ព្រះវិហារ តាមសេចក្ដីរាយការណ៍បានអោយដឹងថាល្បែងស៊ីសងគ្រប់ប្រភេទរួមមានបៀអាប៉ោងនិងឆ្នោតកន្ទុយលេខកំពុងញាំញីទីប្រជុំជនស្រយង់ស្រុកគូលែននិងក្លាយទៅជារឿងសាមញ្ញទៅហើយព្រោះមិនឃើញអស់លោកសមត្ថកិច្ចចុះទៅបង្ក្រាបទប់ស្កាត់ និងលុបបំបាត់នោះទ្បើយ។
ភ្នាក់ងារបានអោយដឹងនៅព្រឹកថ្ងៃទី០៨តុលា២០១៥ថានៅក្នុងឃុំស្រយង់ទាំងមូលកើតល្បែងស៊ីសងខុសច្បាប់ច្រើនកន្លែងធ្វើអោយពលរដ្ឋក្នុងមូលដ្ឋានមានការព្រួយបារម្ភពីសន្តិសុខអាចនឹងកើតមានទ្បើងនូវចោរកម្មដោយសារមានអ្នកចាញ់ល្បែងស៊ីសង។មកដល់ពេលនេះសកម្មភាពសមត្ថកិច្ចគ្រប់ស្ថាប័នមិនកម្រើកអ្វីសោះហាក់ដូចជាត្រូវរ៉ូវគ្នាជាមួយមេល្បែងស៊ីសងដោយសង្ស័យថាអាជ្ញាធរមានសមត្ថកិច្ចអាចទទួលបានលុយឧបត្ថម្ភប្រចាំខែច្រើនលានរៀលពីវង់ល្បែងខុសច្បាប់ទាំងនោះ។
ជាក់ស្ដែងមេល្បែងស៊ីសងវង់អាប៉ោងដុះស្លែ១កន្លែងមិនស្គាល់អត្តសញ្ញាណកំពុងបើកលេងកំដរបងប្អូនប្រជាពលរដ្ឋក្នុងមូលដ្ឋានទាំងយប់ទាំងថ្ងៃយ៉ាងរលូនដោយគ្មានការរំខានពីសមត្ថកិច្ចនោះទ្បើយគឺមានទីតាំងស្ថិតនៅក្នុងភូមិស្រយង់ត្បូងឃុំស្រយង់ស្រុកគូលែនខេត្តព្រះវិហារ។ភាគច្រើនវង់អាប៉ោងដុះស្លែ១នេះបើកលេងទល់ភ្លឺតែម្ដង។ពលរដ្ឋនិយាយថាក្រៅពីល្បែងស៊ីសងគឺនៅទូទាំងឃុំស្រយង់ក៍កើតមានបទល្មើសសេពនិងជួញដូរគ្រឿងញៀនគួរអោយកត់សម្គាល់។
គួរបញ្ជាក់ថាសមត្ថកិច្ចតែងតែលាក់លៀមមិនផ្តល់ព័ត៌មានពីទីតាំងលេងល្បែងស៊ីសងនិងអត្តសញ្ញាណមេល្បែងអោយអ្នកសារព័ត៌មានប្រចាំខេត្តព្រះវិហារបានដឹងប្រាកដនោះទេព្រោះវាជាឆ្នាំងបាយដ៍ឆ្ងាញ់ជួយចិញ្ចឹមខ្លួនអោយមានចំណូលសេដ្ឋកិច្ចលូតលាស់ធំធាត់បើទោះបីអស់លោកសមត្ថកិច្ចខ្លួនឯងដឹងថាល្បែងស៊ីសងជាសត្រូវជាមួយគោលនយោបាយភូមិឃុំមានសុវត្ថិភាពរបស់រាជរដ្ឋាភិបាលក៍ដោយ៕
