ខេត្តបន្ទាយមានជ័យ ថ្មីៗនេះមានប្រជាពលរដ្ឋជិត១០០គ្រួសារបានដាក់ពាក្យបណ្តឹងទៅអាជ្ញាធរដែនដីអំពីលោកឆើយ ចាន់ណា ប្រធានមន្ទីរអប់រំយុវជននិងកីឡាខេត្តបន្ទាយមានជ័យបានកាយដីតំបន់អូរម្កាក់យកធ្វើជាកម្មសិទ្ធិដែលរំលោភលើដីដែនអភិរក្សត្រីពង និងកន្លែងរកស៊ីចិញ្ចឹមជីវិតរបស់ពួកគាត់។លោកឃុត ប៉ូឡូ ប្រធានភូមិកន្ទួត និងជាតំណាងប្រជាពលរដ្ឋទាំង១០០គ្រួសារនោះបានប្រាប់ថា ប្រជាពលរដ្ឋប្រមាណជិត១០០គ្រួសារ បានផ្ទិតមេដៃប្តឹងលោក ឆើយ ចាន់ណាថាបានជីកនិងកាយដី តំបន់អូរម្កាក់ ស្ថិតនៅភូមិកន្ទួត សង្កាត់ភ្នៀត ក្រុងសិរីសោភ័ណ ខេត្តបន្ទាយមានជ័យ។ ប្រជាពលរដ្ឋបានប្តឹងពីបទជីកដីអូរម្កាក់
ជម្រៅជិត១០ម៉ែត្រ ទទឹងអូរជិត១០០ម៉ែត្របណ្តោយជាង៥០០ម៉ែត្រ យកធ្វើជាកម្មសិទ្ធិនូវដែនជម្រក អភិរក្សត្រីពង និងដីសាធារណៈ ដែលជាកន្លែងរកត្រីចិញ្ចឹមជីវិតសម្រាប់ប្រជាពលរដ្ឋក្នុងសង្កាត់ភ្នៀតនៃក្រុងសិរីសោភ័ណនេះ។ មន្ត្រីនាយសង្កាត់រដ្ឋបាលសិរីសោភ័ណបានប្រាប់ថា ក្រោយពេលទទួលពាក្យបណ្តឹងពីប្រជាពលរដ្ឋជិត១០០គ្រួសាររួចមក លោកបានឲ្យមន្ត្រីជំនាញចុះទៅ
ពិនិត្យការជីកដីអូរម្កាក់ធ្វើជាកម្មសិទ្ធិខុសច្បាប់នេះហើយគឺមន្ត្រីជំនាញនឹងរាយការណ៍ជូនអភិបាលខេត្ត និងក្រសួងដើម្បីមានវិធានការ។លោក ឆើយ ចាន់ណា ប្រធានមន្ទីអប់រំយុវជននិងកីឡាខេត្តបន្ទាយមានជ័យបានប្រាប់អ្នកយកព៌ត័មានឲ្យដឹងថាដីអូរម្កាក់ដែលលោកជីកនោះគឺលោកបានសុំច្បាប់ពីមន្ទីរធនធានទឹកនិងឧតុនិយមខេត្ត និងអភិបាលខេត្តត្រឹមត្រូវ
ហើយដើម្បីស្នើសុំស្តារជីកយកដីអូរម្កាក់ ដែលស្ថានភាពគោករាក់។លោកយឹមប៊ុនរ៉ុមប្រធានមន្ទីរធនធានទឹក និងឧតុនិយមខេត្តបានប្រាប់ថា ការកាយដីអូរនោះ ប្រហែលជាមានច្បាប់ស្តារអូរដែលគោករាក់នោះមែនតែដល់ពេលស្តារគឺស្តារយកដីអូរយកធ្វើជាកម្មសិទ្ធតែម្តងមន្ទីររបស់លោកមិនអាចទទួលយកបានឡើយក្នុងការជីកដីធ្វើកម្មសិទ្ធនេះ៕
