មណ្ឌលគិរី៖កម្លាំងអាវុធហត្ថលើផ្ទៃប្រទេសសហការជាមួយឌឺបេយោធាខេត្ត ស្ទាក់ចាប់បានរថយន្តដឹកឈើប្រណិតមួយគ្រឿង ដែលបានដឹកជញ្ជូនលើកំណាត់ផ្លូវជាតិលេខ៧៦ ត្រង់ចំនុចមុខសាលាបឋមសិក្សាឆ្នែង។ករណីនេះកើតឡើងនៅវេលាម៉ោង១២ថ្ងៃត្រង់ ថ្ងៃទី១ ឧសភា
២០១៤ ក្នុងភូមិឆ្នែក ឃុំស្រែខ្ទុម ស្រុកកែវសីមា។
សមត្ថកិច្ចបានឲ្យដឹងថា រថយន្តដឹកឈើល្មើសច្បាប់ខាងលើបាន ធ្វើដំណើរចេញពីស្រុកអូររាំងទិសដៅទៅខេត្តក្រចេះ យមានផ្ទុកឈើប្រណិតប្រភេទធ្នង់ពេញប្រៀប។សមត្ថកិច្ចបន្តថា លុះរថយន្តនោះធ្វើដំណើរមកចំនុចមុខសាលារៀន សមត្ថកិច្ចចម្រុះក៏ស្ទាក់ចាប់បាន ភ្លាមៗនោះគេឃើញតៃកុងរថយន្តនឹងព្រូ បានបើកទ្វាររត់គេចចូលក្នុងព្រៃចម្ការចន្ឋីបាត់ស្រមោល។រថយន្តម៉ាកកាមរីគូថស្វិតពណ៏ក្រហម ពាក់ស្លាកលេខ ថ០៤៣៧ ភព២ រួមនឹងឈើប្រណិត ត្រូវបានប្រគល់ឲ្យទៅជំនាញរដ្ឋបាលព្រៃឈើកែវសីមាចាត់ការបន្ត។
ការចរាចរណ៏ឈើប្រណិតចេញពីដែនអភិរក្សជីវចម្រុះសីមា ត្រូវបានប្រជាពលរដ្ឋរាយការណ៏ថា កើតមានយ៉ាងពេញបន្ទុកបំផុត ខណៈសមត្ថកិច្ចគ្រប់ស្ថាប័នកំពុងសង្ងំដេកបើកភ្នែកទាំងថ្ងៃ។ ជាងនេះទៀតសោតរាល់សកម្មភាព ដឹកជញ្ជូនឈើប្រណិតទាំងនោះ គឺពុំមានរំលងភ្នែករបស់ក្រុមសមត្ថកិច្ចឡើយ ជាពិសេស មន្ត្រីរដ្ឋបាលព្រៃឈើប្រចាំនៅអភិរក្សជីវចម្រុះសីមាដែលមានលោកគង់ ពុតធារ៉ា ជាមន្ត្រីរដ្ឋបាលព្រៃឈើនឹងជាអនុប្រធានគម្រោងកម្មវិធីរបស់អង្កការWWS ព្រមទាំងលោក វ៉ាត ជាប្រធានក្រុមល្បាតកងរាជអាវុធហត្ថប្រចាំនៅអភិរក្សជីវៈចម្រុះសីមា។ប្រភពបានបន្តថា គ្រប់សកម្មភាពរកស៊ីបទល្មើសឈើប្រណិតទាំងនោះ បើឈ្មួញមិនរត់ការបង់ប្រាក់ជាមុន ជាមួយមន្ត្រីជំនាញទេ ច្បាស់ជាពុំដំណើរការបានរលូនឡើយ ប្រាដកជាចាប់បង្ក្រាបជាក់ជាមិនខាន។
ក្រុមអ្នកតាមដានបទល្មើសព្រៃឈើបាននិយាយថា ជារៀងរាល់ថ្ងៃគ្រប់ពេលមិនថាយប់ឬថ្ងៃ គេតែងសង្កេតឃើញរថយន្តប្រភេទកាមរីគូថស្វិម-ហើម ជាពិសេសម៉ាកឡង់គ្រីស័រ បានដឹកឈើបន្តកន្ទុយគ្នារដឹក យកទៅលក់តាមបណ្តារ ច្រករបៀងនានាមានដូចជា ច្រកង៉ាំដី ច្រកង៉ាំបាវ៉េ ច្រកង៉ាំបាឡាង ច្រកសេបា នឹង មួយចំនួនទៀតដឹកចេញតាមច្រកទ្វារអន្តរជាតិឡាប៉ាខេតែម្តង។ចំនែកការដឹកជញ្ជូនឆ្លងដែនបែបនេះ សមត្ថ ពិតជាបានសើមមាត់មិនតិចទេ។បើមិនបង់ប្រាក់គេមិនអនុញ្ញាតឲ្យឆ្លងដែនបានដាច់ខាត។ប្រជាពលរដ្ឋបាន សំនូមពរដល់លោកកែប កត់ នាយខណ្ឌរដ្ឋបាលព្រៃឈើមណ្ឌលគិរី មេត្តាជួយក្រើនរំលឹកដល់មន្ត្រីក្រោមឱវ៉ាតផង ព្រោះថាបទល្មើសព្រៃឈើនៅក្នុងស្រុកកែវសីមា ដែលមានលោករឿង សុផាត ជានាយផ្នែករដ្ឋបាលព្រៃឈើកែវសីមានោះ បានកើតមានពេញបន្ទុកហើយ បើពុំមានការទប់ស្កាត់ទាន់ពេលទេ ច្បាស់ជាហិនហោចអស់ជាមិនខាននៅព្រៃឈើប្រណិតដ៏កម្រទាំងនោះ៕
