ខេត្តបាត់ដំបង៖ មតិសំណេះសំណាលដែលមានអត្ថន័យដ៏ជ្រាលជ្រៅបំផុត របស់នាយឧត្តមសេនីយ៍ ខេង សុមេធ អគ្គស្នងការរង និងជាមេបញ្ជានគរបាលជាតិប្រចាំទិសភូមិភាគទី៤ និងទី៥ បានធ្វើឲ្យនិវត្តន៍ជន ទទួលបាននូវក្តីរំភើបកក់ក្តៅ ប្រកបដោយក្តីមោទនភាពក្រៃ ក្រោមពាក្យថា ៖ និវត្តន៍ជន ! គឺជាស្ពានចម្លងប្រជាជាតិ និងមាតុភូមិ ដោយការប្រើប្រាស់វីរភាព អង់អាចក្លាហាន ឆ្លងកាត់របត់នយោបាយដ៏ស្មុគស្មាញ ឆ្ពោះទៅរកសន្តិភាព និងតំណាក់កាលនៃការអភិវឌ្ឍន៍នាពេលបច្ចុប្បន្ននេះ ។
ខ្លឹមសារសំណេះសំណាលនេះ បានលើកឡើងនៅរដ្ឋបាលសាលាខេត្តបាត់ដំបង នារសៀលថ្ងៃទី២២ ខែកញ្ញា ឆ្នាំ២០១៥ ក្នុងឱកាសនៃការប្រារព្ធពិធីប្រកាសផ្ទេរភារកិច្ច តែងតាំងមុខតំណែង ជូនដល់មន្ត្រីនគរបាលជាតិនៃស្នងការដ្ឋាននគរបាលខេត្តបាត់ដំបង ចំនួន ១៧២ រូប និងបំពាក់តម្លើងឋានន្តរសក្តិចំនួន ១៥១ រូប ចាប់ពីថ្នាក់វរសេនីយទោ ដល់ថ្នាក់ពលបាលឯក ដែលក្នុងពិធីនោះ ក៏ត្រូវបានការអញ្ជើញចូលរួម ពីសំណាក់មន្ត្រីនគរបាលជាតិចូលនិវត្តន៍ ចំនួន ៥០ រូប ផងដែរ ។
លោក ច័ន្ទសុផល អភិបាលខេត្តបាត់ដំបង បានលើកឡើងឲ្យដឹងថា ៖ នេះមិនមែនជាលើកទី១នោះទេ ដែលមន្ត្រីនគរបាលជាតិនៃស្នងការដ្ឋាននគរបាលខេត្តបាត់ដំបង បានទទួលការប្រកាសផ្ទេរភារកិច្ច តែងតាំងមុខតំណែង និង បំពាក់ឋានន្តរសក្តិ ។ ឯកឧត្តម បញ្ជាក់ថា ៖ តាមរយៈនៃពិធីនេះ គឺជាការឆ្លុះបង្ហាញអំពីការខិតខំប្រឹងប្រែងបំពេញតួនាទី និង អនុវត្តការសម្រេចភារកិច្ចដ៏ឧត្តុងឧត្តម រក្សាសន្តិសុខ សុវត្តិភាពនយោបាយ សណ្តាប់សង្គមបានល្អប្រសើរ របស់មន្ត្រីនគរបាលជាតិ ហើយអ្វីដែលសំខាន់ជាងនេះ គឺការឆ្លើយតប ស្របតាមកំណែរទម្រង់នយោបាយស៊ីជម្រៅលើវិស័យសន្តិសុខជាតិរបស់រាជរដ្ឋាភិបាលកម្ពុជា និងជាការលើកទឹកចិត្តជូនដល់មន្ត្រីសកម្មការរងារ ក្រោមការយកចិត្តទុកដាក់ខ្ពស់ ពីសំណាក់ក្រសួងមហាផ្ទៃ ក៏ដូចជា អគ្គស្នងការដ្ឋាននគរបាលជាតិ ផងដែរ ។
នាយឧត្តមសេនីយ៍ ខេង សុមេធ ជាមួយនឹងការជម្រុញឲ្យមន្ត្រីនគរបាលជាតិ ជាពិសេស មន្ត្រីប៉ុស្ថិនគរបាលរដ្ឋបាលនៅមូលដ្ឋាន បន្តការត្រួតពិនិត្យ និងអនុវត្តគោលនយោបាយភូមិ-ឃុំមានសុវត្ថិភាព ឯកឧត្តម ត្រូវបានផ្តោតការយកចិត្តទុកដាក់ ដោយមនោសញ្ចេតនា គោរព ដឹងគុណប្រកបដោយ កតញ្ញូតាធម៌ ដ៏ជ្រាលជ្រៅ ជូនចំពោះមន្ត្រីនគរបាលជាតិចូលនិវត្តន៍ និងបានវាយតម្លៃខ្ពស់ផងដែរ ចំពោះបងស្រីដែលជាភិរិយានៃមន្ត្រីនគរបាលចូលនិវត្តន៍ទាំងអស់ ដែលបានចែករំលែកសេចក្តីសុខផ្ទាល់ខ្លួន គាំទ្រ បង្កលក្ខណៈគ្រប់បែបយ៉ាង ដើម្បីបានស្វាមី បានប្រព្រឹត្តិវីរកម្ម នាំយកឆន្ទៈ និងការលះបង់កម្លាំងកាយចិត្ត ចាក់ក្រាលលើពេលវេលានៃជីវិតការងាររបស់ខ្លួនដ៏យូរអង្វែង ដើម្បីកសាងជំហរជាស្ពានដ៏រឹងមាំ ក្រោមការដឹកនាំដ៏ឈ្លាសវៃ នៃសម្តេចតេជោ ហ៊ុន សែន ជាប្រមុខ ក្នុងបុព្វហេតុសន្តិភាពនៃមាតុភូមិ សន្តិសុខជាតិ និងឈានចូលដល់ដំណាក់កាលនៃការអភិវឌ្ឍន៍សង្គម នាពេលបច្ចុប្បន្ននេះ ។
នៅក្នុងពិធីនោះ មន្ត្រីនគរបាលដែលបានទទួលការប្រកាសផ្ទេរភារកិច្ច តែងតាំងមុខតំណែងថ្មី និងតម្លើងឋានន្តរសក្តិ ព្រមជាមួយនឹងភ្ញៀវកិត្តិយសដែលបានចូលរួម សារុបប្រមាណជា ៤០០នាក់ បានទទួលការឧបត្ថម្ភ ក្នុងម្នាក់ៗ ១០ម៉ឺនរៀល មន្ត្រីនគរបាលចូលនិវត្តន៍ ៥០ រូប ទទួលក្នុងម្នាក់ ៥០ ម៉ឺនរៀល ។ ក្នុងនោះដែរ ជាការដោះស្រាយសំណើរ នាយឧត្តមសេនីយ៍ ខេង សុមេធ បានឧបត្ថម្ភទោចក្រយានយន្ត ស៊េរីថ្មី ១គ្រឿង ជូនដល់អធិការដ្ឋាននគរបាលស្រុករតនមណ្ឌល និង ឧបត្ថម្ភការតម្លើង ឧបករណ៍វិទ្យុទាក់ទង ១គ្រឿង ជូនដល់អង្គភាពវរសេនាតូចនគរបាលការពារព្រំដែនគោក លេខ ៣១០ ឈរជើងប្រចាំការនៅក្នុងភូមិសាស្ត្រស្រុកសំឡូត ផងដែរ ៕