ខេត្តប៉ៃលិន៖ យ៉ាងហោចណាស់មនុស្ស២នាក់ បានរងរបួសធ្ងន់ ត្រួវបានសាច់ញាតិបញ្ជូនទៅសង្គ្រោះនៅមន្ទីរពេទ្យបង្អែកខេត្តប៉ៃលិន ដោយគ្រោះថ្នាក់ចរាចរណ៏ដែលបង្កដោយរថយន្តក្រុមហ៊ុនS.K ដឹកភ្ញៀវចូលលេងកាស៊ីណូ បើកបុកម៉ូតូមួយគ្រឿង រួចខ្ទាត់ត្រួវម៉ូតូមួយគ្រឿងទៀត
ចំណែកអ្នកបើកបររថយន្តបង្ក បានរួចរត់គេចខ្លួនបាត់ស្រមោល ។ ហេតុការណ៏គ្រោះថ្នាក់ចរាចរណ៏ខាងលើនេះ បានកើតឡើងកាលពីវេលាម៉ោង ០៧:២៥ នាទីព្រឹកថ្ងៃទី២២ ខែកញ្ញា ឆ្នាំ២០១៥ ស្ថិតនៅចំណុចផ្លូវបំបែកភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
ប្រភពព័ត៌មានពីកន្លែងកើតហេតុ បានឲ្យដឹងថា៖ មុនពេលកើតហេតុគេឃើញរថយន្តមួយគ្រឿងបើកបរដោយបុរសវ័យក្មេង បើកក្នុងទឹសដៅពីកើតទៅលិច លុះមកដល់ចំណុចកើតហេតុ ក៏បានបុកម៉ូតូមួយគ្រឿង បណ្តាលឲ្យផ្លោងខ្ទាតម៉ូតូទៅត្រួវម៉ូតូមួយគ្រឿងទៀត ក្នុងហេតុការណ៏បញ្ច្រាស់ទឹសគ្នា បណ្តាលឲ្យមនុស្ស២នាក់រងរបួសធ្ងន់ធ្ងរ ។ ប្រភពព័ត៌មានបន្តថា៖ រថយន្តក្រោយពីបង្កគ្រោះថ្នាក់ចរាចរណ៏ហើយ ក៏បើករត់គេច ដោយយករថយន្តទៅលាក់ទុកក្នុងផ្ទះអ្នកស្គាលគ្នា ដែលមានឈ្មោះពៅ រួចក៏រត់គេចខ្លួនបាត់ស្រមោលតែម្តង ។
ប្រភពព័ត៌មានពីសមត្ថកិច្ចចរាចរណ៏ផ្លូវគោកខេត្ត បានឲ្យដឹងថា៖ ជនរងគ្រោះក្នុងហេតុការគរោះថ្នាក់ចរាចរណ៏ទី១ ឈ្មោះ ភាព សុភា ភេទប្រុស អាយុ ១៨ឆ្នាំ ជាសិស្ស រស់នៅភូមិអូច្រាកើត សង្កាត់ទួលល្វា ក្រុងប៉ៃលិន ខេត្តប៉ៃលិន រងរបួសធ្ងន់ បាក់ភ្លៅនិងកំភួនជើង បើកបរម៉ូតូម៉ាក HONDA Dream C125 ពណ៌ខ្មៅ ពាក់ស្លាកលេខ ប៉ៃលិន 1A.8179 ក្នុងទឹសដៅពីលិចទៅកើត ,ជនរងគ្រោះទី២ ឈ្មោះ ឡេ វ៉ាង ភេទប្រុស អាយុ ៦២ឆ្នាំ ជាអាជីវករ រស់នៅភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន រងរបួសធ្ងន់ ត្រង់ចង្កោះ និងជើងស្តាំ បើកបរម៉ូតូម៉ាក HONDA Wave ពណ៌ខ្មៅ ពាក់ស្លាកលេខ ប៉ៃលិន 1A.2097 ក្នុងទឹសដៅពីកើតទៅលិច ។ ប្រភពព័ត៌មានបន្តថា៖ ចំណែកអ្នកបើកបររថយន្តបង្កឈ្មោះ គា ភេទប្រុស អាយុ ២០ឆ្នាំ មុខរបរអ្នកបើកបររថយន្ត រស់នៅភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ពុំមានរងរបួស ដោយបើកបររថយន្តក្រុមហ៊ុនS.K ម៉ាក MERCEDES ពណ៍ស ពាក់ស្លាកលេខភ្នំពេញ 2S.1887 ក្នុងទឹសដៅពីកើត ទៅលិច ខូចខាតស្រាល បន្ទាប់ពីបង្កគ្រោះថ្នាក់រួច អ្នកបើកបរបានបើករថយន្តមកលាក់ទុកនូវផ្ទះឈ្មោះពៅ រួចរត់គេចខ្លួនបាត់ស្រមោល ។ បច្ចុប្បន្នរថយន្តបង្ក និងម៉ូតូ ត្រូវបានសមត្ថកិច្ចចរាចរណ៏ខេត្តយកមករក្សាទុកនៅស្នងការដ្ឋាននគរបាលខេត្តប៉ៃលិន ដើម្បីរងចាំការដោះស្រាយទៅតាមផ្លូវច្បាប់ ៕
