ខេត្តកំពង់ឆ្នាំង៖ ការរៀបចំផ្លាស់ប្តូរទីតាំងផ្ទះបណ្តែតលើទឹកនៅមុខទន្លេផ្សារក្រោម ទៅកាន់ទីតាំងថ្មីរបស់គណៈកម្មការចំរុះថ្នាក់ខេត្តមកដល់ថ្ងៃទី១៧ខែតុលា ឆ្នាំ២០១៥នេះសម្រេចបាន៩៨% ។ ដោយឡែកប្រជាពលរដ្ឋដែលមករស់នៅក្នុងទីតាំងថ្មី បានជួបនៅការលំបាកស្នើសុំអាជ្ញាធរខេត្តជួយដោះស្រាយអគ្គីសនី ជួយធ្វើផ្លូវដើរតាមច្រាំងទន្លេទៅផ្សារក្រោម និងជួយដាក់កម្លាំងសមត្ថកិច្ចការពារសន្តិសុខពេលយប់ជូនពួកគាត់ផង។
លោក ស៊ុន សុវណ្ណរិទ្ធ អភិបាលរងខេត្តកំពង់ឆ្នាំង និងជាប្រធានគណៈកម្មការចំរុះថ្នាក់ខេត្តបានមានប្រសា សន៍អោយដឹងនៅល្ងាចថ្ងៃទី១៧ ខែតុលា ឆ្នាំ២០១៥នេះថា៖ ប្រជាពលរដ្ឋដែលរស់នៅលើផ្ទះបណ្តែតទឹកក្នុងទន្លេសរុបមានចំនួន៩៩៦គ្រួសារ ស្មើនិង១.៤៨៦ខ្នងផ្ទះ 
និងបែត្រី។យោងតាមផែនរបស់គណៈអភិបាលខេត្តកំពង់ឆ្នាំង ការរៀបចំផ្លាស់ប្តូរទីតាំងថ្មីផ្ទះបណ្តែតទឹកក្នុងទន្លេផ្សារក្រោម គិតមកដល់ថ្ងៃទី១៧ ខែតុលា ឆ្នាំ២០១៥នេះ ផ្ទះបណ្តែតទឹកចំនួន៩៨% បានផ្លាស់ប្តូរមកនៅទីតាំងថ្មីរួចហើយ។ ដោយឡែកផ្ទះប្រជាពលរដ្ឋ ២%ទៀត ដែលនៅសល់កំពុងបន្តត្រៀមលក្ខណៈធ្វើការផ្លាស់ប្តូរមកនៅទីតាំងថ្មីជាបន្តទៀត និងមួយចំនួនទៀតគាត់មានដីនៅខាងលើបានត្រៀមរុះរើផ្ទះចេញពីលើទឹកតាមផែនការផងដែរ។
លោក ស៊ុន សុវណ្ណរិទ្ធ បានអោយដឹងទៀតថា៖ ប្រសិនបើផ្ទះបណ្តែតទឹកមួយចំនួនតូចទាំងនោះ មិនព្រមអូសចេញតាមផែនការរបស់ខេត្តទេនោះ នៅថ្ងៃទី២៥ ខែតុលា ឆ្នាំ២០១៥ គណៈកម្មការចំរុះនិងសហការណ៍ជា មួយលោកព្រះរាជអាជ្ញាសាលាដំបូងខេត្ត អនុវត្តន៍វិធានការរដ្ឋបាល ដោយត្រូវតែអូសផ្ទះទឹកទាំងនោះចេញទៅកាន់ទីតាំងថ្មី មិនទុកអោយនៅរាំងស្ទះផែនការអភិវឌ្ឍន៍តំបន់ទេសចរណ៍តាមមាត់ទន្លេរបស់ខេត្តឡើយ។ចំណែកទីតាំងថ្មីដែលអាជ្ញាធរខេត្ត បានកំណត់អោយផ្ទះបណ្តែតទឹកទាំងអស់សំចតរស់នៅជាបណ្តោះអាសន្ននោះ គឺនៅខាងលិចទីតាំងបូបទឹករបស់រដ្ឋាករទឹកក្រុមហ៊ុនអានកូ នៅចុងភូមិចុងកោះ សង្កាត់កំពង់ឆ្នាំង ដែលមានចម្ងាយជាង២គីឡូម៉ែត្រពីសួនច្បារមាត់ទន្លេផ្សារក្រោម ហើយជំហានទី២នៃផែនការ នឹងត្រូវអោយប្រជាពលរដ្ឋរស់នៅលើផ្ទះបណ្តែតទឹក ឡើងទៅរស់នៅលើកគោកទាំងអស់ គឺមិនអនុញ្ញាតអោយរស់នៅលើទឹកទន្លេទៀតឡើយ។
ដោយឡែកប្រជាពលរដ្ឋដែលបានមករស់នៅក្នុងទីតាំងថ្មី នៅថ្ងៃទី១៦ ខែតុលា បានរៀបរាប់អំពិការលំបាកពេលមករស់នៅក្នុងទីតាំងថ្មី ដោយសំណូមពរដល់អាជ្ញាធរខេត្តថា៖ ស្នើសុំជួយដោះស្រាយបណ្តាញអគ្គីសនីជួយធ្វើផ្លូវលំដើរតាមច្រាំងទន្លេពីទីតាំងថ្មីទៅផ្សារក្រោម និងជួយដាក់កម្លាំងសមត្ថកិច្ចការពារសន្តិសុខនៅពេលយប់ជូនពួកគាត់ផង និងប្រសិនបើអាចដោះដូរទីតាំងថ្មីបាន ពួកគាត់សុំទៅរស់នៅចំណុចខាងកើតភូមិកណ្តាលអោយផុតពីគម្រោងអភិវឌ្ឍន៍របស់ខេត្ត ព្រោះថានៅទីនោះទឹកទន្លេជ្រៅអាចចិញ្ចឹមត្រីក្នុងបែបាន ចំណែកទីតាំង
ថ្មីដែលខេត្តកំណត់អោយរស់នៅនេះ គឺខែប្រាំងទឹកទន្លេរាក់មានជម្រៅតែ៣ម៉ែត្រ មិនអាចចិញ្ចឹមត្រីបានឡើយ។
ទាក់ទងនិងសំណូមពរខាងលើនេះគណៈកម្មការចំរុះថ្នាក់ខេត្តបានបកស្រាយបញ្ជាក់អោយដឹងថា៖ បញ្ហាអគ្គីសនី ខេត្តបានទាក់ទងក្រុមហ៊ុនប្រើប្រាស់បន្ទះសូឡាអគ្គីសនីព្រះអាទិត្យ ដាក់ជូនប្រជាពលរដ្ឋប្រើប្រាស់ក្នុងតម្លៃថោក ព្រោះថាការរស់នៅក្នុងទីតាំងថ្មីនេះគ្រាន់តែអនុញ្ញាតអោយរស់នៅជាបណ្តោះអាស្នតែប៉ុណ្ណោះ មិនអនុញ្ញាតអោយរាយបណ្តាញអគ្គីសនីនោះឡើយ។ ចំពោះផ្លូវលំខេត្តតាមច្រាំងទន្លេ ខេត្តកំពុងសិក្សាគម្រោងស្នើសុំទៅថ្នាក់លើ ចំណែកកិច្ចការពារសន្តិសុខពេលយប់និងថ្ងៃវិញនោះអាជ្ញាធរខេត្តបានរៀបចំរួចហើយ ដោយឡែកការសុំផ្លាស់ប្តូរទីតាំងមកនៅកន្លែងទឹកជ្រៅវិញនោះ គឺខេត្តមានគ្រោងអោយឡើងមករស់នៅលើគោកទាំងអស់ នៅក្នុងទន្លេទោះកន្លែងណាក៏មិនអនុញ្ញាតអោយរស់នៅឡើយ។
ការប្រឹងប្រែងរៀបចំផ្លាស់ប្តូរទីតាំងថ្មីរបស់ផ្ទះបណ្តែតលើទឹកនេះ គឺជាគម្រោងអភិវឌ្ឍន៍តំបន់ទេសចរណ៍តាមដងទន្លេរបស់ខេត្ត និងជាផ្នែកមួយក្នុងការត្រៀមខ្លួនរៀបចំបុណ្យអុំទូក អកអំបុកសំពះព្រះខែក្នុងពេលខាងមុខនេះ ហើយក៏ជាបន្ទុកមួយក្នុងការរៀបចំពិធីបុណ្យទន្លេក្នុងខេត្តកំពង់ឆ្នាំង នៅឆ្នាំខាងមុខនេះផងដែរ៕
