ឧត្តរមានជ័យ៖អាវុធហត្ថស្រុកអន្លង់វែង បញ្ជូនជនសង្ស័យម្នាក់ជាជនជាតិវៀតណាម និងស្រីម្នាក់ ទៅកាន់ទីបញ្ជា ការកង រាជអាវុធហត្ថខេត្តឧត្តរមានជ័យ ដើម្បីចាត់ការបន្តទៅតាមនីតិវិធីច្បាប់ បញ្ជូនទៅសាលាដំបូងខេត្តឧត្តមមានជ័យ ដែលពាក់ព័ន្ធទៅនឹងករណីជួញដូរ និង
ចែកចាយថ្នាំញៀន។
លោកវរសេនីយ៍ត្រី ងួន ទ្ធីរឹទ្ធ មេបញ្ជាការកងរាជអាវុធហត្ថស្រុកអន្លង់វែង បានឱ្យដឹងថា ការឃាត់ខ្លួនជនសង្ស័យ មុខសញ្ញាជួញដូរ និងចែកចាយថ្នាំញៀនដ៏សកម្មនេះ ដែលករណីទី១ នៅវេលាម៉ោង ៦ល្ងាចថ្ងៃទី២២ ខែកញ្ញា ឆ្នាំ២០១៥ កម្លាំងអាវុធហត្ថស្រុក ឃាត់បានបុរសម្នាក់ជាជនជាតិវៀតណាម ឈ្មោះ ហែម សំអៀន អាយុ៤៥ឆ្នាំ ស្នាក់នៅភូមិជើងភ្នំ ឃុំត្រពាំងប្រីយ៍ ស្រុកអន្លង់វែង ដោយធ្វើការឆែករក ឃើញថ្នាំញៀនប្រភេទមេតំហ្វេតាមីនចំនួន ១៩គ្រាប់ ខណៈដែលជនសង្ស័យកំពុងធ្វើសកម្មភាព ចែកចាយថ្នាំញៀន។
ចំណែកករណីទី២ នៅវេលាម៉ោង ៩ព្រឹកថ្ងៃទី២៣ ខែកញ្ញា ឆ្នាំ២០១៥ បន្ទាប់ពីធ្វើការសាកសួរ បុរសជនជាតិវៀតណាម កម្លាំងអាវុធហត្ថស្រុកបានធ្វើការស្រាវជ្រាវ ឈានដល់ធ្វើការឃាត់ខ្លួនស្ត្រីម្នាក់ជាជនជាតិខ្មែរ នៅចំណុចភូមិអូរជញ្ជៀន ឃុំ-ស្រុកអន្លង់វែង ខេត្តឧត្តរមានជ័យ ដោយធ្វើការឆែកឆេររកឃើញថ្នាំញៀនប្រភេទមេតំហ្វេតាមីន ចំនួន ៦៥គ្រាប់ ។ ហើយស្ត្រីជាជនសង្ស័យ ឈ្មោះ ឡុង ដាលីន អាយុ ៣២ឆ្នាំ រស់នៅភូមិជើងភ្នំ ឃុំត្រពាំងប្រីយ៍ ស្រុកអន្លង់វែង ខេត្តឧត្តរមានជ័យ។ ចំពោះស្ត្រីជាជនសង្ស័យជួញដូរថ្នាំញៀនខាងលើ ដែលមានប្តី ឈ្មោះ យ៉ុង ថុល ភេទប្រុសអាយុ៣៥ឆ្នាំមុខរបរធ្វើចំការ។
លោកវរសេនីយ៍ត្រីបន្តទៀតថា បច្ចុប្បន្នជនសង្ស័យជាស្ត្រីឈ្មោះ ឡុង ដាលីន រួមនឹងវត្ថុតាំងថ្នាំញៀនចំនួន៦៥គ្រាប់ និងបុរសជាជនជាតិវៀតណាម ឈ្មោះ ហែម សំអៀន នឹងវត្ថុតាងថ្នាំញៀនចំនួន ១៩គ្រាប់ លោកបានធ្វើកំណត់ហេតុ និងកសាងសំណុំឯកសារបញ្ជូនទៅទីបញ្ជាការអាវុធហត្ថខេត្ត ដើម្បីចាត់ការបន្តបញ្ជូនទៅតុលាការ។
លោកវរសេនីយ៍ត្រីបន្ត ករណីបង្ក្រាបគ្រឿងញៀន ២ករណីខាងលើ ក៏មានការចង្អុយបង្ហាញផងដែរ ពីឧត្តមសេនីយ៍ត្រី ពុធ សារ៉ាន់ មេបញ្ជាការកងរាជអាវុធហត្ថខេត្ត និងព្រះរាជអាជ្ញាខេត្តឧត្តរមានជ័យ លោកកូយ កាន់យ៉ា ទើបការបង្ក្រាបបទល្មើសគ្រឿងញៀន ទទួលដោយជោគជ័យ និងឈានដល់បំបែកមុខសញ្ញាចែកចាយគ្រឿងញៀនដ៏សកម្មបាន៕
