សៀមរាប៖ វគ្គបណ្តុះបណ្តាលស្តីពីទេសចរណ៍ក្នុងតំបន់បេតិកភណ្ឌពិភពលោក ក្រោមប្រធានបទ បញ្ហាប្រឈម និងទស្សនវិស័យ ត្រូវបានរៀបចំឡើងរយៈពេល៥ថ្ងៃ ចាប់ពីថ្ងៃទី២១ ដល់២៥ ខែកញ្ញាឆ្នាំ២០១៥ នៅសាលសន្និសីទអង្គរនៃអាជ្ញាធរជាតិអប្សរា។
លោកស្រីសាស្ត្រាចារ្យ Maria GRAVARI-BARBAS ប្រធានមជ្ឈមណ្ឌលស្រាវជ្រាវ និងសិក្សាជាន់ខ្ពស់ផ្នែកទេសចរណ៍ នៃសាកលវិទ្យាល័យ Sorbbone នៃប្រទេសបារាំង គឺជាគ្រូឧទ្ទេសក្នុងវគ្គបណ្តុះបណ្តាលនេះ។
សិក្ខាកាមក្នុងវគ្គបណ្តុះបណ្តាលនេះមានចំនួនជាង១០០នាក់ ដែលជាមន្ត្រីបុគ្គលិករបស់អាជ្ញាធរជាតិអប្សរា អាជ្ញាធរជាតិព្រះវិហារ ក្រសួងទេសចរណ៍ ក្រសួងវប្បធម៌ និងវិចិត្រសិល្បៈ ក្រសួងបរិស្ថាន នគរបាលការពារបេតិកភណ្ឌ នគរបាលទេសចរណ៍ សមាគមមគ្គុទ្ទេសក៍ទេសចរណ៍ចំនួន៨ក្នុងខេត្តសៀមរាប និងសាកលវិទ្យាល័យធំៗចំនួន៣ក្នុងខេត្តសៀមរាប។
ប្រធានបទសំខាន់ៗក្នុងវគ្គបណ្តុះបណ្តាលនេះមានដូចជា ការលើកឡើងនូវទស្សនៈ បញ្ហាប្រឈម និងដំណោះស្រាយពាក់ព័ន្ធនឹងទេសចរណ៍វប្បធម៌ ការរៀបចំផែនការទេសចរណ៍ និងការគ្រប់គ្រងលំហូរទេសចរណ៍ក្នុងតំបន់រមណីយដ្ឋានបេតិកភណ្ឌពិភពលោក។
ក្នុងពិធីបើកវគ្គព្រឹកមិញនេះ ឯកឧត្តម ស៊ុំ ម៉ាប់ អគ្គនាយកអាជ្ញាធរជាតិអប្សរាបានលើកឡើងនូវការកត់សម្គាល់ របស់គណៈកម្មាធិកបេតិកភណ្ឌពិភពលោក ក្នុងកិច្ចប្រជុំលើកទី៣៤ ដែលពាក់ព័ន្ធនឹងការរីកចម្រើនខ្លាំង ផ្នែកភ្ញៀវទេសចរក្នុងតំបន់បេតិកភណ្ឌពិភពលោក។ តាមកំណត់សម្គាល់របស់គណៈកម្មាធិការនេះ កំណើនទេសចរអាចចេញជាពីរផ្លូវគឺ បើគ្រប់គ្រងបានល្អនឹងនាំមកនូវផលប្រយោជន៍ដល់បេតិកភណ្ឌ ការផ្លាស់ប្តូរវប្បធម៌សកល។ ផ្ទុយទៅវិញ បើគ្រប់គ្រងមិនបានត្រឹមត្រូវទេ កំណើនទេសចរនេះនឹងនាំឲ្យមានផលប៉ះពាល់ខ្លាំងដល់សម្បត្តិបេតិកភណ្ឌពិភពលោក។
ឯកឧត្តមគូសបញ្ជាក់ថា កត្តានេះហើយ ដែលអាជ្ញាធរជាតិអប្សរាយកចិត្តទុកដាក់ដល់ធនធានមនុស្សជាសំខាន់ ដោយរៀបចំវគ្គបណ្តុះបណ្តាល មន្ត្រី បុគ្គលិក គ្រប់លំដាប់ថ្នាក់ ធ្វើយ៉ាងណាឲ្យការគ្រប់គ្រងទេសចរណ៍ក្នុងរមណីយដ្ឋានអង្គរ ធានាបាននូវប្រសិទ្ធភាព និងចីរភាព៕
ខេងឧត្តម
