ខេត្តឧត្តរមានជ័យ៖ អធិការនគរបាលស្រុកត្រពាំងប្រាសាទ លោកវរសេនីយ៍ត្រី អ៊ិន កាយ បានឱ្យដឹងនៅព្រឹកថ្ងៃទី៧ ខែតុលា នេះថា ករណីចោរគាស់ ចូលប្លន់យកលុយអស់ជាង ១០លានរៀល នៅក្នុងផ្សារទំនប់ដាច់ ស្រុកត្រពាំងប្រាសាទ កាលពីយប់មិញ គឺជាករណីផ្សេងទៅវិញ មិនមែន
ជារឿងករណីប្លន់នោះឡើយ។សមត្ថកិច្ចនគរបាលស្រុក បាននិយាយថា នៅកន្លែងកើតហេតុ វាខុសប្រក់ក្រតី ពីរឿងចោរគាស់ផ្ទះ ប្លន់យកលុយ ដែលកើតឡើង កាលពីវេលាម៉ោង ១២យប់ ថ្ងៃទី៦ ខែតុលា ឆ្នាំ២០១៥ នៅក្បែរផ្សារទំនប់ដាច់ ស្ថិតនៅក្នុងភូមិជ័យនិវត្តន៍ ឃុំទំនប់ដាច់ ស្រុកត្រពាំងប្រាសាទ ខេត្តឧត្តរមានជ័យ នៅក្នុងផ្ទះប្តីប្រពន្ធ ២នាក់ ឈ្មោះ អៀត វ៉ាន់ធី អាយុ ២៨ឆ្នាំ និងប្រពន្ធឈ្មោះ សុខ បញ្ញា មានមុខរបរលក់អីវ៉ាន់ចាបហួយ លក់សាំង លក់ទូរស័ព្ទ និងលក់កាត់ទូរស័ព្ទ។បើតាមការរៀបរាប់ពីម្ចាស់ផ្ទះឈ្មោះ អៀត វ៉ាន់ធី និងប្រពន្ធ សុខ បញ្ញា បាននិយាយថា ពួកគាត់កំពុងតែដេកក្នុងផ្ទះ ក្រុមចោរមានគ្នាចំនួន ៤នាក់ មានទាំងកាំភ្លើងខ្លី ១ដើម បានគាស់ជញ្ជាំងស័ង្ហសីផ្ទះ ចូលទៅក្នុងផ្ទះភ្ជង់ពួកគាត់កំពុងដេក ប្លន់យកលុយដែលដាក់នៅលើតុអស់
ជាង១០លានរៀល មាសកងដៃ ១វង្ស ចញ្ចៀន១វង្ស និងកាតបញ្ចូលទូរស័ព្ទដៃ ចំនួន ១ពាន់ដុល្លាទៀត។សមត្ថកិច្ចនគរបាលបានឱ្យដឹងថា តាមការស្រាវជ្រាវ នៅក្បែរទីតាំងផ្ទះ នៅកន្លែងកើតហេតុ គឺមានផ្ទះប្រជាពលរដ្ឋនៅជាប់គ្នាជាច្រើនផ្ទះ ហើយសុទ្ធតែជាផ្ទះបាំងជញ្ជាំងស័ង្ហសី និងស្ថិតនៅក្បែរប៉ុស្តិ៍រដ្ឋបាលឃុំទំនប់ដាច់ ដែលមានមនុស្សអ៊ូអរច្រើន ហើយនៅពេលមានសកម្មភាពគាស់ផ្ទះ គឺលឺភ្ញាក់ដល់ប្រជាពលរដ្ឋនៅក្បែរទីតាំងកើតហេតុ ហើយជញ្ជាំងដែលថា ចោរគាស់ចូលមានស្ថានភាពចតូចង្អៀតទៀត។សមត្ថកិច្ចបានបញ្ជាក់ទៀតថា ផ្ទះកើតហេតុ តាមការរៀបរាប់ពីអ្នកជិតខាង កន្លងម្ចាស់ផ្ទះតែងតែបាត់លុយ ឬ សំភារៈផ្សេងៗជាញឹកញាប់ ព្រោះមានក្មេងលួចរុកចូល តាមជញ្ជាំងស័ង្ហសីគាស់ផ្ទះនោះ ចូលទៅលួចសំភារៈក្នុង ៣ ទៅ ៤លើកមកហើយ នៅតាមច្រើករុកចូលជញ្ជាំងផ្ទះនោះ៕ 
