ខេត្តកំពង់ឆ្នាំង៖ នៅស្នងការដ្ឋាននគរបាលខេត្តកំពង់ឆ្នាំង កាលពីរសៀលថ្ងៃទី០៥ ខែតុលា ឆ្នាំង២០១៥មានពិធីប្រគល់ទទួលអំណោយជាសម្ភារៈ សម្រាប់ការងារបង្ក្រាបនិងគ្រប់គ្រងបទល្មើសជារបស់ជំនួយនគរបាលសហព័ន្ធប្រទេសអូស្ត្រាលី ដែលមានការចូលរូមពីលោកស្នងការ ស្នងការរង និងតំណាងស្ថានទូតប្រទេសអូស្ត្រាលីជាម្ចាស់ជំនួយផងដែរ។
លោក ឧត្តមសេនីយត្រី ប្រាក់ វុឌ្ឍី ស្នងការនគរបាលខេត្តបានមានប្រសាសន៏ថា៖អំណោយរបស់នគរបាលសហព័ន្ធប្រទេសអូស្ត្រាលី ដែលនាំផ្តល់ជូនដោយតំណាងស្ថានទូតប្រទេសអូស្ត្រាលី ជូនស្នងការដ្ឋាននគរបាលខេត្តកំពង់ឆ្នាំងនៅថ្ងៃនេះមាន ម៉ាស៊ីនថតម៉ាក កាណុង១គ្រឿង ម៉ាស៊ីនថតវីឌីអូម៉ាកសូនី១គ្រឿង ម៉ាស៊ីនថតសម្លេងឌីជីថល ១គ្រឿង ម៉ាស៊ីនព្រីនធ័រ១គ្រឿង កែវយឹត១គ្រឿង រួមនិង ឌីស មីម៉ូរី ជាច្រើនទៀត។អំណោយ របស់នគរបាលប្រទេសអូស្ត្រាលីនៅពេលនេះ គឺសម្រាប់ប្រើប្រាស់ដោយផ្តោតជាសំខាន់ លើការបំរើអោយការបង្ក្រាបបទល្មើសព្រហ្មទ័ណ្ឌ បទល្មើសនៃការជួញដូរមនុស្ស និងបទល្មើ សគ្រឿងញៀន។
លោកស្នងការខេត្តបានបន្តថា៖ កន្លងមកនគរបាលប្រទេសអូស្ត្រាលី ធ្លាប់បានជួយសម្ភារៈជាច្រើនមកស្នងការដ្ឋាននគរបាលខេត្តកំពង់ឆ្នាំងជាបន្តបន្ទាប់ គឺចាប់តាំងពីឆ្នាំ១៩៩៧ មកម្លេះ ក្នុងមាន អាគារការិយាល័យព្រហ្មទ័ណ្ឌ អាគារការិយាល័យប្រឆាំងការជួញដូរមនុស្ស បន្ទប់ឃុំខ្លូន បន្ទប់សួរចម្លើយជនរងគ្រោះជាអានីតិជន ទូរទស្សន៏ កាមេរ៉ា ម៉ាសីនថត ម៉ាស៊ីនព្រីន ជាដើម ហើយក្នុងពេលខាងមុខនេះនឹងផ្តល់ម៉ាស៊ីនធ្វើតេស ដែលបំរើអោយក្នុងករណីរំលោភទៀតផង។
លោកស្នងការនគរបាលខេត្ត សូមថ្លែងអំណរគុណដល់ប្រទេសអូស្ត្រាលី នគរបាលអូស្ត្រាលី និងប្រជាពលរដ្ឋអូស្ត្រាលី ដែលតែងបានជួយឧបត្ថម្ភសម្ភារៈដល់នគរបាលកម្ពុជាជាបន្តបន្ទាប់។ដើម្បីជាការឆ្លើយតបជំនួយសប្បុរធម៌របស់ប្រទេសអូស្ត្រាលីនៅពេលនេះ លោកបានសន្យាថា នឹងយកសម្ភារៈដែលជាជំនួយ ទាំងនេះទៅប្រើប្រាស់ការងារ អោយបានចំទិសដៅដើម្បីរក្សាសណ្តាប់ធ្នាប់ សន្តិសុខជូន
ប្រជាពលរដ្ឋនិងសង្គមជាតិ៕
