នៅមុខផ្សារឆ្នាំង ក្រោយលោកអភិបាលខេត្តព្រមានដកមន្ត្រីអសកម្មការងារចោល
ខេត្តកំពង់ឆ្នាំង៖ ក្រោយពីមានការព្រមានរបស់លោកអភិបាលខេត្ត នៅចុងសប្តាហ៍មុននេះក្នុងកិច្ចប្រជុំមួយ ថានឹងដកនាយនគរបាលសណ្តាប់ធ្នាប់ខេត្ត និងមន្ត្រីអសកម្មទាំងឡាយ ដែលអសកម្មមិនធ្វើការ ដែលបណ្តោយអោយមានភាពឥតសណ្តាប់ធ្នាប់ក្នុងការលក់ដូរលើចិញ្ចើមផ្លូវសាធារណៈ បាត់បង់សោភ័ណភាព និងស្ទះចរាចរណ៍។ នៅព្រឹកថ្ងៃទី៣០ ខែកញ្ញា ឆ្នាំ២០១៥នេះ អាជ្ញាធរក្រុងកំពង់ឆ្នាំងបានដឹកនាំសមត្ថកិច្ចចំរុះមានកងរាជអាវុធហត្ថក្រុងកំពង់ឆ្នាំង និងសមត្ថកិច្ចនគរបាលសណ្តាប់ធ្នាប់ខេត្ត បានចុះទៅបោះខ្សែកំណត់ព្រុំចិញ្ចើមផ្លូវអោយអាជីវករលក់ មិនអោយដាក់ឥវ៉ាន់លក់ដូរលានមកលើផ្លូវកៅស៊ូជាបន្តទៀត នៅមុខផ្សារឆ្នាំង សង្កាត់ផ្សារឆ្នាំង ក្រុងកំពង់ឆ្នាំង។
លោក បេ សារុំ អភិបាលរងក្រុងកំពង់ឆ្នាំងបានអោយដឹងថា៖ការចុះបោះព្រុំកំណត់អោយអាជីវករលក់ដូរនេះ គឺមានបំណងអោយអាជីវករទាំងអស់ចូលរួមគោរពច្បាប់ និងគោលការណ៍របស់អាជ្ញាធរខេត្តនិងក្រុង ក្នុងការរៀបចំអោយមានសណ្តាប់ធ្នាប់ និងសោភ័ណភាព បញ្ជៀសបាននូវការកកស្ទះចរាចរណ៍ ដែលបណ្តាលមកពីការលក់ដូរលានលយមកលើផ្លូវថ្នល់។
នៅក្នុងការកំណត់ព្រុំនេះ គឺអាជ្ញាធរក្រុងកំពង់ឆ្នាំងបានកំណត់វាស់ពីអ័ក្សផ្លូវប្រវែង៥ម៉ែត្រ ទើបអនុញាតអោយអាជីវករដាក់ឥវ៉ាន់លក់ដូរបាន និងហាមមិនអោយលក់លានលយចូលលើផ្លូវថ្នល់ទៀតឡើយ។ ក្រោយពីការណែនាំ និងបោះព្រុំកំណត់រួចហើយ បើសិនជាមានអាជីវករណានៅតែបំពានយកផ្លូវសាធារណៈមកដាក់តាំងឥវ៉ាន់លក់ដូរទៀតនោះ អាជ្ញាធរក្រុងនឹងអនុវត្តតាមផ្លូវច្បាប់ គឺចាប់ធ្វើការផាកពិន័យអោយតឹងរ៉ឹងតែម្តង ព្រោះអាជីវករទាំងអស់បានផ្តិតមេដៃក្នុងកិច្ចសន្យាយល់ព្រមតាមគំរោងរបស់អាជ្ញាធរក្រុងនិងខេត្តរួចហើយក្នុងការកំណត់រៀបចំនេះ។
ដោយឡែកអាជីវករមួយចំនួនដែលបានទិញដីសង់តូបលក់ដូរជួរដើមស្រល់ជាប់ចិញ្ចើមផ្លូវនៅមុខផ្សារឆ្នាំងបានអោយដឹងថា៖ពួកគាត់បានទិញដីធ្វើតូបលក់ដូរពីអាជ្ញាធរក្រុង គឺក្នុងក្បាលដី១ម៉ែត្រមានតម្លៃ៥ម៉ឺនរៀលក្នុង១ឆ្នាំដែលតូប១ៗមានក្បាលដីពី៣ទៅ៤ម៉ែត្រ ក្នុងនោះដែរពួកគាត់ត្រូវបង់ភាស៊ីមួយពាន់រៀលប្រចាំថ្ងៃទៀត។ ចំណែកឡែកប្រជាកសិករ និងប្រជានេសាទដែលមានត្រីសាច់ បន្លែបង្ការដាក់កញ្ច្រែងលក់បន្តិចបន្តួច ក៍ត្រូវបង់ភាស៊ីក្នុងថ្ងៃមួយពាន់រៀលផងដែរ។
ប្រជាពលរដ្ឋនៅក្នុងក្រុងកំពង់ឆ្នាំងបានអោយដឹងថា៖ ការលក់ដូរអនាធិបតេយ្យតាមចិញ្ចើមផ្លូវចាប់ពីមុខវត្តយាយទេពរហូតដល់ទំនប់បារាំង គឺមានការបើកដៃពីអ្នកម៉ៅការភាស៊ីផ្សារឆ្នាំង អាជ្ញាធរ និងសមត្ថកិច្ចជំនាញពាក់ព័ន្ធមួយចំនួន ទើបធ្វើអោយបាត់បង់សណ្តាប់ធ្នាប់ សោភ័ណភាពនិងកកស្ទះចរាចរណ៍រៀងរាល់ថ្ងៃ ហើយក៏មានភាពអសកម្មមិនអាចដោះស្រាយបាន។
បញ្ហានេះប្រជាពលរដ្ឋសំណូមពរដល់លោកអភិបាលខេត្តកំពង់ឆ្នាំង មេត្តាជួយដាក់វិធានការណ៍ដល់សមត្ថកិច្ច និងអាជ្ញាធរក្រុងកំពង់ឆ្នាំងអោយបានម៉ឺងម៉ាត់ ទើបការរៀបចំទីតាំងខាងលើមានប្រសិទ្ធភាព កុំចេះតែថាតែមិនហា់នធ្វើ ដូចពាក្យចាស់និយាយថា « កោកៗសឹកតែមាត់ត្រដោក
ឆ្អែតតែពោះក្របី , រទេះចេះតែបរ ឆ្កែចេះតែព្រុស មនុស្សចេះតែដើរ » គឺពិតជាយ៉ាប់ហើយ៕
