សៀមរាប៖ នារសៀលថ្ងៃទី២១ ខែកញ្ញានេះ កម្មសិក្សាការីសាលាភូមិន្ទរដ្ឋបាល ឆ្នាំ២០១៥ មន្ត្រីជាន់ខ្ពស់ និងមធ្យមចំនួន២២០នាក់ បានមកបំពេញទស្សកិច្ចសិក្សានៅមជ្ឈមណ្ឌលអាជ្ញាធរជាតិអប្សរា។ គោលបំណងសំខាន់នៃទស្សនកិច្ចសិក្សានេះ គឺដើម្បីស្វែងយល់អំពីតួនាទីភារកិច្ច
និងបេសកកម្មចម្បងៗរបស់អាជ្ញាធរជាតិអប្សរា ក្នុងការងារអភិរក្សរមណីយដ្ឋានអង្គរ។
ឯកឧត្តម ស៊ុំ ម៉ាប់ អគ្គនាយកអាជ្ញាធរជាតិអប្សរា អមដោយមន្ត្រី ថ្នាក់ដឹកនាំជាច្រើនរូបបានទទួលស្វាគមន៍ដំណើរទស្សនកិច្ចនេះយ៉ាងកក់ក្តៅ។ ជាមួយគ្នានឹងកិច្ចស្វាគមន៍នេះ ឯកឧត្តមអអគ្គនាយកក៏បានលើកឡើងអំពីបេសកកម្មរបស់អាជ្ញាធរជាតិអប្សរា ដែលកំពុងបំពេញការងារអភិរក្ស និងអភិវឌ្ឍន៍ប្រកបដោយចីរភាពរមណីយដ្ឋានអង្គរ។
ដើម្បីកាន់តែជ្រាបច្បាស់អំពីការងារសំខាន់ៗ របស់អាជ្ញាធរជាតិអប្សរាដល់ក្រុមកម្មសិក្សាការីនោះ អាជ្ញាធរជាតិអប្សរាក៏បានធ្វើបទបង្ហាញដោយផ្តោតសំខាន់ទៅលើ រចនាសម្ព័ន្ធ តួនាទី ភារកិច្ច និងបេសកកម្មចម្បងៗ ផែនការគ្រប់គ្រងទេសចរណ៍ក្នុងរមណីយដ្ឋានអង្គរ ការងារអភិរក្ស ជួសជុល និងកិច្ចសហការជាមួយដៃគូអន្តរជាតិ។
ក្នុងន័យនេះ បទបង្ហាញបានសង្កត់ធ្ងន់ទៅលលើការងារអភិរក្ស ដែលធ្វើយ៉ាងណារក្សាឲ្យបាននូវតម្លៃលេចធ្លោជាសកល និងភាពដើមនៃរមណីយដ្ឋានអង្គរ និងការប្រឹងប្រែងផ្សព្វផ្សាយបន្ថែមទៀត ទៅកាន់សាធារណជនគ្រប់ស្រទាប់ឲ្យបានជ្រួតជ្រាប និងចូលរួមលើកតម្លៃបេតិកភណ្ឌដូនតា៕
ខេង ឧត្តម
