បន្ទាយមានជ័យ ៖ អ្នករត់ម៉ូតូឌុបម្នាក់ត្រូវសមត្ថកិច្ចប៉ូលីសក្រុងប៉ោយប៉ែតឃាត់ខ្លួន ដោយសង្ស័យថា ឃុបឃឹតជាមួយក្រុមអ្នករត់ស៊ី ជំរិតទាប្រាក់៨០ម៉ឺនរៀលពីពលករខ្មែរ ដែលឆ្លងដែលពីថៃចូលកម្ពុជា កាលពីថ្ងៃទី២២ តុលា ២០១៥ ហើយកំពុងបន្តតាមស្វែងរកបក្ខពួកជាអ្នករត់តាក់ស៊ី និងមេខ្យល់ថែមទៀត ។តាមការអោយដឹងពីជនរងគ្រោះឈ្មោះ ភឿន អាយុ១៩ឆ្នាំ មានទីលំនៅខេត្តព្រៃវែង បានរៀបរាប់អោយដឹងថា យប់ថ្ងៃទី២១ ខ្លួនបានត្រឡប់មកពីធ្វើការនៅប្រទេសថៃ លុះមកដល់ផ្សាររ៉ុងគ្លឿ ព្រំដែលថៃខ្មែរ ក៏មានមេខ្យល់ម្នាក់មកទាក់ទងដើម្បីនាំខ្លួនចូលទឹកដីខ្មែរតាមរយៈច្រករបៀងក្បែរច្រកទ្វារអន្តរជាតិ ប៉ោយប៉ែត ក្នុងតម្លៃ៨០០បាត។ លុះចូលមកដល់ដីខ្មែរ មេខ្យល់រូបនោះ ក៏បានណែនាំអោយស្គាល់តាក់ស៊ីមួយគ្រឿង ហើយតៃកុងតាក់ស៊ីដែលមិនបានស្គាល់ឈ្មោះ បានជំរិតទារប្រាក់ចំនួន៨០ម៉ឺនរៀល ។ លុះព្រឹកថ្ងៃទី២២ ខ្លួនបានអោយតៃកុងរថយន្តមកយកលុយនៅមុខផ្សាអគ្គ ទើបឃើញមានអ្នករត់ម៉ូតូឌុបម្នាក់មកទទួលយកលុយ ហើយសមត្ថកិច្ចក៏ឃាត់ខ្លួនតែម្តង ។
ក្រោយការឃាត់ខ្លួនអ្នករត់ម៉ូតូឌុបប៉ូលីសក៏បន្តទៅចាប់តៃកុងតាក់ស៊ី តែលុះទៅដល់តៃកុងរត់គេចខ្លួនបាត់បន្សទុកតែរថយន្តមួយគ្រឿងម៉ាកកាំមារីចង្កូតស្តាំមួយគ្រឿងទឹកប្រាក់ យកមករក្សាទុកនៅអធិការ ។
បច្ចុប្បន្នជនសង្ស័យជាអ្នករត់ម៉ូតូឌុប រួមទាំងម៉ូតូត្រូវបានឃាត់ខ្លួននៅអធិការដើម្បីសាកសួរឈានទៅចាប់ខ្លួនតៃកុងតាស៊ី និងមេខ្យល់ ៕ 
