ខេត្តព្រះសីហនុ =ក្នុងឱកាសនៃពិធីបុណ្យភ្ជុំបិណ្ឌរយះពេលបីថ្ងៃកន្លងមកនេះដោយគិតចាប់ពីថ្ងៃទី១១ដល់ថ្ងៃទី១៣តុលាខេត្តព្រះសីហនុមានភ្ញៀវទេសចរជាតិនិងអន្តរជាតិមកលេងមានចំនួនជាង៩ម៉ឺននាក់។នេះបើយោងតាមរបាយការណ៌របស់មន្ទីរទេសចរណ៌ខេត្តព្រះសីហនុ។លោក នូ សុផល ប្រធានមន្ទីរទេសចរណ៍ខេត្តព្រះសីហនុបានឱ្យដឹងថាខេត្តព្រះសីហនុទទួលបានភ្ញៀវទេសចរសរុបចំនួន ៩០.៣៤០នាក់ មានការកើនឡើងចំនួន ៣៣.៤៧% បើប្រៀបធៀបរយៈពេលដូចគ្នានៃពិធីបុណ្យភ្ជំបិណ្ឌឆ្នាំ២០១៤ ក្នុងនោះភ្ញៀវទេសចរជាតិមានចំនួន ៧៩.២៦១នាក់ កើនឡើង ៤៤.១៨% និងភ្ញៀវទេសចរអន្តរជាតិមានចំនួន១១.០៧៩នាក់ ថយចុះ៣.១៣៤% ។
លោកប្រធានមន្ទីរទេសចរណ៍ឱ្យដឹងបន្ថែមទៀតថា ក្នុងឆ្នាំ២០១៥នេះ ស្របពេលដែលអាកាសធាតុមានលក្ខណះល្អប្រសើរ ភ្ញៀវទេសចរជាតិ និងអន្តរជាតិបានទៅលេងកំសាន្តនៅតាមបណ្តាកោះមានចំនួនសរុប ៣.១៣៤នាក់ ក្នុងនោះភ្ញៀវជាតិមានចំនួន ១.៥២៤នាក់ និងភ្ញៀវអន្តរជាតិមានចំនួន ១.៦១០នាក់ ។
លោក នូ សុផលបានឪ្យដឹងបន្តថា រថយន្តដែលធ្វើដំណើរឆ្លងកាត់ជញ្ជីងអូរចំណារ ស្ថិតក្នុងឃុំអូឧញាហេង ស្រុកព្រៃនប់ រថយន្តប្រភេទលក្ខណះគ្រួសារមានចំនួន ១៦.១៦៣គ្រឿង រថយន្ត BUS និង Mini Bus សរុបចំនួន១.៩០៤គ្រឿង ។ ដោយឡែកសណ្ឋាគារសរុបចំនួន ៦៣ ស្មើរនឹង៣.០៦៥បន្ទប់ ផ្ទះសំណាក់មានចំនួន ២៥០ ស្មើនឹង ៣.៤៤៩បន្ទប់ ត្រូវបានភ្ញៀវស្នាក់នៅពេញទាំងអស់ និងភ្ញៀវខ្លះទៀត បានទៅសំរាកនៅតាមផ្ទះបងប្អូន ។
លោកនូសុផលបានធ្វើការពន្យល់ថាដោយសារខេត្តព្រះសីហនុជាតំបន់ទេសចរណ៍ធម្មជាតិតភ្ជាប់តំបន់ទេសចរណ៍នាទិសនិរតី ក្នុងនោះមានខេត្តព្រះសីហនុ កោះកុង កំពត និងខេត្តកែប ភ្ញៀវទេសចរមកលេងកម្សាន្តខេត្តព្រះសីហនុរួចអាចធ្វើដំណើរទៅកម្សាន្តបន្តនៅបូកគោ ខេត្តកំពត រួចបញ្ចប់ដំណើរកម្សាន្តនៅខេត្តកែប ហើយភ្ញៀវទេសចរអាចមកលេងកម្សាន្តនៅខេត្តកែប ពួកគាត់បន្តមកបូកគោ និងបញ្ចប់នៅខេត្តព្រះសីហនុ ។
បច្ចុប្បន្ននេះមិនថាតែថ្ងៃបុណ្យទាននោះទេសូម្បីនៅថ្ងៃធម្មតាក៌មានភ្ញៀវទេសចរមកកំសាន្តខេត្តព្រះសីហនុមានចំនួនច្រើននិងកើនឡើងដែរ។ពិសេសភ្ញៀវទេសចរចាប់អារម្មណ៌ទៅកម្សាន្តនៅតាមបណ្តាកោះនានា ក្នុងនោះមានដូចជាកោះឫស្សី កោះព្រីង កោះរុងសន្លឹម កោះតូច ភូមិសុខសាន្ត និងនៅមានកោះជាច្រើនផ្សេងទៀតដែលជាតំបន់ទេសចរណ៍ទាក់ទាញយ៉ាងសំខាន់សម្រាប់ខេត្តមាត់សមុទ្រ ។
លោក នូ សុផល បានបញ្ជាក់ថា ភ្ញៀវទេសចរមកកំសាន្តនៅខេត្តព្រះសីហនុមានការកើនឡើងដោយសារ ទី១ ខេត្តព្រះសីហនុរក្សាបាននូវសន្តិសុខ សុវត្ថិភាពជូនភ្ញៀវទេសចរជាតិ និងអន្តរជាតិបានល្អ ទី២ មន្ទីរទេសចរណ៌បានសហការជាមួយអាជ្ញាធរខេត្ត ប្រជុំផ្សព្វផ្សាយដល់បងប្អូនអាជីវករលក់ដូរ ម្ចាស់សណ្ឋាគារ ផ្ទះសំណាក់ ត្រូវរក្សាតម្លៃឪ្យមានលក្ខណះថេរ ដើម្បីរក្សាបាននូវការជឿជាក់ពីភ្ញៀវទេសចរក្នុងការស្នាក់នៅ និងតម្លៃម្ហូបអាហារ ពិសេសទៀត គឺការទទួលស្វាគមន៌ភ្ញៀវជាចំណុចសំខាន់មិនអាចខ្វះបាន ក្នុងការទាក់ទាញភ្ញៀវទេសចរឪ្យពួកគាត់មកលេងម្តងហើយ និងចង់មកលេងបន្តទៀត ។
គួរបញ្ជាកថា ក្នុងឱកាសពិធីបុណ្យភ្ជំបិណ្ឌឆ្នាំ២០១៤ ខេត្តព្រះសីហនុទទួលបានភ្ញៀវទេសចរជាតិ និងអន្តរជាតិសរុបចំនួន ៦៧.៦៨៥នាក់ ក្នុងនោះភ្ញៀវជាតិមានចំនួន ៥៤.៩៧០នាក់ និងភ្ញៀវអន្តរជាតិមានចំនួន១២.៧១៥នាក់ ៕
