ខេត្តឧត្តរមានជ័យ៖ គ្រួសារសពនៃសមាជិកសមាគមអតីតយុទ្ធជនចំនួន៦៦គ្រួសារនៅខេត្តឧត្តរមានជ័យទទួលបានការបើកប្រាក់ឧបត្ថម្ភពីបេឡាសង្គ្រោះរបស់សមាគមអតីតយុទ្ធជន។ ពិធីឧបត្ថម្ភនេះធ្វើឡើងនៅក្នុងឱកាសដែល លោក នាយឧត្តមសេនីយ៍ គន់ គីម អនុប្រធាន និង
ជាអគ្គលេខាសមាគមអតីតយុទ្ធជនកម្ពុជា ចុះទៅប្រកាសសមាសភាពថ្នាក់ដឹកនាំសមាគមអតីតយុទ្ធជនខេត្តឧត្តរមានជ័យកាលពីព្រឹកវេលាម៉ោង៨និង២០នាទី ថ្ងៃទី២៧ ខែកញ្ញា ឆ្នាំ២០១៥ ។
មានប្រសាសន៍ក្នុងឱកាសនោះ លោកនាយឧត្តមសេនីយ៍គន់ គីម បានគូសបញ្ជាក់ថា ប្រាក់បេឡាមរណៈសង្គ្រោះនៃសមាគមអតីតយុទ្ធជនកម្ពុជាដែលត្រូវបើកជូននាពេលនេះ គឺអនុវត្តតាមលក្ខ័ន្តិកៈលេខ០០៤សអក ចុះថ្ងៃទី២០ ខែមិថុនា ឆ្នាំ២០១០ ដោយក្នុង មួយគ្រួសារទទួលបានប្រាក់ឧបត្ថម្ភចំនួន៤លានរៀល ។
សូមបញ្ជាក់ថា ការចុះបើកប្រាក់បេឡាមរណៈសង្គ្រោះនាពេលនេះ ត្រូវគេឃើញថា បានធ្វើឡើង ក្រោយពីមានការដាស់តឿនរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជានៅក្នុងឱកាសបិទមហាសន្និបាតទូទាំងប្រទេសលើកទី២របស់សមាគមអតីតយុទ្ធជនកម្ពុជា ថ្ងៃទី២ ខែកញ្ញា ឆ្នាំ២០១៥ ដោយនៅក្នុងឱកាសនោះសម្តេចបានបញ្ជាក់ថា ការបើកប្រាក់ឧបត្ថម្ភនេះ ត្រូវធ្វើមិនឲ្យហួសពីរដូវបុណ្យភ្ជុំបិណ្ឌខាងមុខនេះទេ ៕
