ព្រះវិហារ៖ប្រជាសហគមដើមកំណើតកួយចំនួនជាង២០នាក់បានកេណ្ឌគ្នាចុះទៅចាប់បទល្មើសព្រៃឈើនៅព្រៃការពារព្រះរការយះពេល១សប្តាហ៍ចាប់ពីថ្ងៃទី១៨ដល់២៤កញ្ញា២០១៥ស្ថិតនៅក្នុងឃុំពោធិ៍និងឃុំប្រមេរស្រុកត្បែងមានជ័យខេត្តព្រះវិហារនេះបើតាមការអះអាងអោយដឹងពី
ពលរដ្ឋក្នុងមូលដ្ឋាន។
សេចក្ដីរាយការណ៍បានអោយដឹងនៅព្រឹកថ្ងៃទី២៨កញ្ញា២០១៥ថាជាលទ្ធផលប្រជាសហគមជនជាតិដើមបានប្រមូលនិងរឹបអូសរណាយន្តទាំងចាស់ទាំងថ្មីប្រមាណ១៥គ្រឿងនិងឈើលេខ១ប្រភេទក្តារគគីរនិងឈើគ្នាបគគីរប្រវែង៤ម៉ែត្រៗសរុបចំនួនជាង៥ម៉ែត្រគូបប៉ុន្តែការរាប់វាស់វែងនេះពួកគាត់មិនបានហៅជំនាញមេព្រៃមកចូលរួមពិនិត្យទ្បើយ។
រីឯការចុះទៅចាប់បទល្មើសព្រៃឈើនោះសហគមជនជាតិដើមមិនបានស្នើសុំកិច្ចសហការពីស្ថាប័នតុលាការនិងមន្ដ្រីរដ្ឋបាលព្រៃឈើខេត្តព្រះវិហារនោះទ្បើយ។វត្ថុតាងឈើនិងមធ្យោបាយល្មើសដូចជារណាយន្តត្រូវបានពួកគេយកទៅរក្សាទុកក្នុងបរិវេណវត្តប្រមេរដោយខ្លួនឯង។
លោកអ៊ិតភូម្រានាយខណ្ឌរដ្ឋបាលព្រៃឈើព្រះវិហារបានមានប្រសាសន៍អោយដឹងថាការចុះទៅចាប់ឈើនិងរឹបអូសវត្ដុតាងនិងមធ្យោបាយល្មើសខាងលើរបស់សហគមជនជាតិដើមយកទៅរក្សាទុកដោយខ្លួនឯងដោយពុំបានធ្វើកំណត់ហេតុប្រគល់មកអោយសមត្ថកិច្ចជំនាញទ្បើយ។លោកបន្តថាដើម្បីស្របទៅតាមនិតិវិធីច្បាប់ស្ដីពីព្រៃឈើគឺសហគមជនជាតិដើមប្រមេរមុននឹងដោះលែងជនល្មើសជាអ្នកកាប់ឈើនិងមធ្យោបាយល្មើសដូចជាគោយន្តត្រូវរាយការណ៍ជូននិងសុំយោបល់ពីលោកព្រះរាជអាជ្ញាអមសាលាដំបូងជាមុន។
លោកនាយខណ្ឌរដ្ឋបាលព្រៃឈើបានថ្លែងថាលោកមិនបានដឹងពីចំនួនឈើដែលប្រជាសហគមបង្ក្រាបរឹបអូសបាននោះទេប៉ុន្តែគាត់បានដឹងតាមរយះរបាយការណ៍របស់អាជ្ញាធរស្រុកត្បែងមានជ័យ។លោកថ្លែងសង្កត់ធ្ងន់ថាសកម្មភាពចុះទៅចាប់បទល្មើសព្រៃឈើប្រជាសហគមអាចធ្វើដូច្នេះបានប៉ុន្តែនៅពេលជួបបទល្មើសត្រូវរាយការណ៍មកកាន់សមត្ថកិច្ចជំនាញជាមុនសិនមិនត្រូវចាប់បទល្មើសដោយខ្លួនឯងនោះទេ។
លោកឧបមាថាថ្ងៃក្រោយពួកគាត់មានចេតនាចង់ទៅកាប់បំផ្លាញព្រៃឈើនៅទីនោះយកមករក្សាទុកដោយខ្លួនឯងអញ្ចឹងអាចយកលេសថាពួកគាត់មានគុណសម្បត្តិជាអ្នកចុះទៅបង្ក្រាបទប់ស្កាត់ទៅវិញ។មានគេរាយការណ៍មកកាន់គាត់ថាមានអង្គការមួយឈ្មោះអង្គការការពារបរិស្ថានជលផលនិងធនធានធម្មជាតិនៅក្នុងខេត្តព្រះវិហារជាអ្នកនៅពីក្រោយខ្នងនៃសកម្មភាពខាងលើ។
អ្នកសារព័ត៌មានមិនអាចជួបទំនាក់ទំនងសុំការបំភ្លឺពីតំណាងសហគមជនជាតិដើមប្រមេរបានទេថាតើមូលហេតុអ្វីបានជាប្រជាសហគមមួយនេះកេណ្ឌគ្នាចុះទៅបង្ក្រាបបទល្មើសព្រៃឈើទ្រង់ទ្រាយធំក្នុងព្រៃព្រះរការមិនចូលរួមសហការជាមួយអាជ្ញាធរមានសម្ថកិច្ច។ចង់ដឹងថាគាត់មានការទទួលខុសត្រូវដែរឬទេនៅពេលមានការបាត់បង់មធ្យោបាយល្មើសនិងវត្ថុតាងបទល្មើសព្រៃឈើធ្លាក់ទៅក្នុងដៃជនឆ្លៀតឱកាសក្នុងមូលដ្ឋាននោះ៕
