ខេត្តសៀមរាប៖ បង្ក្រាបរោងសិប្បកម្មកែច្នៃធំៗចំនួន៣កន្លែងនៅកណ្តាលក្រុងសៀមរាបដែលមានលាក់ស្តុកឈើគ្រញ៉ូងនិងឈើប្រណិតជាច្រើនរយម៉ែត្រគីបត្រូវបានសមត្ថកិច្ចចំរុះធ្វើការបង្ក្រាប។ដឹកនាំដោយលោក សំរិទ្ធ សុខុន ព្រះរាជអាជ្ញារងខេត្តសៀមរាប។
ប្រត្តិការបង្ក្រាបនេះធ្វើឡើងកាលពីព្រឹកថ្ងៃទី១៨ខែកញ្ញាឆ្នាំ២០១៥ស្ថិតនៅចំណុចភូមិតាវៀន សង្កាត់សាលាកំរើក ក្រិងនិងខេត្តសៀមរាប។
សមត្ថកិច្ចនៅកន្លែងកើតហេតុបានឲ្យដឹងថា ម្ចាស់ទីតាំងរោងសិប្បកម្មទាំង៣កន្លែងខាងលើទី១ឈ្មោះគឹមចន្ថា ហៅកាចូវភេទស្រីអាយុ៤៨ឆ្នាំជនជាតិវៀតណាមទី២ឈ្មោះចាន់សាវិនភេទស្រីអាយុ៤៧ឆ្នាំមានប្តីជាជនជាតិវៀតណាម និងទី៣ឈ្មោះហេងសោ ភណ្ឌ័ភេទប្រុសអាយុ៤២ឆ្នាំជនជាតិខ្មែរ បំរើការជាមន្ត្រីអង្គការ ស៊ីម៉ាក់។
មន្ត្រីរដ្ឋបាលព្រៃឈើបានឲ្យដឹងថាឈើគ្រញ៉ូងនិងឈើប្រណិតព្រមទាំងរបស់កែឆ្នៃមិនទាន់សំរេចត្រូវបានរឹបអូសយកទាំងអស់ប៉ុន្តែពេលនេះនៅមិនទាន់ដឹងចំនួនឈើនៅឡើយ ព្រោះកំពុងធ្វើការវាស់វែងនិងថ្លឹងចំនួនឈើគ្រញ៉ូងមិនទាន់ចប់នៅឡើយ។
លោកម៉ុង ប៊ុនលីម នាយផ្នែករដ្ឋបាលព្រៃឈើបន្ទាយស្រីបានឲ្យដឹងថាម្ចាស់រោងសិប្បកម្មកែច្នៃទាំង៣កន្លែងបានរត់គេចខ្លួនអស់។ចំណែកឈើគ្រញ៉ូងនិងឈើប្រណិតនៅមិនទាន់ដឹងចំនួនប៉ុន្មាននៅឡើយហើយឈើដែលបង្ក្រាបបានទាំងអស់យកទៅរក្សាទុកនៅថ្នាលបណ្តុះកូនឈើផ្នែកបន្ទាយស្រីព្រះដាក់ដើម្បីធ្វើការវាស់វែងអនុវត្តទៅតាមច្បាប់ព្រៃឈើ៕
ខេង ឧត្តម
