ខេត្តសៀមរាប៖ក្រុមអាជីវករប្រមាណ ជា៨០ភាគរយ ក្នុងចំណោមជាង១០០នាក់ ដែលលក់ដូរក្នុងផ្សារសសរស្តម្ភចាស់ បានលើកគ្នាតវ៉ា និងគំរោងសាងសង់សាលាមត្តេយ្យ និងជាគម្រោងរបស់ប្រធានផ្សារ គឺលោកមេឃុំសសរស្តម្ភ។
ហេតុការណ៏នោះ បានកើតឡើងនាព្រឹកថ្ងៃទី២៨ខែកញ្ញាឆ្នាំ២០១៥ នៅបរិវេណផ្សារ ភូមិនិងឃុំសសរស្តម្ភ ស្រុកពួកខេត្តសៀមរាប។
ក្រុមអាជីវករបាននិយាយថា ផ្សារសសរស្តម្ភដែលពួកគាត់លក់ដូររាល់ថ្ងៃនេះ គឺលក់តាំងពីឆ្នាំ១៩៧៩មកម្លេះ ដោយដីផ្សារនេះជារបស់រដ្ឋ។ នៅព្រឹកទី២៨ខែកញ្ញានេះនៅសុខៗអាជ្ញាធរឃុំ ស្រុក អមដោយសមត្ថកិច្ចចម្រុះ ស្រាប់តែមកលើកគំរោង សាងសង់សាលាមត្តេយ្យនៅលើទីតាំងផ្សារនេះទៅវិញ ហើយតម្រូវឲ្យពួកគាត់ចាកចេញ ពីផ្សារនេះទៅលក់លើផ្សារឯកជន ដែលជាផ្សាររបស់លោកមេឃុំទើបសាងសង់ថ្មី។ តាមពិតទីតាំងផ្សារនេះ វាពុំមែនជាទីតាំងដែលត្រូវសាងសង់ សាលា មត្តេយ្យនោះទេ ទីតាំងរបស់សាលាគឺមានរួចអស់ហើយ នៅក្នុងបរិវេណសាលាបឋមសិក្សាសសរស្តម្ភ តែវាជាលេសមួយឲ្យក្រុមអាជីវករ ចេញពីផ្សានេះទៅលក់នៅផ្សាររបស់លោកមេឃុំតែប៉ុណ្ណោះ។
លោកសៅ ឆុង អាជីវករលក់ស្បែកជើង បាននិយាយថា ពួកគាត់មិនចាកចេញពីផ្សារចាស់ទៅលក់នៅផ្សារឯកជនបានឡើយ ដោយសាផ្សារនោះនៅឆ្ងាយពីទីប្រជុំជន និងមិនអាចលក់ដាច់ដូចផ្សារចាស់ក្នុងទីប្រជុំជនឡើយ។ ជាក់ស្តែងកាលថ្ងៃទី១៥ខែកញ្ញាកន្លងទៅ ពួកគាត់បានចូលទៅលក់សាកល្បង៤ទៅ៥ថ្ងៃដែរ តែថ្ងៃណាក៏លក់មិនដាច់ មានពេលខ្លះក្នុង១ថ្ងៃលក់បានតែ២០០០រៀលក៏មាន។ ចំពោះអ្មកលក់អាហារពេលព្រឹកវិញ ថ្ងៃណាក៏យកមកចាក់ឲ្យជ្រូកស៊ីដែរ ព្រោះលក់សល់រាល់ថ្ងៃ ចឹងទេដាច់ខាតមិនអាចទៅផ្សារថ្មី ឯកជនឡើយ។
ក្រៅពីនោះ ក្រុមអាជីវករបានលើកឡើងថា ផ្សាររបស់រដ្ឋមានអាយុកាលតាំងពីឆ្នាំ១៩៧៩ គឺជាឆ្នាំងបាយប្រចាំថ្ងៃរបស់ពួកគាត់ ចុះបើសុខៗពួកគាត់ចាកចេញទៅកន្លែងផ្សេង ហើយមិនបានប៉ុន្មានក៏ស្រាប់តែដល់កុងត្រាឬដល់អណត្តិ។ ឬមួយមានថៅកែផ្សេងមកកាន់កាប់ ហើយទាមទារតម្រូវការណាមួយនោះ ពួកគាត់មិនត្រូវរងគ្រោះធំ ដែលចង់ទៅមុខទៅមិនរួច ចង់ត្រឡប់ក្រោយក៏ត្រឡប់មិនបានទៅហើយ ។
ចំណែកឯក្រុមអាជីវករ ដែលបានចូលទៅលក់នៅផ្សារថ្មីនោះ បាននិយាយថាទីតាំងផ្សារថ្មីនេះមានបរិស្ថានល្អ ហើយការលក់ដូរមិនចាំបាច់ទិញតូប ឬបង់ថ្លៃឈ្នួលដីប្រចាំឆ្នាំឡើយ ចឹងទេពួកគាត់ចង់ឲ្យអាជីវករទាំងអស់ចូលមកលក់ក្នុងផ្សារថ្មីទាំងអស់គ្នា ដើម្បីបានដំណើរការដោយរលូន។
ទាក់ទិនករណីនេះលោកគី ឡាយ មេឃុំ សសរស្តម្ភ បានអះអាងថា ដោយសាទីតាំងផ្សារចាស់ មានភាពតូចចង្អៀត បរិស្ថានមិនល្អ ម្យ៉ាងវិញទៀត មានដីមួយចំណែកបានជួលពីគេក្នុង១ឆ្នាំជិត៧លានរៀល ទើបរូបលោកសម្រេចសាងសង់ផ្សារថ្មីមួយទៀត ដែលមានទីតាំងធំទូលាយ សម្រាប់ផ្តល់ឲ្យពួកគាត់លក់ដូរ។ ផ្សារដែលសាងសង់ថ្មីនោះ មិនកំណត់ការលក់ដូរតូបនោះទេ សម្រាប់អាជីវករចាស់ គឺលក់តែសម្រាប់អាជីវករថ្មីប៉ុណ្ណោះ ។ លោកបន្តថា អាជីវករថ្មី ក្នុង១តូបដែលមានទំហ៊ុំ៣គុណ៤ម៉ែត្រ តម្លៃ២០០០ដុល្លារ ហើយបើអាជីវករចាស់ចង់ទិញផ្តាច់មុខក៏បានដែរ ក្នុងតម្លៃណាមួយដែលអាចនិយាយគ្នាបាន។ តែបើពួកគាត់មិនមានលុយទិញទេ គឺអាចលក់ដូរអស់មួយជីវិត គ្រាន់តែគាត់គ្មានសិទ្ធិ ក្នុងការផ្ទេរពីម្នាក់ទៅម្នាក់ប៉ុណ្ណោះ។
លោកមេឃុំបញ្ជាក់ថា តាមពិតក្រុមអាជីវករ៨០ភាគរយ បានចូលមកលក់នៅផ្សារថ្មីនេះម្តងរួចហើយ តែក្រោយពីមានការញុះញង់ពីជនមួយក្រុមតូច អាជីវករមួយចំនួនក៏វិលទៅលក់នៅផ្សារចាស់វិញ ហើយបែជានិយាយថា ផ្សារថ្មីលក់មិនដាច់។ តែលោកនៅតែអំពាវនាវ ឲ្យពួកគាត់ទៅលក់នៅផ្សារថ្មី ដែលមានលក្ខណស្តង់ដា មានបរិស្ថានល្អ រួចផុតពីការជួលដីគេ។
លោកភឿន សារុំ នាយកសាលាបឋមសិក្សាសសរស្តម្ភ បាននិយាយថា ដីដែលសម្រាប់សង់សាលាមត្តេយ្យ គឺមានរួចហើយនៅក្នុងបរិវេណសាលា ដែលមានជាង១ហិចតា គំរោងនេះ គឺត្រៀមសម្រាប់១៥០ឆ្នាំទៅមុខទៀត ពុំមែនតែត្រឹមបច្ចុប្បន្ននេះនោះទេ។ លោកបន្តថា តែបើមានការសាងសង់សាលាមត្តេយ្យ នៅក្នុងទីតាំងផ្សារនោះមែន ក្រុមលោកគ្រូអ្នកគ្រូ សិស្សានុសិស្ស ក៏មិនគាំទ្រឲ្យសាងសង់នោះដែរ។ ពីព្រោះទីតាំងថ្មីមិនមានសុវត្ថិភាព ដូចក្នុងសាលាឡើយ។
ជាមួយគ្នានោះលោកម៉ៅ វិសុទ្ធ អភិបាលស្រុកពួក បានមានប្រសាសន៏តាមទូរសព្ទ័ថា ពិតជាមានការលើកគំរោងសាងសង់សាលាមត្តេយ្យមែន តែដោយសាក្រុមអាជីវករធ្វើការតវ៉ា ក៏ផ្អាកទៅវិញ។ តាមពិតគំរោងនេះ គឺខាងសប្បុរសជនមួយចំនួន ជាអ្នកផ្តល់ជំនួយ ក្នុងការសាងសង់។ តែបើមានការជំទាស់ យើងក៏មិនធ្វើអ្វី ឲ្យប៉ះពាល់ដល់ពលរដ្ឋនោះដែរ។
លោកបញ្ជាក់ថា ចំពោះរឿងផ្សារថ្មីនោះ ក៏មិនអាចបង្ខំអាជីវករបានដែរ តែក្នុងនាមអាជ្ញាធរ លោកព្យាយាមដោះស្រាយ និងសម្របសម្រួលដល់ពួកគាត់ រហូតដល់ផ្លូវមួយដែលអាចដើរទៅបាន។ ជុំវិញបញ្ហាខាងលើនេះដែរ ក្រុមអាជីវករបាននិយាយថា មិនព្រមចេញពីផ្សារចាស់នេះជាដាច់ខាត ទោះត្រូវតវ៉ា ដល់ថ្នាក់ណាក៏ដោយ៕
ខេង ឧត្តម
