ព្រះវិហារ តាមសេចក្ដីរាយការណ៍បានអោយដឹងថាឈ្មួញមានឥទ្ធិពលម្នាក់ប្រើល្បិចជួលទីតាំងបន្ទាយយោធាវរសេនាតូចអន្តរាគមន៍លេខ៣៨៣បង្កប់រោងសិប្បកម្មកែច្នៃឈើប្រណីតខុសច្បាប់ខ្នាតធំមួយហើយអាជ្ញាធរនិងមន្ដ្រីជំនាញរដ្ឋបាលព្រៃឈើមូលដ្ឋានមិនចុះបង្ក្រាបសូម្បីតែអើតក្បាលមើលរោងសិប្បកម្មក៍មិនហ៊ានផង។ទីតាំងបទល្មើសស្ថិតនៅក្នុងឃុំស្រអែមស្រុកជាំក្សាន្ត។ភ្នាក់ងាររាយការណ៍ថាជាងឈើសុទ្ធតែជាជនជាតិវៀតណាមប្រមាណ១០នាក់កំពុងធ្វើកែច្នៃគ្រឿងសង្ហារឹមប្រើប្រាស់គ្រឿងយន្តម៉ាស៊ីនទាំងអស់។មានឈើប្រណីតជាច្រើនបានស្តុកទុកនៅទីនោះ។ប្រភពឈើប្រណីតប្រមូលទិញចូលពីចំណុចក្បាលដំរីដែលកាប់បំផ្លាញពីគម្របព្រៃឈើការពារWCSនៅស្រុកឆែបខេត្តព្រះវិហារ។
លោកជ័យរ៉េតនាយសង្កាត់រដ្ឋបាលព្រៃឈើកន្ទួតមានមូលដ្ឋាននៅស្រអែមបានអោយដឹងនៅព្រឹកថ្ងៃទី២៧កញ្ញា២០១៥ថាបើមានរោងសិប្បកម្មកែច្នៃឈើបង្កប់ក្នុងបន្ទាយយោធានោះមែនលោកមិនមានលទ្ធភាពចូលទៅត្រួតពិនិត្យនោះទេ។
លោកនាយសង្កាត់បានបញ្ជាក់ថាមានហាងបើកលក់គ្រឿងសង្ហារឹមធំ១កន្លែងនៅក្បែររង្វង់មូលស្រអែមបានទិញចូលគ្រឿងសង្ហារឹមខុសច្បាប់ពីទីនោះ។លោកអ៊ិតភូម្រានាយខណ្ឌរដ្ឋបាលព្រៃឈើព្រះវិហារបានអោយដឹងថាគាត់នឹងស្រាវជ្រាវអោយបានដឹងច្បាស់ជាមុនសិនដើម្បីឈានទៅបង្ក្រាបទប់ស្កាត់។
អ្នកសារព័ត៌មានមិនទាន់បានជួបលោកមេបញ្ជាការវរសេនាតូចអន្តរាគមន៍លេខ៣៨៣នៅទ្បើយទេដើម្បីសុំការបំភ្លឺពីគាត់អោយបានដឹងច្បាស់ថាពិតជាមានរឺមិនមានរោងសិប្បកម្មខាងលើដោយព្យាយាមស្រាវជ្រាវរកលេខទូរស័ព្ទរបស់គាត់មិនបាន។
គួរបញ្ចាក់ថារូបភាពដឹកជញ្ជូនផលអនុផលព្រៃឈើគ្រប់ប្រភេទការបើករោងសិប្បកម្មតូចធំកែច្នៃឈើមិនស្របច្បាប់ប្រមាណ៣០០ទីតាំងនៅទូទាំងខេត្តព្រះវិហារនិងហាងបើកលក់គ្រឿងសង្ហារឹមគេចពន្ធទាំងអស់សុទ្ធតែជាកត្តាអាក្រក់ឈានទៅបំផ្លាញគម្របព្រៃឈើបៃតងដែលរដ្ឋហាមឃាត់ហើយឈានទៅវិនាសព្រៃឈើដោយស្វ័យប្រវត្តិ។ការបាត់បង់គម្របព្រៃឈើបៃតងដោយកត្តាមនុស្សមួយក្តាប់តូចកាប់បំផ្លាញអោយសាបសូន្យនោះវានឹងនាំមកនូវគ្រោះរាំងស្ងួតនិងកើនទ្បើងកំដៅប៉ះពាល់អាយុជីវិតមនុស្សនិងរុក្ខជាតិគួរអោយព្រួយបារម្ភនាពេលបច្ចប្បន្ននេះ៕
