ព្រះវិហារ៖ដើម្បីសម្រួលដល់សុវត្ថិភាពការធ្វើដំណើរអោយល្អប្រសើរទ្បើងវិញជូនភ្ញៀវទេសចរជាតិនិងអន្តរជាតិរួមទាំងប្រជាពលរដ្ឋក្នុងមូលដ្ឋានជុំវិញតំបន់ប្រាសាទព្រះវិហារនៅចំណុចខូចខាតផ្លូវបេតុងទ្បើងទៅរមណីយដ្ឋានប្រាសាទព្រះវិហារគឺនៅព្រឹកថ្ងៃទី២២កញ្ញា២០១៥នេះខាង
នាយកដ្ឋាននគរបាលការពារបេតិកភណ្ឌនិងកងវិស្វកម្មស្ពានថ្នល់សម្តេចតេជោបានស្ថាបនាជួលជុលល្អស្អាតរួចរាល់អស់ហើយ។
ភ្នាក់ងាររាយការណ៍អោយដឹងនៅព្រឹកថ្ងៃទី២២កញ្ញាថាដើម្បីសម្រួលដល់ការធ្វើដំណើរទៅមករបស់ភ្ញៀវទេសចរអោយទទួលបានសុខសុវត្ថិភាពល្អនោះខាងអង្គភាពនាយដ្ឋាននគរបាលការពារបេតិកភណ្ឌនៃក្រសួងមហាផ្ទៃសហការជាមួយកងវិស្វកម្មសម្តេចតេជោបានធ្វើការស្ថាបនាជួលជុលផ្លូវបេតុងទ្បើងវិញដែលរងការខូចខាតបាក់ប្រេះស្រុត១ផ្នែកធំដោយសារទឹកភ្លៀងហូរច្រោះខ្លាំងកាលពីយប់ថ្ងៃទី១៥កញ្ញា២០១៥។
ប្រភពព័ត៌មានដដែលបញ្ជាក់ថាលោកឧត្តមសេនីយ៍ទោថាប់សារិទ្ធអនុប្រធាននាយកដ្ឋាននគរបាលការពារបេតិកភណ្ឌប្រចាំការរមណីយដ្ឋានប្រវត្តិសាស្ដ្រប្រាសាទព្រះវិហារបានដឹកនាំកំលាំងនគរបាលក្រោមឱវាទរបស់ខ្លួនជាង២០នាក់ចុះទៅធ្វើការជួសជុលស្ថាបនាផ្លូវបេតុងដែលខូចខាតខាងលើរួចរាល់អស់ហើយប្រើរយះពេលតែកន្លះថ្ងៃប៉ុណ្ណោះដោយសារមានឧបករណ៍សម្ភារះសំណង់គ្រប់គ្រាន់។ផ្ទាំងបេតុងដែលរបើកខូចខាតបាក់ស្រុតនោះមានទំហ៊ំ៤ម៉ែត្រគុណនឹង៨ម៉ែត្រ។
មន្ដ្រីនគរបាលនាយកដ្ឋានការពារបេតិកភណ្ឌប្រាសាទព្រះវិហារម្នាក់បានអោយដឹងថាកន្លែងជួសជុលស្ថាបនាខាងលើយើងនឹងអាចធ្វើដំណើរឆ្លងកាត់ទៅមកបានជាធម្មតាទ្បើងវិញនៅល្ងាចថ្ងៃទី២២កញ្ញាដដែលនេះដើម្បីស្វាគមន៍ដល់ដំណើរភ្ញៀវទេសចរជាតិនិងអន្តរជាតិទាំងអស់អញ្ជើញទ្បើងទៅទស្សនាកំសាន្តប្រាង្គប្រាសាទព្រះវិហារដ៍ល្បីល្បាញ៕ 
