(ខេត្តព្រៃវែង) គួរអោយហួសចិត្តនៅពេលស្តាប់សំដីលោកអភិបាលស្រុកពាមរក៍ដែលគ្មានសមត្ថភាពទប់ស្កាត់ក្រុមអាជីវករដែលរកស៊ីជីករណ្តៅយកអាចម៏ដីលក់ដោយមិនបានសុំច្បាប់ពីអាជ្ញាធរ ឬក៏មន្ត្រីជំនាញដែលពាក់ព័ន្ធ ។ បច្ចុប្បន្នក្រុមអាជីវករកំពង់ជីករណ្តៅយកអាចម៏ដីយ៉ាងគគ្រិកគគ្រេងនៅក្នុងឃុំព្រៃកណ្តៀង ស្រុកពាមរក៍ ខេត្តព្រៃវែង ។ ហើយរណ្តៅដីនីមួយៗមានទំហំធំជ្រៅដល់ក្បាលប្រែត មិនដែលឃើញអាជ្ញាធរចុះទៅត្រួតពិនិត្យ ឬក៏ហាមឃាត់នោះទេ បណ្តោយអោយក្រុមអាជីវករទាំងនោះ ជីករណ្តៅដីបានម៉ាសប្បាយស្រេចអំពើចិត្ត ។
ប្រជាពលរដ្ឋរស់នៅភូមិឃុំខាងលើ បានរិះគន់ អាជ្ញាធរស្រុកពាមរក៍ និងមន្ត្រីជំនាញថា គ្មានសមត្ថភាព ក្នុងការងារ សូម្បីតែអ្នកជីករណ្តៅដីសោះ លោកអភិបាលស្រុកពាមរក៍ហ៊ាននិយាយដោយឥតអៀនខ្មាស់ថា អ្នកជីករណ្តៅដីនៅឃុំព្រៃកណ្តៀងឥតបានសុំច្បាប់មកអាជ្ញាធរឃុំ និងស្រុកទេ អាជ្ញាធរបានចុះទៅឃាត់ដែរតែធ្វើម្តេច បើក្រុមអាជីករទាំងនោះគេមិនស្តាប់ ហើយនៅតែបន្តជីកគ្មានខ្លាចញញើតច្បាប់បន្តិចសោះ ។
ប្រជាពលរដ្ឋមានការងឿងឆ្ងល់យ៉ាងខ្លាំងថា តើអ្នកជីករណ្តៅដីត្រូវដង ត្រូវផ្លែជាមួយអាជ្ញាធរ ឬក៏មានខ្នងក្រាស់ខ្មឹក ។
លោក ជុំ សាមឿន អភិបាលស្រុកពាមរក៍ ប្រាប់កម្ពុជាថ្មីអោយដឹងថា គាត់បានចុះទៅឃាត់ដែរ តែគេមិនស្តាប់ សូមអោយលោកអ្នកកាសែតសួរទៅលោកនាយករដ្ឋបាលសាលាខេត្តព្រៃវែងចុះទើបដឹងរឿងច្បាស់ថាមានច្បាប់ ឬក៏អត់ច្បាប់ ។ ពាក់ព័ន្ធនឹងករណី ការជីករណ្តៅដីមិនខ្លាចញញើតច្បាប់នេះផងដែរ កម្ពុជាថ្មីព្យាយាមសូមការបំភ្លឺពី លោកច័ន្ទ ថា នាយករដ្ឋបាលសាលាខេត្តព្រៃវែងផងដែរ តែមិនអាចទំនាក់ទំនងបាន ។ សារ៉ាត់
