ខេត្តតាកែវ ៖ រថយន្តមួយគ្រឿងពាក់ផ្លាកលេខ ខ.ម បើកបរក្នុងល្បឿនលឿនបានបុកម៉ូតូមួយគ្រឿង ហើយជ្រុកលទៅបុកតូបលក់ឥវ៉ាន់របស់ប្រជាពលរដ្ឋ បណ្តាលឲ្យខូចខាតម៉ូតូ០២គ្រឿង កង់មួយគ្រឿង និងរបស់របរប្រជាពលរដ្ឋមួយចំនួន ។ លោកវរសេនីយ៍ត្រី ឆាយ សាវុធ អធិការនគរបាលក្រុងដូនកែវ បានឲ្យដឹងថា ហេតុការណ៍គ្រោះថ្នាក់ចរាចរណ៍ខាងលើកើតឡើងនៅវេលាម៉ោង១៨ និង៣០នាទី យប់ថ្ងៃទី១៤ ខែតុលា ឆ្នាំ២០១៥ លើផ្លូវជាតិលេខ២ ចន្លោះបង្គោលគីឡូម៉ែត្រលេខវេលាម៉ោង៧៥-៧៦ ស្ថិតក្នុងភូមិផ្សារតាកោ សង្កាត់រកាក្នុង ក្រុងដូនកែវ ខេត្តតាកែវ ។ លោកបានបន្តថា រថយន្តបង្កហេតុម៉ាក PAJERO ពណ៌ត្រអ៊ី ពាក់
ផ្លាកលេខ ខ.ម០២.២.6478 បើកបរដោយឈ្មោះ សម្បត្តិ ភក្តិឌីម៉ង់ ភេទប្រុស អាយុ៣០ឆ្នាំ មានទីលំនៅភូមិស្នោរ សង្កាត់រកាក្នុង ក្រុងដូនកែវ មានមុខរបរជាជាងអគ្គិសនី លុះមកដល់ចំណុចកើតហេតុខាងលើបានបុកម៉ូតូមួយគ្រឿងម៉ាកហុងដា C125 ពណ៌ខ្មៅ សេរី២០១៥ គ្មានផ្លាកលេខ បណ្តាលឲ្យអ្នកបើកបរឈ្មោះ ទេស សុវណ្ណលាភ ភេទស្រី អាយុ១៦ឆ្នាំ(សិស្ស)មានទីលំនៅភូមិចក សង្កាត់រកាក្នុង ក្រុងដូនកែវ រងរបួសធ្ងន់ និងអ្នករួមដំណើរម្នាក់ឈ្មោះ នី សេរីគិរី ភេទស្រី អាយុ១៥ឆ្នាំ (សិស្ស) រស់នៅភូម សង្កាត់ជាមួយគ្នា រងរបួសធ្ងន់ ។ 
ក្រោយពេលបុកម៉ូតូជនរងគ្រោះខាងលើរួច រថយន្តបានបើកឡើងលើខឿនចិញ្ចើមផ្លូវបុកម៉ូតូ០២គ្រឿង កង់មួយគ្រឿង ដែលចតទុកមុខផ្ទះ ព្រមទាំងបានបុកតូបលក់ឥវ៉ាន់របស់ប្រជាពលរដ្ឋ តែមិនបណ្តាលឲ្យម្ចាស់ផ្ទះរងរបួសទេ ។ 
ក្រោយពេលទទួលបានព័ត៌មានភ្លាម កម្លាំងសមត្ថកិច្ចអធិការដ្ឋាននគរបាលក្រុងដូនកែវ បានចុះដល់កន្លែងកើតហេតុ ចាត់បញ្ជូនជនរងគ្រោះទៅមន្ទីរពេទ្យ ធ្វើកំណត់ហេតុដកហូតវត្ថុតាងពាក់ព័ន្ធយកមករក្សាទុកជាបណ្តោះអាសន្ននៅអធិការដ្ឋាននគរបាលក្រុងដូនកែវ និងធ្វើការឃាត់ខ្លួនអ្នកបើកបររថយន្តបង្កដើម្បីធ្វើការសាកសួរ កសាងសំណុំរឿងទៅតាមនិតិវិធី ។
