រាជធានីភ្នំពេញ ៖ អំពើហិង្សាមួយបានកើតឡើងកាលពីវេលាម៉ោងង១២និង១៥នាទីរំលងអធ្រាត្រ ឈានចូលថ្ងៃទី៣ ខែឧសភា ឆ្នាំ២០១៤ នៅចំណុចមុខផ្ទះលេខ៣២ ផ្លូវលេខ៤៨៨ ក្រុម២៤ភូមិ៣ សង្កាត់ផ្សាដើមថ្កូវ ខណ្ឌចំការមន រាជធានីភ្នំពេញ ។
ជនសង្ស័យ ឈ្មោះ អ៊ន អេង ប្រុសអាយុ២៥ឆ្នាំ ស្នាក់នៅផ្ទះជួលលេខ៣២ បន្ទប់លេខ២០ ផ្លូវលេខ៤៨៨ ភូមិ៣ ក្រុម២៤ មុខរបររត់រ៉ឺម៉កង់៣ ។ ចំណែកជនរងគ្រោះឈ្មោះ ផន ឃា ភេទប្រុស អាយុ៣១ឆ្នាំ ស្នាក់នៅផ្ទះលេខ២៣ ផ្លូវលេខ៣៧៦ សង្កាត់បឹងកេងកងទី៣ ខណ្ឌចំការមន មុខរបរជាអ្នកដឹកហ្គាសដាក់ឲ្យម៉ូយ ។
បើតាមប្រភពព័ត៌មានពីកន្លែងកើតហេតុចបានឲ្យដឹងថា ៖ នៅមុនពេលកើតហេតុ ជនរងគ្រោះ ផន ឃា បានជិះម៉ូតូឌុបមិត្តភក្តិម្នាក់ឈ្មោះ ហុក ពេញ និងម្នាក់ទៀតជិះមូតូផ្សេងគ្នា ។ ពេលមកដល់ ក៏បបួលគ្នាអង្គុយផឹកស្រានៅជិតផ្ទះរបស់ខ្លួន ខណៈនោះជនរងគ្រោះបានចេញទៅរកទិញភេសជ្ជៈ យកមកផឹកដើម្បីបន្ថយជាតិស្រវឹង តែអ្នកលក់ថាគ្មានទេ មានតែគោជល់ក៏ទិញគោជល់យកមកផឹក ។
ពេលនោះជនសង្ស័យ បានដើរមកជិត ហើយច្រៀងរបៀបឌឺដង និងសំឡឹងមុខជនរងគ្រោះស្ទើរស៊ីសាច់ ។ បន្ទាប់មក ជនសង្ស័យបានដកកាំបិតមុខស្រួចដេញចាក់ជនរងគ្រោះត្រូវចំនួន៣កាំបិត ១កាំបិទត្រូវដើមទ្រូង និងពីរកាំបិតទៀតត្រូវគុម្ពត្រចៀកឈាមហូរស្រោចខ្លួន ។
បន្ទាប់មក ជនរងគ្រោះបានស្រែកឲ្យគេជួយ ត្រូវបានមិត្តភ័ក្រនៅជិតបានរត់ទៅជួយជនរងគ្រោះ និងដឹកទៅមន្ទីរពេទ្យរុស្សី ចំណែកជនសង្ស័យបានរត់ចូលទៅសំងំក្នុងបន្ទប់ផ្ទះរបស់ខ្លួន ។ ភ្លាមៗនោះសមត្ថកិច្ចបានទៅដល់ក៏ឃាត់ខ្លួនជនសង្ស័យយកទៅកាន់អធិការដ្ឋាននគរបាលខណ្ឌចំការមន ដើម្បីសាកសួរ ។ សមត្ថកិច្ចនៅមិនទាន់ដឹងច្បាស់ថា មូលហេតុអ្វី បានជាបង្កជា អំពើហឹង្សាបែបនេះនោះទេ ៕ 
