ខេត្តបន្ទាយមានជ័យ ព្រឹកថ្ងៃទី២៧ខែតុលាឆ្នាំ២០១៥ពេញ១ថ្ងៃនៅបរិវេនសាលាស្រុកមង្គលបុរីប្រជាពលរដ្ឋមកពី២ស្រុកក្នុងស្រុកមង្គលបូរី និងក្រុងសិរីសោភ័ណ ជិត៤០០នាក់បានមកស្តាប់និងធ្វើការបញ្ចេញមតិការបើកវេទិការផ្សព្វផ្សាយនិងពិគ្រោះយោបល់របស់ក្រុមប្រឹក្សាខេត្ត។ពិធិនេះមានការចូលរួមលោកគោស៊ុំសារឿតអភិបាលខេត្តបន្ទាយមានជ័យ លោកអីុឡុងសមាជិកក្រុមប្រឹក្សាខេត្ត។វេទិការផ្សព្វផ្សាយនិងពិគ្រោះយោបល់នោះប្រជាពលរដ្ឋជាច្រើនាក់បានលើកឡើងថា មូលហេតុចម្បងដែលធ្វើឲ្យពួកគាត់ចំណាកស្រុកទៅធ្វើការងារនៅប្រទេសថៃ គឺដោយសារតែគ្មានទឹកសម្រាប់បង្ករបង្កើនផល តំណាងប្រជាពលរដ្ឋដែលមកពីស្រុកមង្គលបុរី បានថ្លែងថាបច្ចុប្បន្ននេះពួកគាត់មិនអាចបង្ករបង្កើនផលបាននោះទេ ដោយសារតែពួកគាត់ត្រូវរំពឹងទៅលើទឹកភ្លៀងតែមួយមុខ។នោះគឺព្រោះតែប្រឡាយទឹកមួយខ្សែ ដែលមានប្រវែងប្រមាណជាង៧គីឡូម៉ែត្រ តភ្ជាប់ពីស្ទឹងបវេល សម្រាប់ចែកចាយទឹកដល់ឃុំចំនួន៦ក្នុងស្រុកមង្គលបុរី ត្រូវរីងស្ងួននិងមិនអាចបង្ហូរទឹកមកបាន ដោយសារតែមិនមានការស្តារឡើងវិញ ដូច្នេះហើយទើបធ្វើឲ្យគ្រួសារប្រជាពលរដ្ឋមួយចំនួនធំ ត្រូវបង្ខំចិត្តធ្វើចំណាកស្រុក ដើម្បីជីវភាពរស់នៅប្រចាំថ្ងៃ។ ចំពោះបញ្ហានេះ លោក គោស៊ុំ សារឿត អភិបាលខេត្តបន្ទាយមានជ័យ ដែលបានចូលរួមក្នុងវេទិកានេះ បានថ្លែងថា លោកត្រេកអរពេលដែលបានឮប្រជាពលរដ្ឋលើកឡើងពីបញ្ហា ដើម្បីឲ្យអាជ្ញាធរបានដឹងពីការលំបាករបស់បងប្អូន។ តែយ៉ាងណាក៏ដោយចំពោះបញ្ហាប្រឡាយទឹកនេះ លោកបានបញ្ជាក់ថា អាជ្ញាធរមិនបានព្រងើយកន្តើយឡើយ គឺអាជ្ញាធរបានដាក់គម្រោងរួចហើយទៅកាន់ក្រសួងធនធានទឹក តែដោយសារតែគម្រោងនោះធំ ពេលនេះ ក្រសួងកំពុងតែដាក់ស្នើថវិកា ហើយសង្ឃឹមថា មិនយូរនោះទេ ការស្តារប្រឡាយនឹងចាប់ផ្តើម ដើម្បីអាចឲ្យប្រជាពលរដ្ឋមានទឹកសម្រាប់បង្ករបង្កើនផលកសិកម្ម ដែលនឹងជួយសម្រួលដល់ជីវភាព និងកាត់បន្ថយការធ្វើចំណាកស្រុករបស់ប្រជាពលរដ្ឋផងដែរ៕
