាងធំៗ ក្នុងទីរួមខេត្តបន្ទាយមានជ័យ និងក្រុងប៉ោយប៉ែត និងមួយចំនួនធំ គឺត្រូវបានព្យួរលក់ដោយសេរី តាមចញ្ចើមផ្លូវត្រង់ចំណុចព្រំប្រទល់ក្រុងប៉ោយប៉ែត និងស្រុកអូរជ្រៅ ដោយឡែកមួយកន្លែងទៀតនៅចំណុចក្បាលស្ពានតាប៉ុនព្រំប្រទល់ ខេត្តបន្ទាយមានជ័យនិងសៀមរាប ដែលទីតាំងនេះមានការចម្អិនហើយស្រេច ។
អ្នកលក់សត្វស្លាបម្នាក់បាននិយាយថា សត្វដែលគាត់ដាក់តាំងទាំងនេះ គឺបានទិញមកពីព្រានដោយការវាយលុប ហើយក្នុងមួយថ្ងៃ ៗ ខ្លួនទិញពី២០ទៅ៣០ ក្បាល និងបានដាក់លក់ដោយចងជាចង្កោម និងលក់រាយហើយតម្លៃគឺទៅតាមប្រភេទនៃសត្វ ។
ជាមួយគ្នានឹងការបបាញ់សត្វស្លាប ប្រជាពលរដ្ឋនៅឃុំរហាត់ទឹក ស្រុកមង្គលបូរីបានអោយដឹងថា មិនថាថ្ងៃ ឬយប់ ក្នុងមូលដ្ឋានរហាត់ទឹកដែលសម្បូរទៅដោយវាលស្រែ និងព្រៃ និងមានសត្វស្លាបជាច្រើនផងនោះត្រូវបាន គេបបាញ់ វាយលុប បានសត្វស្លាបមួយថ្ងៃៗ រាប់រយក្បាល ។ទាក់ទងនឹងការប្រមាញ់សត្វស្លាប និងការដាក់លក់ដោយសេរីនេះ ពុំដែលឃើញមានជំនាញ់រដ្ឋបាលព្រៃឈើ ឬសមត្ថកិច្ចពាក់ព័ន្ធនៃខេត្តបន្ទាយមានជ័យ ចាត់វិធានការក្នុងការទប់ស្កាត់ឡើយ ៕
