សៀមរាប៖មន្ត្រីជលផលខេត្តសៀមរាបសម្រេចបាញ់កាំភ្លើងពីគ្រាប់ដើម្បីការពារខ្លួនខណៈក្រុមអ្នកនេសាទល្មើសច្បាប់ប្រមាណជា៥០ទូកបានហ៊ុំព័ន្ធ ពេលចុះបង្ក្រាបបទល្មើសនេសាទនៅលើផ្ទៃបឹងទន្លេសាបឃុំកំពង់ឃ្លាំង។
លោក ព្រិន្ទ សាវិន នាយខ័ណ្ឌរដ្ឋបាលជលផលខេត្តសៀមរាបបានឲ្យដឹងនៅល្ងាចថ្ងៃទី១៩ខែកញ្ញានេះថា មន្ត្រីជំនាញជលផលរបស់លោកបានសម្រេចបាញ់កំភ្លើងពីគ្រាប់ដើម្បីការពារខ្លួន ពេលក្រុមអ្នកនេសាទល្មើស ច្បាប់ប្រមាណជា៥០ទៅ៧០ទូកបានហ៊ុំព័ន្ធក្នុងគោលបំណងវាយតបតជាមួយនិងសមត្ថកិច្ចនៅពេលដែលមន្ត្រីជំនាញបានប្រើប្រាស់វិធានការក្តៅក្នុងការបង្ក្រាបក្រុមអ្នកនេសាទប្រើប្រាស់ឧបករណ៍នេសាទខុសច្បាប់គឺអួនក្រឡាញឹករួមផ្សំអំពូលភ្លើងស្ថិតនៅកន្លែងអភិរក្សជលផលតាមោក ឃុំកំពង់ឃ្លាំង ស្រុកសូទ្រនិគម ខេត្តសៀមរាប។
ហើយករណីនេះបានកើតឡើងកាលពីម៉ោង៨យប់ថ្ងៃទី១៨ខែកញ្ញាឆ្នាំ២០១៥នេះខណៈទូកអ្នកនេសាទល្មើស ច្បាប់បានប៉ះទង្គិចគ្នាជាមួយទូករបស់សមត្ថកិច្ច។
លោកបានបញ្ជាក់ថា ការសម្រេចចិត្តបាញ់កាំភ្លើងនេះការពារខ្លួន រងចាំកំម្លាងជំនួយទៅជួយរំដោះតែប៉ុនណ្ណោះ លោកថា បើសិនគ្មានកំម្លាងជំនួយទៅជួយរំដោះទាន់ពេលនោះមន្ត្រីជំនាញរបស់លោកអាចនិងមានគ្រោះថ្នាក់ ពីព្រោះក្រុមអ្នកនេសាទល្មើសច្បាប់ប្រមាណជា៥០ទៅ៧០ទូកបានហ៊ុំព័ន្ធមន្ត្រីជំនាញអស់ហើយ។
សូមបញ្ជាក់ថា នៅក្នុងប្រតិបត្តិការបង្ក្រាបបទល្មើសនេសាទនេះសមត្ថកិច្ចជំនាញដងហូតបានកាណូតម៉ាស៊ីន(កាវ)១គ្រឿង អួនក្រឡាញឹកចំនួន២វង់ អាគុយ១គ្រឿង បង្គោល៨ដើម និងខ្សែចំនួន១៥០ម៉ែត្រ៕
ខេង ឧត្តម
