ខេត្តកំពង់ឆ្នាំង៖ ពាក់ព័ន្ធនឹងករណីសាងសង់ផ្ទះល្វែងមួយកន្លែងខុសប្លង់អនុញ្ញាត ស្ថិតក្នុងភូមិផ្សារឆ្នាំង សង្កាត់ផ្សារឆ្នាំង ក្រុងកំពង់ឆ្នាំង នៅវេលាម៉ោង៤និង២១នាទីល្ងាចថ្ងៃទី២២ ខែកញ្ញា ឆ្នាំ២០១៥ ឯកឧត្តម ឈួរ ច័ន្ទឌឿន អភិបាលខេត្តកំពង់ឆ្នាំងបានមានប្រសាសន៍អោយ
ដឹងថា៖ឯកឧត្តមបានផ្អាកមិនអោយមានការសាងសង់បន្តទៅទៀតទេ ហើយសុំអោយលោក ហ៊ន ប៊ុនលី ជាម្ចាស់ផ្ទះស្ម័គ្រចិត្តរុសរើសំណង់ដំបូលជាន់លើចេញដែលបានសង់លើសពីក្នុងប្លង់ចេញ ដោយសារផ្ទះនោះសាងសង់មិនគោរពទៅតាមគំរូប្លង់ចាស់ ដែលបានអនុញាតិអោយសាងសង់ដោយឯកឧត្តម ស៊ូ ភីរិន្ទ និងឯកឧត្តម ទូច ម៉ារីម ដែលជាអភិបាលខេត្តចាស់ គឺក្នុងប្លង់គេអោយសាងសង់តែជាន់ផ្ទាល់ដីទេ។នៅពេលម្ចាស់ផ្ទះសុំច្បាប់ទៅលោកអភិបាលក្រុងកំពង់ឆ្នាំង ក្នុងខែមីនា ឆ្នាំ២០១៥ លោកអភិបាលក្រុងកំពង់ឆ្នាំងបានចេញលិខិតអនុញាតិអោយសង់បន្តតាមគំរូប្លង់ចាស់អោយបានត្រឹមត្រូវ តែគាត់បែរជាសង់ហួសឡើងទៅលើវិញ ខុសប្លង់ចាស់ នេះជាករណីទី១។
លោកអភិបាលខេត្តបានបន្តថា ៖ករណីទី២ តំបន់ដែលគាត់សាងសង់ផ្ទះនោះ ជាតំបន់មាត់ព្រែកដែលគេហាមឃាត់ ដោយផ្ទះរបស់គាត់បានសាងសង់លយចូលទៅក្នុងដីព្រែកច្រើនជាងដីច្រាំងទន្លេ និងជាតំបន់ងាយគ្រោះថ្នាក់។ នៅក្នុងសេចក្តីសំរេចរបស់គណៈអភិបាលខេត្ត គឺអោយអាជ្ញាធរក្រុងត្រូវធ្វើការជាមួយម្ចាស់ផ្ទះ ដោយរៀបចំការសាងសង់អោយបានត្រឹមត្រូវតាមប្លង់ដែលមាន បើសិនជាគាត់សាងសង់តាមប្លង់ដែលមាន គាត់ត្រូវតែរុះសំណង់ដែលបានសង់លើសទៅលើនោះចេញ ព្រោះគាត់អត់មានប្លង់ផ្សេងពីនេះទៀតទេ។
ដោយឡែកលោក ហ៊ីង ភ័ព្វមីនា អភិបាលរងក្រុងកំពង់ឆ្នាំងបានអោយដឹងនៅវេលាម៉ោង៣រសៀល ថ្ងៃទី២២ ខែកញ្ញា ឆ្នាំ២០១៥នេះថា៖ ក្រុមការងារចំរុះថ្នាក់ខេត្ត ដែលមានសាលាក្រុងកំពង់ឆ្នាំង មន្ទីររៀបចំដែនដីនគររូបនីយកម្ម និងសំណង់, ការិយាល័យសុរិយោដីក្រុង, មន្ទីរទំនាក់ទំនងរដ្ឋសភាព្រឹទ្ធសភា និងអធិការកិច្ច,មន្ទីរព័ត៌មាន និងម្ចាស់ផ្ទះល្វែងឈ្មោះ ហន ប៊ុនលី បានបើកកិច្ចប្រជុំដោះស្រាយមួយកាលពីថ្ងៃទី១៨ ខែកញ្ញា ឆ្នាំ២០១៥កន្លងទៅនេះ ដោយតំរូវអោយម្ចាស់ផ្ទះគោរពការសាងសង់ផ្ទះទៅតាមគំរូប្លង់ដើមវិញ ហើយការសង់លើសទៅលើនោះគឺត្រូវរុសរើចេញ នៅក្នុងសប្តាហ៍នេះ ក្រុមការងារ នឹងត្រូវប្រជុំដោះស្រាយបន្ថែមទៀតលើករណីសំណង់ខុសច្បាប់ខាងលើនេះ។
ចំណែកលោក ហ៊ន ប៊ុនលី ដែលជាម្ចាស់ផ្ទះវិញ បានសំណូមពរដល់ក្រុមការងារចំរុះថ្នាក់ខេត្តថា៖គាត់សុខចិត្តកាត់ដំបូលផ្ទះដែលបានសង់ហើយចេញវិញ តែសុំធ្វើដំបូលទាបជាងហ្នឹងបន្តិច ដោយសារគាត់បានជំពាក់ប្រាក់ធនាគារច្រើន។
មន្ត្រីសាលាក្រុងកំពង់ឆ្នាំងបានអោយដឹងថា៖ តំបន់ដែលគេកំពុងសាងសង់ផ្ទះថ្មនេះជាតំបន់អភិវឌ្ឍន៍ច្រាំងទន្លេរបស់ខេត្តកំពង់ឆ្នាំងទៅថ្ងៃអនាគត ហេតុនេះចាប់ពីមុខវត្តយាយទេព រហូតដល់ថ្នល់ដាច់ចុងកោះ គឺពុំអនុញាតិអោយមានការសាសង់សំណង់រឹងមាំឡើយ ដែលជាហេតុពេលធ្វើការអភិវឌ្ឍន៍ខាងមុននេះ នាំអោយអាជ្ញាធរខេត្ត និងក្រុងកំពង់ឆ្នាំងពិបាកដោះស្រាយ៕
