ខេត្តបន្ទាយមានជ័យ៖ ព្រឹកថ្ងៃទី៧ខែតុលាឆ្នាំ២០១៥នេះលោកផាន់វណ្ណរ័ត្នព្រះរាជអាជ្ញាអមសាលាដំបូងខេត្តបន្ទាយមានជ័យនិងលោកស្រីព្រមទាំងសហការីបាននាំយកបច្ច័យជិត១ម៉ឺនដូល្លា បានមកពីបុណ្យកាន់បិណ្ឌទី១០ នៅវត្តប្រាសាទស្រះកណ្តាល ខ្ចាស់ ស្ថិតនៅភូមិខ្ចាស់ ឃុំបុស្បូវ ស្រុកព្រះនេត្រព្រះ ខេត្តបន្ទាយមានជ័យ ត្រូវបានយកទៅប្រកេនលោកគ្រូចៅអធិការវត្តប្រាសាទស្រះកណ្តាលខ្ចាស់ ដើម្បីយកទៅកសាងសាលាបឋមសិក្សាបាឡី១ខ្នងកំពុងសាងសង់ បានជាង៦០ភាគរយទៅហើយនោះ។សាលាបាឡី១ខ្នងកំពុងសាងសង់នៅវត្តស្រះកណ្តាលខ្ចាស់គឺផ្តួចផ្តើមកសាងដោយលោក ផាន់ វណ្ណរ័ត្ន ព្រះរាជអាជ្ញាអម
សាលាដំបូងខេត្ត ដើម្បីបំរើលើផ្លូវព្រះពុទ្ធសាសានាដែលជាសាសនារបស់រដ្ឋនោះដែលវត្តប្រាសាទស្រះកណ្តាលខ្ចាស់កំពុងប្រឈមខ្វះខាតសាលាបាឡីសម្រាប់ឲ្យព្រះសង្ឃរៀនសូត្រនោះ។ពិធីបុណ្យកាន់បិណ្ឌទី១០ នៅវត្តប្រាសាទស្រះកណ្តាលខ្ចាស់ នាឱកាសនោះលោកផាន់វណ្ណរ័ត្តនិងលោកស្រីបានធ្វើពិធីបង្សុកូល និងរាប់បាត្រ ដល់ព្រះសង្ឃគឺដើម្បីឧទ្ទិសកុសលផលបុណ្យ ជូនដល់វិញ្ញាណក្ខន្ធបុព្វបការីជននិងបងប្អូនប្រជាពលរដ្ឋខ្មែររាប់លាននាក់ដែលបានបាត់បង់ជីវិត ក្នុងរបបប្រល័យពូជសាសន៍រួមនិង ញាតិកាទាំង៧សណ្តានដែលបានរលត់ក្ខន្ធទៅហើយនោះដើម្បីមកទទួលយកផល្លានិសង្សដែលកូនចៅធ្វើបុណ្យធ្វើទាននៅពេលនេះ។
គួរបញ្ជាក់ថារដូវបុណ្យភ្ជុំបិណ្ឌដែលជាបុណ្យប្រពៃជាតិខ្មែរតាំងពីយូរលង់មកហើយត្រូវគេនិយាយថាបានលប់បំបាត់ទាំងស្រុង នៅក្នុងការគ្រប់គ្រងរបបប្រល័យ ពូជសាសន៍ចាប់តាំងពីឆ្នាំ១៩៧៥រហូលដល់ឆ្នាំ១៩៧៩។ពិធីបុណ្យភ្ជុំបិណ្ឌត្រូវគេមើលឃើញថាបានចាប់ផ្តើមឱ្យប្រជាពលរដ្ឋដែលជាអ្នកជឿលើព្រះពុទ្ធសាស៍នានាំគ្នាបានធ្វើបុណ្យធ្វើទានឡើងវិញគឺចាប់ពីថ្ងៃរំដោះ ៧មករា ឆ្នាំ
១៩៧៩ រហូតមកដល់បច្ចុប្បន្ននេះ ។ពិធីបុណ្យភ្ជុំបិណ្ឌនោះគេសង្កេតឃើញប្រជាពលរដ្ឋគ្រប់ទិសទីបាននាំគ្នាធ្វើបុណ្យក្នុងទឹកមុខសប្បាយរីករាយប្រកបដោយទឹកចិត្តជ្រះថ្លានិងព្រះពុទ្ធសាសនា ។ ក្នុងឱកាសដែលប្រទេសជាតិទទួលបានសុខសន្តិភាព បង្រួបបង្រួមជាតិនិងមានការរីកចំរើនអភិវឌ្ឍហើយ ប្រជាជនមានជីវភាពធូធា រស់នៅទទួលបានភាពកក់ក្តៅ ក្រោមដំបូលរដ្ឋធម្មនុញ្ញ តែមួយ៕
