ខេត្តកំពង់ឆ្នាំង៖ស្ត្រីខ្មែរក្រីក្រម្នាក់សុំប្រកាស់រកឪពុកម្តាយទី២ចិត្តធម៌ ជួយចិញ្ចឹមកូនប្រុសអាយុជាង៦ខែ ព្រោះតែគ្មានលទ្ធភាពចិញ្ចឹមកូនទៀត និងដែលថ្មីៗនេះត្រូវឪពុកកំណាចដេញកាប់បណ្តេញចេញមិនអោយនៅលើផ្ទះ មកសុំរស់នៅក្រោមផ្ទះអ្នកស្រុកក្នុងភូមិ។ រឿងដែលគួរអោយអាណិតទៀតនោះ គឺនាងបានទៅធ្វើការជាអ្នកបំរើតាមផ្ទះនៅប្រទេសម៉ាឡេស៊ី ត្រូវបានបុរសម៉ាឡេស៊ីម្នាក់ចាប់រំលោភ ក្រោយមកបានរៀបការមានចុះអេតាស៊ីវិលស្របច្បាប់ក្នុងប្រទេសម៉ាឡេស៊ី ប៉ុន្តែពេលជិតសំរាលកូនត្រូវប្តីបោកប្រាស់អោយត្រឡប់មកស្រុកខ្មែរវិញហើយផ្តាច់ការទំនាក់ទំនងរហូត នាងសំណូមពរដល់ស្ថានទូតខ្មែរនៅប្រទេសម៉ាឡេស៊ី និងអ្នកច្បាប់ ជូយរកយុត្តិធម៌ជូននាងផង។
នៅព្រឹកថ្ងៃទី២០ ខែតុលា ឆ្នាំ២០១៥ ស្ត្រីដែលមានបញ្ហាខាងលើនេះបានរៀបរាប់ពីជិវិតនាង អោយអ្នកយកព័ត៌មានយើងដឹងថា៖ នាងមាន ឈ្មោះ ចាន់ ចំរើន អាយុ២៣ឆ្នាំ នាងមានកូនប្រុសមួយអាយុ៦ខែ រស់នៅភូមិសំរោង សង្កាត់ផ្សារឆ្នាំង ក្រុងកំពង់ឆ្នាំង នាងទើបតែមកពីប្រទេសម៉ាឡេស៊ីបានជិត១ឆ្នាំ។ នៅឆ្នាំ២០១១ នាងបានទៅធ្វើការជាអ្នកបំរើការងារតាមផ្ទះនៅប្រទេសម៉ាឡេស៊ីជាលើកទី២ តាមរយះក្រុមហ៊ុន អាយ អាយ អេស បាន៣ឆ្នាំ។
នៅពេលធ្វើការតាមផ្ទះអោយគេ នៅស្រុកម៉ាកុតាក់ច្រាស ខេត្តគ័រលំពូ ប្រទេសម៉ាឡេស៊ី ត្រូវបុរសម្នាក់ឈ្មោះ សូ ទូ អាយុ៣០ឆ្នាំ ជាកូនម្ចាស់ផ្ទះបានចាប់រំលោភធ្វើបាបនាងគ្រប់បែបយ៉ាង ហើយក្រោយមកគេក៏បា នបង្ខំនាងអោយរៀបការជាមួយគេនិងបានចុះអីតាស៊ីវិលស្របច្បាប់ជាមួយគ្នា និងបង្ខំអោយនាងជាអ្នកចេញប្រាក់រៀបការខ្លួនឯងអស់ជិត១.០០០ដុល្លា។ បន្ទាប់ពីរូបនាងពពោះជិតគ្រប់ខែប្តីរបស់នាងគេមិនអោយនាងសំរាលកូនប្រទេសម៉ាឡេស៊ីទេ គឺគេបានលួងលោមនាងអោយត្រឡប់មកកើតនៅស្រុកខ្មែរវិញដោយសន្យាថា
គេនិងមករកនាងនៅស្រុកខ្មែរពេលនាងសំរាលកូនរួច។ ក្នុងពេលនោះគឺប្តីរបស់នាងបានអោយនាងមកស្រុកខ្មែរវិញម្នាក់ឯងតាមច្រកប្រទេសថៃ និងសូម្បីតែលិខិតឆ្លងដែនក៏គេមិនអោយនាងដែរ ពេលមកដល់ស្រុកខ្មែរនាងសល់ប្រាក់តែ៦ម៉ឹនរៀលគត់។
នាងបាននិយាយបន្តទៀតថា៖ ពេលដល់ស្រុកខ្មែររយះពេល១ខែដំបូង ប្តីនាងនៅទាក់ទងគ្នាបាននៅឡើយតាមទូរស័ព្ទ ក្រោយពីនាងសម្រាលកូនរួចមកលេខទូរស័ព្ទធ្លាប់ទំនាក់ទំនងគ្នា លែងទាក់ទងបានរហូតមកដល់ពេលនេះ ទើបនាងដឹងខ្លួនថានាងត្រូវគេបោកប្រាស់។នាងសំណូមពរអ្នកច្បាប់នៅក្នុងខ្មែរ និងស្ថានទូតខ្មែរនៅប្រទេសម៉ាឡេស៊ី ជួយផ្តល់យុត្តិធម៌ជូននាងផង ព្រោះពេលនេះនាងគ្មានលុយកាក់ប្តឹងផ្ដល់ទេ។
ដោយឡែកមកដល់ថ្ងៃនេះកូនប្រុសនាងសស្អាតមានអាយុជាង៦ខែហើយ នាងគ្មានលទ្ធភាពចិញ្ចឹមកូនទៀតទេ ព្រោះសព្វថ្ងៃនេះនាងក្រីក្រគ្មានមុខរបររកពិតប្រាកដ គឺបានដើរបេះផ្កាស្នោ និងត្រកួន នៅតាមបឹងយ កមកលក់ទិញអង្ករកំប៉ុងច្រកឆ្នាំង បាន១ថ្ងៃរស់មួយថ្ងៃតែប៉ុណ្ណោះ។ ពេលនេះនាងគ្មានផ្ទះសម្បែងជ្រលកោនទេ ព្រោះតែថ្មីៗនេះឪពុកកំណាចបានដេញកាប់នាងនិងម្តាយនាងមិនអោយរស់នៅក្នុងផ្ទះឡើយ សព្វថ្ងៃនាងបានសុំអ្នកភូមិរស់នៅក្រោមផ្ទះរបស់គេ។ នៅពេលនេះនាងសុំប្រកាសប្រគល់កូនប្រុសដាច់ជូនឪពុកម្តាយទី២ ដែលមានក្តីសណ្តោសមេត្តានិងមានព្រហ្មវិហារធម៌ ជួយយកកូនប្រុសនាងទៅចិញ្ចឹមយកបុណ្យផងចុះ បើមានក្តីមេត្តានាងស្នើសុំប្រាក់តិចតួចសំរាប់ដោះស្រាយជីវភាពរស់នៅរបស់ម្តាយ ម្តាយធំ និងជីដូនដែលកំពុងក្រីក្រខ្វះខាតនិងមានជម្ងឺខ្វិន ចំណែករូបនាងចង់ទៅធ្វើជាកម្មករនៅប្រទេសថៃ ដើម្បីរកប្រាក់មកជួយចិញ្ចឹមក្រុមគ្រួសារ មានម្តាយ ម្តាយធំ និងជីដូន ដែលកំពុងរស់នៅយ៉ាងវេទនា។ ( លេខទូរស័ព្ទសាច់ញាតិនាងក្នុងការទាក់ ទងសុំកូន ០៦៧ ៨០ ៧០ ៨០ ប្រព័ន្ធមិត្តហ្វូន )៕
