ខេត្តកំពង់ឆ្នាំង ៖ កុមារាអាយុ៤ឆ្នាំម្នាក់ បានពុលដំឡូមីស្លាប់ បង្ករអោយមានការភ្ញាក់ផ្អើល ក្រោយពេលឪពុកខ្លួនដុតអោយហូបពេលត្រឡប់មកពីច្រូតស្មៅអោយគោ។ករណីនេះបានកើតឡើង ម៉ោង០០និង៣០នាទីរំលងអាធ្រាតុ ឈានចូលថ្ងៃទី០១ខែតុលា ឆ្នាំ២០១៥ នៅលំនៅដ្ឋានរបស់ខ្លួនស្ថិតក្នុង ភូមិស្រែព្រិច ឃុំអភិវឌ្ឍន៏ ស្រុកទឹកផុស ។
លោក ខែម វិបុល អធិការនគរបាលស្រុកទឹកផុសបាននិយាយប្រាប់អ្នកសារពត័មានយើងថា៖ កុមាររងគ្រោះនេះមានឈ្មោះ ហេង ស្រៀង អាយុ៤ឆ្នាំ ចំណែកឪពុកមានឈ្មោះ ផ្លុង ស្រេម អាយុ៣៥ឆ្នាំ ។
មុនពេលកើតហេតុ នៅវេលាម៉ោងជាង៣រសៀល ពីរនាក់ឪពុកនិងកូនប្រុសបានទៅច្រូតស្មៅអោយគោ នៅចំណុចបឹងវែង ជាប់កន្លែងចំការដាំដំឡូមីរបស់ក្រុមហ៊ុនចិន ស្ថិតក្នុង ភូមិគោកពួច ឃុំតាំងក្រសាំង ស្រុកទឹកផុស ។ ពេលច្រ នៅពេលច្រូតស្មៅនោះឪពុកបានដកមើមដំឡូងមី២ដុំ យកមកផ្ទះហើយបានដុតដំឡូងមីនោះអោយ កូនប្រុសអាយុ៤ឆ្នាំនោះហូប ។ ក្រោយពេលហូបហើយ ឪពុកបានឃើញកូនមានអាការៈមិនស្រួលខ្លួនដែរ តែមិនបានចាប់អារម្មណ៏ ហើយក៏នាំគ្នាសម្ងំដេកទៅ លុះម៉ោងជាង១២រំលងអាធ្រាតុ ទើបដឹងថា កូនប្រុសបានស្លាប់ បាត់ទៅហើយ ។
សមត្ថកិច្ចនៅមូលដ្ឋានបានពិនិត្តសពកុមារារងគ្រោះ និងបានដឹងថាកុមាររូបនេះពុលដំឡូងមីទើបបណ្តាលអោយស្លាប់។ប្រជាពលរដ្ឋនៅជិតខាងបានធ្វើការស្តីបន្ទោសឪពុកម្នាក់នោះជាខ្លាំង ព្រោះមួយស្រុកអ្នកណាក៏គេដឹងដែរថា ដំឡូងមីដែលចិនដាំនោះជាដំឡូងពុលដែរគ្មានអ្នកណាហ៊ានហូបវាឡើយ។ សពកុមាររងគ្រោះត្រូវបានអ្នកស្រុកក្នុងភូមិនាំគ្នាជួយចាត់ចែងធ្វើបុណ្យតាមប្រពៃណី ក្នុងការសោកស្តាយយ៉ាងខ្លាំង៕
