ខេត្តកំពង់ឆ្នាំង ៖ មន្ត្រីរាជការ កងកម្លាំងប្រដាប់អាវុធ គ្រប់ស្ថាប័ន នៅក្នុងខេត្តកំពង់ឆ្នាំង ដឹកនាំដោយលោក ឈួរ ចន្ទ័ឌឿន អភិបាលខេត្ត នៅម៉ោង៩និង៣០នាទីព្រឹក ថ្ងៃទី២៥ ខែតុលា ឆ្នាំ២០១៥ បានប្រារព្វពិធីគោរពព្រះវិញ្ញាណក្ខ័ន្ធព្រះករុណា ព្រះបាទសម្ដេចព្រះនរោត្ដម សីហនុ ព្រះមហាវីរក្សត្រ ព្រះវររាជបិតា ឯករាជ្យ បូរណភាពទឹកដី និងឯកភាពជាតិខ្មែរ ព្រះបរមរតនកោដ្ឋ គម្រប់ខួប៣ឆ្នាំ។ពិធីគោរពវិញ្ញាណក្ខ័ន្ធនេះធ្វើឡើងនៅ ក្នុងវត្តធម្មវន័ ស្ថិតក្នុងភូមិត្រពាំងអញ្ជាញ ឃុំស្វាយជ្រុំ ស្រុករលាប្អៀរ ដោយមា នការរៀបចំពិធីអុជធូបទៀនតាមប្រពៃណីព្រះពុទ្ធសាសនា ដើម្បីឧទ្ទិសដល់វិញ្ញាណក្ខន្ធព្រះបាទសម្ដេច ព្រះនរោត្ដម សីហនុ និងបួងសួងសុំសេចក្តីសុខដល់ប្រជាពលរដ្ឋទាំងអស់នៅក្នុងខេត្តផងដែរ។
នៅក្នុងពិធីនេះ អ្នកកាន់កម្មវិធីក៏បានឡើងអាននូវជីវប្រវត្តិនិងស្នាព្រះហស្ថរបស់ព្រះករុណាផងដែរក្នុងការគ្រប់គ្រងដឹកនាំនិងអភិវឌ្ឍន៍ប្រទេសកម្ពុជា និងការតស៊ូទាមតាមឯករាជ្យជាតិពីអាណានិគមបារាំង ការចរចារកសន្តិភាព និងការបង្រួមបង្រួមជាតិខ្មែរតែមួយ កសាងបានសុខសន្តិភាពពេញបរិបូណ៌
រហូតមកដល់សព្វថ្ងៃនេះ ដែលសុទ្ធតែជាស្នាព្រះហស្ថព្រះអង្គមិនកាត់ផ្តាច់បានឡើយ។
ក្រៅពីមន្ត្រីរាជការ កងកម្លាំងប្រដាប់អាវុធ ប្រជាពលរដ្ឋ នៅក្នុងខេត្តបានធ្វើព្រះរាជពិធីខាងលើនេះ ដោយឡែកនៅតាមបណ្តាក្រុងនិងស្រុកទាំង៨ក្នុងខេត្ត ក៏មានការរៀបចំព្រះរាជពិធី គោរពព្រះវិញ្ញាណក្ខ័ន្ធព្រះអង្គដូចនេះដែរ។ ស ម្រាប់ក្រុងកំពង់ឆ្នាំង គឺបានធ្វើព្រះរាជពិធីនេះនៅវត្តធម្មយុត្តិ ស្ថិតក្នុងភូមិធម្មយុត្តិ សង្កាត់ប្អេរ ក្រុងកំពង់ឆ្នាំង។
សូមបញ្ជាក់ថា ព្រះករុណា ព្រះបាទនរោត្តមសីហនុ ព្រះបរមរតនកោដ្ឋ បានយាងចូលទីវង្គតនៅថ្ងៃទី១៥ ខែតុលា ឆ្នាំ២០១២ នៅទីក្រុងប៉េកាំង ប្រទេសចិន ជាទីកន្លែងដែលព្រះអង្គយាងទៅពិនិត្យព្រះរាជសុខភាព ដោយព្រះអង្គយាងចូលទីវង្គត នៅក្នុងព្រះជន្មាយុ៩០ព្រះវស្សា ប្រជាពលរដ្ឋជាកូន ជាចៅចៅទួត សូមបួងសួងព្រះវិញ្ញាណក្ខ័ន្ធព្រះបរមរតកោដ្ឋ សូមយាងទៅកាន់សុគតិភពកុំបីឃ្លាតឡើយ៕
