កំពង់ឆ្នាំង៖ បុរសម្នាក់និងរថយន្តម៉ាកហ្វតរេញជើមួយគ្រឿង ត្រូវបានសមត្ថកិច្ចនគរបាលចរាចរណ៍ខេត្តកំពង់ឆ្នាំង ស្ទាក់ចាប់បាននៅមុខមណ្ឌលកុមារកំព្រាក្នុងក្រុងកំពង់ឆ្នាំង ក្រោយពីរថយន្តនេះបានបុកអ្នកថ្មើរជើងម្នាក់អោយស្លាប់ភ្លាមៗនៅនឹងកន្លែងកើតហេតុ ហើយបានខិតខំបើកគេចខ្លួនចេញពីការទទួលខុសត្រូវ មានចម្ងាយ១៧គីឡូម៉ែត្រទើបស្ទាក់ចាប់បាន។ករណីនេះបានកើតឡើងនៅវេលាម៉ោង៧និង១៥នាទីយប់ថ្ងៃទី២០ ខែកញ្ញា ឆ្នាំ២០១៥នៅចំណុចគីឡូម៉ែត្រលេខ១០៧និង១០៨ ស្ថិតក្នុងភូមិស្រងាំទេ ឃុំប្រស្នឹប ស្រុករលាប្ងៀរ ខេត្តកំពង់ឆ្នាំង ចំណែបុរសជាម្ចាស់រថយន្តត្រូសមត្ថកិច្ចឃាត់ខ្លួនទុកបញ្ជួនទៅតុលាការខេត្ត។
តាមរបាយការណ៍សមត្ថកិច្ចនគរបាលចរាចរណ៍ខេត្តបានអោយដឹងថា៖ បុរសរងគ្រោះឈ្មោះ ញឹក ស្រុន អាយុ៥៦ឆ្នាំ រស់នៅភូមិស្រះកែវ ឃុំមេលំ ស្រុកបរិបូណ៌។ចំណែកបុរសជាអ្នកបើករថយន្តបង្កម៉ាកហ្វតរេញជើ ពណ៌ស ពាក់ផ្លាកលេខ ភ្នំពេញ2AF-9917 មានឈ្មោះ សាន ពិសិដ្ឋ អាយុ៣០ឆ្នាំ,និងម្នាក់ទៀតដែលរួមដំណើរជាមួយឈ្មោះ ឈឿន ម៉ាលីន អាយុ២២ឆ្នាំ ពួកគេរស់នៅក្រុងភ្នំពេញ។
មុនពេលកើតហេតុ បុរសរងគ្រោះកំពុងតែដើរតាមចិញ្ចើមថ្នល់តែម្នាក់ឯងក្នុងទិសដៅពីជើងទៅត្បូង លុះមកដល់ចំណុចកើតហេតុរថយន្តបង្កម៉ាកហ្វតរេញជើមួយគ្រឿងបើកក្នុងទិសដៅស្របគ្នាជាមួយជនរងគ្រោះ បានបុកគាត់ចំពីក្រោយពេញទំហឹង បណ្តាលអោយជនរងគ្រោះបោកក្បាលនិងថ្នល់ស្លាប់ភ្លាមៗនៅនឹងកន្លែងកើតហេតុតែម្តង។
ក្រោយពេលបង្កគ្រោះថ្នាក់ អ្នកបើកបររថយន្តបង្កបានព្យាយាមបើកគេចខ្លួនពីកន្លែងកើតហេតុនិងពីការទទួលខុសត្រូវ មកដល់ចំណុចមុខមណ្ឌលកុមារកំព្រាក្នុងក្រុងកំពង់ឆ្នាំង ទើបសមត្ថកិច្ចនគរបាលចរាចរណ៍ខេត្តស្ទាក់ចាប់បានទាំងរថយន្ត និងអ្នកបើកបរ ហើយបានឃាត់ខ្លួន និងរថយន្តទុកនៅការិយាល័យនគរបាលចរាចរណ៍ផ្លូវគោកខេត្ត។
អ្នកបើកបររថយន្តបង្កបាននិយាយអោយដឹងថា៖ មុនពេលបុកជនរងគ្រោះ គឺរូបគេមិនបានឃើញមានមនុស្សកំពុងតែដើរខាងមុខនោះទេទាល់តែបុករួចទើបដឹង ព្រោះតែមេឃងងឹត និងជនរងគ្រោះគ្មានកាន់ភ្លើងបំភ្លឺទេទើបគេមើលមិនឃើញ។
សមត្ថកិច្ចអោយដឹងថា៖ករណីនេះសមត្ថកិច្ចកំពុងកសាងសំណុំរឿងតាមនីតិវិធី បញ្ជូនជនបង្កទៅកាន់តុលាការខេត្ត។ ចំណែកសពបុរសរងគ្រោះ សមត្ថកិច្ចបានប្រគល់ជូនក្រុមគ្រួសារយកទៅធ្វើបុណ្យទានតាមប្រពៃណី ក្រោយពេលសមត្ថកិច្ចបានពិនិត្យវាស់វែងនិងគូសប្លង់នៅចំណុចកើតហេតុរួចរាល់៕
