ខេត្តបន្ទាយមានជ័យ លោកឧត្តមសេនីយ៍ត្រី សេង ធារិន មេបញ្ជាការរង និងជានាយសេនាធិការកងពលតូចថ្មើរជើងលេខ៥១ បានថ្លែងថា កន្លងទៅថ្មីៗនេះ មានជនខិលខូចជនឆក់ឱកាសមួយចំនួនបានដើរឆបោកដើរជ្រើសរើសនាយទាហានចូលបម្រើការក្នុងជួរកងទ័ព ដើម្បីបានចូលតម្រូវទ័ពឲ្យបង់ប្រាក់ចំនួនប៉ុននេះប៉ុនណោះ បើបងប្អូនណាមានសាច់ញាតិ ឬបងប្អូនមានបំណងចង់ប្រឡងចូលធ្វើទាហាន សូមកុំចាញ់បោកគេ ព្រោះការចូលបម្រើកងទ័ព គឺមិនបានយកលុយទេ គឺគេជ្រើសរើសអ្នកដែលមានសមត្តភាព មានចំណេះដឹងពិតប្រាកដ ប្រកបដោយតម្លាភាព និងយុត្តិធម៌ បើមានករណីនេះកើតឡើងសូមរាយការណ៍មកជាបន្ទាន់ ដើម្បីឲ្យលោកចាត់ការតាមផ្លូវច្បាប់។
ការថ្លែងនេះ ត្រូវបានធ្វើឡើងកាលពីព្រឹកថ្ងៃទី២២ ខែកញ្ញា ឆ្នាំ២០១៥ ក្នុងសាលប្រជុំកងពលតូចថ្មើរជើងលេខ៥១ នៅស្រុកព្រះនេត្រព្រះ ខេត្តបន្ទាយមានជ័យ នាឱកាសដែលលោកអញ្ជើញជា អធិបតីក្នុងពិធីចែកលិខិតបញ្ជាក់ការសិក្សារបស់វិទ្យាស្ថានហ្វឹកហ្វឺនបណ្តុះបណ្តាលកងកម្លាំងរក្សាសន្តិភាពបោសសម្អាតមីន និងកាកសំណល់សង្គ្រាម ក្រោយពីបញ្ចប់វគ្គបច្ចេកសទេសដោះមីនតាមព្រំដែន។ទន្ទឹមគ្នានេះ ក៏មានការបើកវគ្គបណ្តុះបណ្តាល ស្តីពី
យុទ្ធវិធីទ័ពដល់ពលទាហានចំនួន១៤៨នាក់ ដើម្បីពង្រឹងសមត្ថភាពគោរពវិន័យ បញ្ច្រៀបចំណេះដឹង និងបច្ចេកទេសថ្មី ដល់នាយទាហានទាំងនោះ ក្នុងន័យរួមចំណែកទប់ស្កាត់បទល្មើសផ្សេងៗដើម្បីរក្សាសន្តិសុខសណ្តាប់ធ្នាប់ជូនពលរដ្ឋ និងសង្គ្រោះពលរដ្ឋក្នុងគ្រោះធម្មជាតិផ្សេងៗ ឬទឹកជំនន់ ខណៈរដូវវស្សាកំពុងមានភ្លៀងធ្លាក់ខ្លាំងផងដែរ៕
