ខេត្តសៀមរាប៖ សម្តេចក្រឡាហោម ស ខេង នាយករដ្ឋមន្ត្រីស្តីទីនៃព្រះរាជាណាចក្រកម្ពុជា បានថ្លែងថា ៖ រាជរដ្ឋាភិបាល ដែលមានក្រសួងអប់រំយុវជននិងកីឡា ជាសេនាធិការ ជាតួរអង្គដ៏សំខាន់ បានខិតខំប្រឹងប្រែងធ្វើកំណែរទម្រង់ វិស័យអប់រំសិក្សាធិការ ហើយឆ្លងតាមការប្រឡង
សញ្ញាបត្រទុតិយភូមិកន្លងទៅថ្មីៗនេះ គឺទទួលបានលទ្ធផលល្អ ដែលមតិទូទៅកត់សំគាល់ថា ជាការប្រឡងប្រកបដោយតម្លាភាព និងបានប្រព្រឹត្តិទៅយ៉ាងល្អប្រសើរ បើប្រៀបធៀបទៅនឹងការប្រឡងនាឆ្នាំមុនៗ កន្លងទៅ ហើយសង្ឃឹមថា កំណែរទម្រង់នេះ នឹងបន្តទទួលបានជោគជ័យបន្ថែមទៀត ។
សម្តេចក្រឡាហោម ស ខេង មានប្រសាសន៍យ៉ាងដូច្នេះនៅក្រុងសៀមរាប នាព្រឹកថ្ងៃទី២៨ ខែកញ្ញានេះ គឺនៅក្នុងឱកាសដែលសាកលវិទ្យាល័យ សៅស៍អ៊ីសថ៍ អេយសៀ ប្រារព្វពីធីប្រគល់វិញ្ញាបនបត្រថ្នាក់បរិញ្ញាបត្រជំនាន់ទី០៤ ទី ០៥ និងបរិញ្ញាបត្ររងជាន់ខ្ពស់ជំនាន់ទី០៣ ចំនួន ៧៧៥នាក់ ព្រមទាំងផ្តល់អាហាររូបករណ៍ និងប័ណ្ណសរសើរ ចំនួន ៣១៤នាក់ ផ្សេងទៀត ។
សម្តេចក្រឡាហោម ស ខេង បានបញ្ជាក់ថា ៖ ការធ្វើឲ្យមានជោគជ័យសម្រាប់វិស័យអប់រំ គឺតម្រូវឲ្យមានការគាំទ្រ និងការចូលរួមពីសំណាក់ភាគីដែលពាក់ព័ន្ធទាំងអស់ ពុំមែនជាការងារដែលត្រូវបានអនុវត្តដោយក្រសួងអប់រំតែម្នាក់ឯងនោះទេ វាគឺជាការងាររបស់យើងទាំងអស់គ្នា រាប់ទាំងមាតាបិតា អាណាព្យាបាលសិស្ស និងសហគមន៍ ផងដែរ ។ សម្តេចក្រឡាហោមបានគូសបញ្ជាក់ថា ៖ យ៉ាងដូច្នេះហើយ ទើបរាជរដ្ឋាភិបាល បានបើកឱកាស និងចាត់ទុកថា វិស័យឯកជនគឺជាដៃគូមិនអាចខ្វះបាន ដើម្បីពន្លើនការអភិវឌ្ឍន៍វិស័យអប់រំ ដែលជាវិស័យគន្លឺះ ក្នុងការបណ្តុះបណ្តាលធនធានមនុស្ស ។ មកដល់តំណាក់កាលបច្ចុប្បបន្ននេះ ទូទាំងប្រទេស មានគ្រឹះស្ថានឧត្តមសិក្សាឯកជន ចំនួន៩៩គ្រឹះស្ថាន កំពុងដំណើរការ ជាមួយនឹងគ្រឹះស្ថានឧត្តមសិក្សា ផ្នែកសាធារណចំនួន ៤៩គ្រឹះស្ថាន ផ្សេងទៀត ។
ជាមួយនឹងឱកាសជួបជុំនិស្សិត មាតាបិតា អាណាព្យាបាលសិស្ស រួមទាំងមន្ត្រី ថ្នាក់ដឹកនាំក្នុងខេត្តផងដែរ សម្តេចក្រឡាហោម បានផ្ញើសារនយោបាយស្តីពីគ្រឿងញៀន ដែលជាផ្នែកមួយ សម្រាប់ការអនុវត្តគោលនយោបាយភូមិឃុំមានសុវត្តិភាព ។ សម្តេចក្រឡាហោម បានបង្ហាញនូវការកត់សម្គាល់ថា ៖ ការបង្ក្រាបគ្រឿងញៀនគឺមានសន្ទុះខ្លាំង បានច្រើនករណី ក៏ប៉ុន្តែបញ្ហាដែលត្រូវព្រួយបារម្ភ គឺការរីករាលដាលនៃការជួញដូរ ចែកចាយ ប្រើប្រាស់គ្រឿងញៀនបានទៅដល់ទីជនបទ ។ ភូមិឃុំមានសុវត្ថិភាព ត្រូវតែធានាឲ្យបាន ថាក្នុងភូមិឃុំរបស់ខ្លួន គឺគ្មានអ្នកជួញដូរ និងអ្នកប្រើប្រាស់គ្រឿងញៀន ។ បើមានអ្នកជួញដូរ ត្រូវតែវែកមុខយកមកផ្តន្ទាទោសតាមច្បាប់ បើមានអ្នកប្រើប្រាស់គ្រឿងញៀន យើងចាត់ទុកជាអ្នករងគ្រោះ ក៏ប៉ុន្តែត្រូវតែមានវិធានការអប់រំ ធ្វើឲ្យប្រជាពលរដ្ឋជ្រួតជ្រាប អំពីគ្រោះថ្នាក់នៃការប្រើប្រាស់គ្រឿងញៀន ព្រោះគ្រឿងញៀនវាបំផ្លាញអនាគតអ្នកដែលប្រលែងលេងជាមួយវា និងត្រូវបានបំផ្លាញធនធានសង្គម បង្ករវិបត្តិផ្សេងៗទៀត ថែមទៀតផង ។ សម្តេចក្រឡាហោម វាយតម្លៃថា គ្រឿងញៀនជាបញ្ហាធ្ងន់ធ្ងរ ដែលត្រូវយកចិត្តទុកដាក់ ។
ជាមួយនឹងការប្រគល់វិញ្ញាបនបត្រនោះ សម្តេចក្រឡាហោម ស ខេង បានផ្ញើនូវជំនឿជឿជាក់ថា ៖ ក្មួយៗជ័យលាភីទាំង ៧៧៥នាក់ ប្រាកដជាយកចំណេះដឹង និងបទពិសោធន៍ល្អៗ ដែលបានសិក្សារៀនសូត្រយកចេញពីសាកលវិទ្យាល័យ សៅស៍អ៊ីសថ៍ អេយសៀ ទៅបំរើដល់សង្គមជាតិ ៕
