ខេត្តតាកែវ៖ក្មេងប្រុសតូចម្នាក់បានលង់ទឹកស្លាប់ក្នុងត្រពាំងទឹកមួយកន្លែងយ៉ាងអាណោចអាធ័មបំផុត បង្កការភ្ញាក់ផ្អើលដល់ប្រជាពលរដ្ឋ និងសមត្ថកិច្ច កាលពីវេលាម៉ោង ១០និង៣០នាទី ថ្ងៃទី២១ ខែកញ្ញា ឆ្នាំ២០១៥ នៅចំណុចត្រពាំងទឹកខាងកើតផ្ទះចម្ងាយ២០០ម៉ែត្រ ស្ថិតក្នុង
ភូមិព្រៃស្រោង ឃុំអង្គតាសោម ស្រុកត្រាំកក់ ខេត្តតាកែវ ។ លោកនាយប៉ុស្តិ៍នគរបាលរដ្ឋបាលអង្គតាសោម បានប្រាប់ឲ្យដឹងថា ក្មេងប្រុសរងគ្រោះមានឈ្មោះ ម៉ៅ សុខលាភ អាយុ ២ឆ្នាំ រស់នៅភូមិ-ឃុំកើតហេតុខាងលើ បានលង់ទឹកស្លាប់នៅក្នុងត្រពាំងទឹកពីខាងកើតផ្ទះចម្ងាយ ២០០ម៉ែត្រ ខណៈពេលដែលឪពុកម្តាយនាំគ្នាទៅស្ទូងស្រូវនៅឯស្រែ ហើយទុកកូនតូចឲ្យនៅផ្ទះជាមួយបងស្រីអាយុ៥ឆ្នាំ ។ លោកនាយប៉ុស្តិ៍បានបន្តថា ក្រោយពីទទួលបានព័ត៌មានអំពីហេតុការណ៍ក្មេងលង់ទឹកនេះភ្លាម លោកបានចាត់កម្លាំងប៉ុស្តិ៍រដ្ឋបាល សហការជាមួយកម្លាំងជំនាញ នៃអធិការដ្ឋាននគរបាលស្រុកត្រាំកក់ និងអាជ្ញាធរភូមិ-ឃុំ ចុះទៅពិនិត្យធ្វើកោសល្យវិច័យសាកសពក្មេងរងគ្រោះ ឃើញថា ពិតជាស្លាប់ដោយសារលង់ទឹកប្រាកដមែន ចំណែកសាកសពបានប្រគល់ជូន ក្រុមគ្រួសារធ្វើបុណ្យតាមប្រពៃណី ៕
