បន្ទាយមានជ័យ៖ រាល់សំណូមពរ និងបញ្ហាប្រឈមនានា របស់ប្រជាពលរដ្ឋដែលបានលើកឡើងក្នុងវេទិកាផ្សព្វផ្សាយពិគ្រោះយោបល់ ក្រុមប្រឹក្សាខេត្តបន្ទាយមានជ័យ កាលពីឆ្នាំ២០១៤ ដែលមានចំនួន១១៤សំណូមពរ ត្រូវបានក្រុមប្រឹក្សាអាជ្ញាធរដោះស្រាយនៅសល់តែ
៩សំណូមពរ ។
នេះបើតាមការលើកឡើងរបស់លោក ចុង ផែត អភិបាលរងខេត្តបន្ទាយមានជ័យ ក្នុងវេទិកាផ្សព្វផ្សាយ និងពិគ្រោះយោបល់ក្រុមប្រឹក្សាខេត្តឆ្នាំ២០១៥ ដែលធ្វើឡើងបន្តបន្ទាប់ទូទាំងខេត្ត ចាប់ពីថ្ងៃទី២៦ តុលា ២០១៥ ។
បញ្ហាប្រឈមទាំង១១៤រួមមាន ផ្នែកសេដ្ឋកិច្ច (ផ្លូវថ្នល់ ស្ពាន លូ ធារាសាស្ត្រ កសិកម្ម អគ្គីសនី ) ដែលផ្នែកសេដ្ឋកិច្ចនេះមានច្រើនជាងគេរហូតដល់ទៅ៥៥សំណូមពរ ក្នុងនោះដោះស្រាយនៅសល់១គឺកសិកម្ម ។ ផ្នែកសង្គមកិច្ចមាន១១សំណូមពរមានទឹកស្អាត អប់រំសុខាភិបាល សុទ្ធតែបានដោះស្រាយទាំងអស់ ។ ផ្នែករដ្ឋបាលសន្តិសុខសណ្តាប់ធ្នាប់សាធារណៈ២៩សំណូមពរ ឆ្លើយតបបាន២៣ នៅសល់៦ រួមមានសាធារណៈ និងសេវារដ្ឋបាល សន្តិសុខសង្គម ។
ផ្អែកតាមបញ្ហាប្រឈមខាងលើ នៅឆ្នាំ២០១៥នេះដែលក្រុមប្រឹក្សា និងគណៈអភិបាលប្រារព្វធ្វើកន្លងទៅនេះដូចជានៅក្នុងស្រុកមង្គលបូរី ឃើញថា ផ្លូវថ្នល់ ប្រព័ន្ធធារាសាស្ត្រ នៅតែជាបញ្ហាដែលពលរដ្ឋលើកឡើង បន្ថែមលើបញ្ហាប្រឈមដូចគ្នាដែលនៅសេសសល់ពីឆ្នាំ២០១៤ ។
ទោះជាយ៉ាងណាក៏ដោយ លោក គោស៊ុំ សារឿត អភិបាលនៃគណៈអភិបាលខេត្តបន្ទាយមានជ័យ បានវាយតម្លៃខ្ពស់ទៅលើប្រជាពលរដ្ឋ អាជ្ញាធរមូលដ្ឋាន ដែលបានលើកឡើងពីក្តីកង្វល់ប្រជាពលរដ្ឋក្នុងមូលដ្ឋាន ហើយរូបលោក និងអង្គភាពពាក់ព័ន្ធរួមគ្នាដោះស្រាយ និងឆ្លើយតបតាមគោលការណ៍ច្បាប់ និងតាមសភាពការណ៍ជាក់ស្តែង សំដៅលើកកម្ពស់ប្រសិទ្ធភាពនៃគោលនយោបាយកំណែទម្រង់ស៊ីជម្រៅរបស់រដ្ឋាភិបាលអាណត្តិទី៥ ដើម្បីធានាចិរភាព ក្នុងកិច្ចអភិវឌ្ឍន៍ ពង្រឹងសន្តិភាព និងលើកកម្ពស់ការផ្តល់សេវាសាធារណៈ ដល់ប្រជាពលរដ្ឋប្រកបដោយសមធម៌ គុណធម៌ ជូនពលរដ្ឋ និងសង្គមជាតិ ៕
