ខេត្តប៉ៃលិន៖បុរសវ័យចំណាស់ម្នាក់ ដោយសារតែស្រវឹងស្រាជោគជាំ បានដើរទៅធ្លាក់ប្រឡាយក្បែរផ្ទះ បណ្តាលឲ្យលង់ទឹកស្លាប់ភ្លាមៗ ត្រួវបានបងប្អូនសាច់ញាតិយកទៅធ្វើបុណ្យតាមប្រពៃណីព្រះពុទ្ធសាសនា ។ ហេតុការណ៏បុរសវ័យចំណាស់ស្រវឹងស្រា ដើរធ្លាក់ប្រឡាយលង់ទឹកស្លាប់នេះ បានកើតឡើងកាលពីវេលាម៉ោង ១៨ និង៣០ នាទី យប់ ថ្ងៃទី១៩ ខែតុលា ឆ្នាំ២០១៥ ស្ថិតក្នុងភូមិថ្នល់ទទឹង ឃុំអូរអណ្តូង ស្រុកសាលាក្រៅ ខេត្តប៉ៃលិន ។
បុរសវ័យចំណាសដែលរងគ្រោះមានឈ្មោះ សី រ៉េត អាយុ ៥៨ឆ្នាំ ជាបុរសពោះម៉ាយ មានទីលំនៅភូមិថ្នល់ទទឹង ឃុំអូរអណ្តូង ស្រុកសាលាក្រៅ ខេត្តប៉ៃលិន ។
ប្រភពព័ត៌មានពីកន្លែងកើតហេតុ បានឲ្យដឹងថា៖ មុនពេលកើតហេតុ គេឃើញេជនរងគ្រោះស្រវឹងស្រា ដោយគេមិនដឹងថាស្រវឹងពីណាមកនោះទេ តែនៅពេលមកដល់ផ្ទះ ក៏ដើរសរសៀរតាមប្រឡាយក្បែរផ្ទះ រួចក៏បានរអិលជើងធ្លាក់ផ្កាប់មុខក្នុងប្រឡាយ បណ្តាលឲ្យលង់ទឹកស្លាប់តែម្តង ។ ក្រោយពេលកើតហេតុគេឃើញបងប្អូនសាច់ញាតិចុះទៅស្រង់ជនរងគ្រោះពីក្នុងទឹកយកមកធ្វើបុណ្យតាមប្រពៃណី ។
តាមប្រភពព័ត៌មានពីសមត្ថកិច្ចស្រុកសាលាក្រៅ បានឲ្យដឹងថា៖ ជនរងគ្រោះដែលស្លាប់ ដោយលង់ទឹក មានឈ្មោះ សី រ៉េត អាយុ ៥៨ឆ្នាំ ជាបុរសពោះម៉ាយ មានទីលំនៅភូមិថ្នល់ទទឹង ឃុំអូរអណ្តូង ស្រុកសាលាក្រៅ ហើយមានកូនប្រុសស្រី២នាក់ ក្នុងបន្ទុក ។ ប្រភពព័ត៌មានបន្តថា៖ ជនរងគ្រោះជាមនុស្សញៀនស្រា មិនដែលលះថ្ងៃ ហើយនៅថ្ងៃកើតហេតុ ជនរងគ្រោះស្រវឹងស្រាជោគជាំ ទើបបណ្តាលឲ្យដើរទៅរអិលជើង ធ្លាក់ប្រឡាយលង់ទឹកស្លាប់បែបនេះតែម្តង ។បើតាមការធ្វើកោសល្យវិច្ឆ័យរបស់សមត្ថកិច្ចបញ្ជាក់ថា ជនរងគ្រោះពិតជាស្លាប់ ដោយការលង់ទឹកប្រាកដមែន ។ បច្ចុប្បន្ន សពជនរងគ្រោះត្រួវបានសាច់ញាតិ យកទៅធ្វើបុណ្យតាមប្រពៃណី ៕
