ព្រះវិហារ បច្ចុប្បន្ននេះវិស័យកីទ្បានៅខេត្តព្រះវិហារកំពុងមានការចាប់អារម្មណ៍ពីសំណាក់អ្នកគាំទ្រយ៉ាងច្រើនដោយសារមានការចូលរួមលើកស្ទួយពីលោកអភិបាលខេត្តនិងអង្គភាពមន្ទីរអប់រំយុវជននិងកីទ្បាខេត្តព្រះវិហារបង្កើតនូវកម្មវិធីរដូវកាលប្រកួតបាល់ទាត់លីគចាប់ពីឆ្នាំ២០១៥នេះតទៅអោយមានដំណើរការវិវត្តន៍រីកចំរើន។
ប្រភពព័ត៌មានមិនផ្លូវការបានអោយដឹងថាខាងការិយាល័យកីទ្បានៃមន្ទីរអប់រំយុវជននិងកីទ្បាខេត្តព្រះវិហារបានធ្វើសំណើរដាក់ជូនលោកអ៊ុំម៉ារ៉ាអភិបាលខេត្តសុំអោយលោកជួយផ្តល់ជាប្រាក់រង្វាន់លើកទឹកចិត្តសំរាប់ក្លិបកីទ្បាករដែលប្រកួតឈ្នះជើងឯកបាត់ទាត់លីគ។សំណើរនោះស្ងាត់ឈឹងមិនទាន់មានការឆ្លើយតបជាផ្លូវការពីលោកអភិបាលខេត្តព្រះវិហារនៅទ្បើយទេថាកម្មវិធីប្រកួតបាល់ទាត់លីគឆ្នាំ២០១៥ពានរង្វាន់លោកអភិបាលខេត្តមានចំនួនទឹកប្រាក់ប៉ុន្មានលានរៀលនោះទេ។
មន្ដ្រីការិយាល័យកីទ្បាខេត្តម្នាក់បានអោយដឹងថាការប្រកួតកីទ្បាបាត់ទាត់លីគនៅឆ្នាំ២០១៥នេះមានដំណើរការល្អជាងឆ្នាំមុនដោយសារមានការចូលរួមបង្កើតក្លិបបាល់ទាត់បានច្រើនដើម្បីប្រកួតលក្ខណះមិត្តភាពនៅមណ្ឌលកីទ្បាខេត្តក្នុងក្រុងព្រះវិហារ។ក្នុងនោះមានស្ថាប័នមន្ទីរ,គ្រឹះស្ថានសិក្សារដ្ឋ,សហគ្រាសឯកជន,គ្រឹះស្ថានហិរញ្ញវត្ថុឯកជន,តំណាងសាលាស្រុកបានយកចិត្តទុកដាក់បង្កើតក្លិបកីទ្បាផ្ទាល់ខ្លួនសរុបទាំងអស់ចំនួន១២ក្លិបរឺក្រុម។
នៅក្នុងតារាងកម្មវិធីរបស់គណះកម្មការរៀបចំការប្រកួតបានអោយដឹងថារដូវកាលប្រកួតបាល់ទាត់លីគមហាជនឆ្នាំ២០១៥ពានរង្វាន់លោកអភិបាលខេត្តព្រះវិហារនេះសរុបទាំងអស់មានចំនួន១១សប្តាហ៍ស្មើនឹង៦៦ប្រកួតគិតចាប់តាំងពីដើមរដូវកាលប្រកួតថ្ងៃទី២៩សីហា២០១៥រហូតមកដល់ថ្ងៃទី២៤តុលា២០១៥នេះជាលទ្ធផលបានចំនួន៥១ប្រកួតហើយនឹងបញ្ចប់ការប្រកួតចុងក្រោយនៅថ្ងៃទី០៨វិច្ឆិកា២០១៥ខាងមុខនេះ។
ការប្រកួតចុងរដូវកាលនៅថ្ងៃទី២៤តុលានេះគឺក្លិបបាល់ទាត់វិទ្យាល័យជាស៊ីមប៉ះជាមួយក្លិបអាណាចក្រខ្មែរហើយក្លិបសហភាពសហព័ន្ធយុវជនខេត្តប៉ះជាមួយក្លិបព្រហ្មមុខបួននិងក្លិបអេស៊ីលីដាប៉ះជាមួយក្លិបអង្គការវើលវីហ្សិន។ក្លិបបាត់ទាត់ព្រហ្មមុខបួនមកពីស្រុកគូលែនជាក្រុមកីទ្បាករជើងខ្លាំងលេងបានល្អជាងគេហើយឈរនៅលើពូលតារាងគិតមកដល់ពេលនេះរំពឹងថាជាក្រុមជើងឯកឈ្នះពានរង្វាន់នៅពេលបញ្ចប់រដូវកាលប្រកួតបាល់ទាត់លីគខាងមុខនេះ។
អ្នកគាំទ្រទស្សនាការប្រកួតបាល់ទាត់ម្នាក់បានអោយអ្នកសារព័ត៌មានដឹងថាគាត់រីករាយណាស់នៅពេលខេត្តព្រះវិហារបានរៀបចំអោយមានការប្រកួតបាល់ទាត់លីគនេះទ្បើង។គាត់ចូលរួមសម្តែងមតិគាំទ្រថាចង់អោយខេត្តព្រះវិហារជាទឹកដីកំណើតរបស់គាត់មានមុខមាត់នឹងគេក្នុងវិស័យកីទ្បាដើម្បីឈានទៅប្រកួតលក្ខណះមិត្តភាពជាមួយក្រុមកីទ្បាករជើងខ្លាំងនៅតាមបណ្តាខេត្តរាជធានីដ៍ទៃទៀតក្នុងព្រះរាជាណាចក្រកម្ពុជា៕
