ខេត្តបន្ទាយមានជ័យ ព្រឹកថ្ងៃទី១២ខែតុលាឆ្នាំ២០១៥មានភ្ញៀវទេសចរណ៍ជាតិពីក្នុងនិងក្រៅខេត្តជាង១ម៉ឺននាក់បាននាំគ្នា ទៅលេងរមណីយដ្ឋានអាងទឹកត្រពាំងថ្ម ស្ថិតនៅឃុំប៉ោយចារ ស្រុកភ្នំស្រុក ខេត្តបន្ទាយមានជ័យនាថ្ងៃបុណ្យភ្ជុំបិណ្ឌ។លោក យ៉ត សុផល អធិការនគរបាលស្រុកភ្នំស្រុក បានឲ្យដឹងនៅថ្ងៃទី១៣ ខែតុលាថា ចំនួនភ្ញៀវទេសចរ ក្នុងស្រុកជាង ១ម៉ឺននាក់ ក្នុង១ថ្ងៃៗ បានទៅលេងអាងទឹកតំបន់អភិរក្សសត្វក្រៀល អាងត្រពាំងថ្មនេះ។ ប៉ុន្តែអ្នកទៅលេងនៅអាងទឹកត្រពាំងថ្ម នៅពេលបុណ្យភ្ជុំបិណ្ឌ នៅឆ្នាំនេះ គឺមានចំនួនតិច បើធៀបនឹងរាល់ឆ្នាំ។លោក យ៉ត សុផល និយាយបន្តថា ទោះយ៉ាងណា តាមបទបញ្ជារបស់លោកឧត្តមសេនីយ៍ត្រី អាត់ ខែម ស្នងការនគរបាលខេត្ត ក៏ដូចគណ:បញ្ជាការកងឯកភាពរដ្ឋបាលខេត្ត និងស្រុក គឺកម្លាំងនគរបាលរាប់សិបនាក់ ត្រូវបានដាក់ពង្រាយថែរក្សាការពារសន្តិសុខ 
សណ្តាប់ធ្នាប់ ដើម្បីបង្កលក្ខណ:សប្បាយរីករាយជូនភ្ញៀវ និងប្រជាពលរដ្ឋ។ ក្នុងនោះ កម្លាំងកងរាជអាវុធហត្ថ ប្រជាការពារ និងមន្ត្រីអាជ្ញាធរដែនដី ក៏មានប្រចាំការនៅទីនោះដែរ។លោកយ៉តសុផលបាននិយាយបន្តទៀតថានៅអាងទឹកត្រពាំងថ្ម ក្នុងរដូវបុណ្យភ្ជុំបិណ្ឌឆ្នាំនេះ មានទឹកច្រើន។ តែមានទូក និងកាណូត ពោះវៀនកង់ឡានតិចជាងមុន សម្រាប់ភ្ញៀវជួលលេងកំសាន្ត។ ភ្ញៀវច្រើនកុះករ បានកំសាន្តខុសៗគ្នា ដោយខ្លះ ចុះហែលទឹកជាមួយពោះវៀនកង់ឡាន ខ្លះជិះទូក ឬកាណូត និងខ្លះទៀត ចុះលេងទឹកក្រោមស្ពាន ខ្លះនាំគ្នាអង្គុយដំកង់ ជួបជុំផឹកស៊ី និងស្តាប់ភ្លេងចម្រៀងតាមអាយផេត ឬទូរស័ព្ទ និងធុងបាសតូចៗ។ល។
ដើម្បីទៅកាន់អាងទឹកកេរ្តិ៍របបកម្ពុជាប្រជាធិបតេយ្យ ហើយជួសជុលអភិវឌ្ឍន៍ឡើងវិញ ដោយរាជរដ្ឋាភិបាលកម្ពុជា ដោយប្រើជំនួយជប៉ុន ដំណាក់កាលទី១ និងកំចីធនាគារអភិវឌ្ឍន៍អាស៊ី នៅដំណាក់កាលទី២នេះ គឺគេអាចធ្វើដំណើរតាមផ្លូវកៅស៊ូពីត្រង់ព្រៃមាន់ នៅចំណុចបំបែកផ្លូវជាតិលេខ៦ និងតាមផ្លូវលំក្រាលគ្រួសជាច្រើនខ្សែ ពីគ្រប់ទិសផ្សេងទៀត។
អាងនេះ មានទំហំ ១០ គីឡូម៉ែត្រក្រឡា ជាអាងធំជាងគេក្នុងប្រទេស។ នៅអាងទឹកនោះ ក៏ជាតំបន់អភិរក្សសត្វក្រៀលអាងត្រពាំងថ្ម ដោយមានសត្វកម្រជិតផុតពូជ និងសត្វស្លាបជាង ២៤០ ប្រភេទ សត្វល្មូន ម្រឹក និងមច្ឆជាតិ រាប់សិបប្រភេទទៀត។ លើខ្នងអាង ក៏មានលក់ចំណីអាហារជាច្រើនឈ្ងុយឆ្ងាញ់ ហើយត្រូវមន្ត្រីអះអាងថា គ្រប់គ្រងតម្លៃ មិនឲ្យមានការលក់ថ្លៃ កោរភ្ញៀវផងដែរ៕
