ភ្នំពេញៈ សមត្ថកិច្ចនគរបាលប្រឆាំងការជួញដូរមនុស្សនិងការពារអនីតិជនរាជធានីភ្នំពេញ កាលពីព្រឹកថ្ងៃទី៣០ ខែមេសា បានបញ្ជូនថៅកែហាងកាហ្វេម្នាក់មក អយ្យការអម សាលាដំបូង រាជធានីភ្នំពេញ ដើម្បីសាកសួរពីករណីបើកហាងកាហ្វេលួចលាក់បង្កប់ បម្រើសេវាកម្មផ្លូវភេទ។
ស្ត្រីសង្ស័យមានឈ្មោះ អ៊ុំ សុផល អាយុ ៥៦ឆ្នាំ ត្រូវបានសមត្ថកិច្ចឃាត់ខ្លួន កាលពី រសៀលថ្ងៃទី២៨ ខែមេសា នៅតាមបណ្តោយផ្លូវ ៥៩៨ សង្កាត់បឹងកក់ទី២ ខណ្ឌទួលគោក ដោយរំដោះបាននារីបម្រើផ្លូវភេទចំនួន៤នាក់ ។ ស្ត្រីរកស៊ីផ្លូវភេទទាំងនេះ មានឈ្មោះ លី ដា អាយុ ២៩ឆ្នាំ សុខ ស្រីនួន អាយុ ២៨ឆ្នាំ សុខ ស្រីនាថ អាយុ ២៨ឆ្នាំ និង ហ៊ុន ស្រីណុចអាយុ២៨ឆ្នាំ។
ពាក់ព័ន្ឋបញ្ហានេះ លោក កែវ ធា នាយការិយាល័យប្រឆាំងការជួញដូរមនុស្ស និងការពារអនីតិជនរាជធានីភ្នំពេញឲ្យដឹងថា «យើងបានចំណាយពេលជាង ១ ខែ ក្នុងការស៊ើបអង្កេតមុននឹងបើកប្រតិបត្តិការបង្ក្រាបហាងលក់កាហ្វេមានសេវាបម្រើផ្លូវភេទនេះពីរសៀលថ្ងៃទី២៨ មេសា។
លោកបន្តថា ក្រៅពីឃាត់ខ្លួនស្ត្រីម្ចាស់ហាង សមត្ថកិច្ចបានឆែករកឃើញស្រោមអនាម័យដែលប្រើរួចនិងមិនទាន់ប្រើមួយចំនួន នៅក្នុងបន្ទប់នារីរកស៊ីផ្លូវភេទទាំង ៤នាក់ នោះ ។
ទោះបីយ៉ាងណា រហូតមកទល់រសៀលថ្ងៃទី៣០ ខែមេសា តុលាការពុំទាន់សម្រេចយ៉ាងណា នៅឡើយទេ ៕
