ខេត្តឧត្តរមានជ័យ រថយន្តក្រុងព្រលះជាមួយកូរ៉ូណាស្លាប់២នាក់របួស២នាក់ បុកគ្នាពេញទំហឹងត្រង់ផ្លូវបំបែកជាកែងជា៤ យ៉ាងហោចណាស់មនុស្ស២នាក់ បានស្លាប់ខណៈពេលដែលបញ្ជូនទៅមន្ទីរពេទ្យ និងរងរបួសធ្ងន់២នាក់ ក្នុងហេតុការណ៍គ្រោះថ្នាក់ចរាចរណ៍ រថយន្តក្រុង បុកគ្នាពេញទំហឹង ជាមួយរថយន្តកូរ៉ូណា របស់មន្ត្រីយោធា ហេតុការណ៍នេះ បាន
កើតឡើងនៅវេលាម៉ោង៥និង៣០នាទីល្ងាច ថ្ងៃទី៥ ខែឧសភា ឆ្នាំ២០១៤ នៅចំណុចផ្លូវបំបែកជាបួនផ្លូវ ហាយវ៉េ និងផ្លូវជាតិលេខ PR-១៧៤ ផ្លូវបំបែកក្រុងសំរោង អន្លង់វែង និងច្រកអន្តរជាតិជាំស្រងាំ ស្ថិតនៅក្នុងភូមិស្លែងពណ៌ ឃុំត្រពាំងតាវ ស្រុកអន្លង់វែង ខេត្តឧត្តរមានជ័យ។
ប្រភពព័ត៌មាននៅកន្លែងកើតហេតុ បានឱ្យដឹងថា នៅមុនកើតហេតុ រថយន្តទាំង២គ្រឿង បើកក្នុងទិសដៅប្រសព្វទិសគ្នា ដោយរថយន្តតូយ៉ូតាកូរ៉ូណា ពណ៌ត្រេអ៊ីរបស់មន្ត្រីយោធា បើកបរក្នុងទិសដៅពីកើតទៅលិច ពីទីរួមស្រុកអន្លង់វែង ឆ្ពោះទៅក្រុងសំរោង នៅលើផ្លូវជាតិលេខ PR-១៧៤ ហើយរថយន្តក្រុងធ្វើដំណើរក្នុងទិសដៅពីជើងទៅត្បូង គឺពីច្រកអន្តរជាតិជាំស្រងាំ ឆ្ពោះទៅខេត្តសៀមរាប នៅលើកំណាត់ផ្លូវជាតិហាយវ៉េ មកដល់ចំណុចកើតហេតុ រថយន្តទាំង២គ្រឿង បានបើក
យ៉ាងលឿន ដោយមិនបន្ថយល្បឿន ចំពោះផ្លូវខាងមុខ ជាផ្លូវបំបែកជា៤ ហើយក៏បានព្រលះគ្នាយ៉ាងពេញទំហឹង ដោយរថយន្តក្រុងអូសគាបរថយន្តកូរ៉ូណា ធ្លាក់ចូលប្រឡាយខាងស្តាំ ក្រឡាប់ផ្ងារជើងធ្វើឱ្យកំពិតខ្ទេច រួញចូលគ្នាខូចខាតទាំងស្រុង រីឯរថយន្តក្រុង បានរងការខូចខាតផ្នែកខាងមុខទាំងស្រុងផងដែរ បន្ទាប់មកតៃកុងរថយន្តក្រុងបានចុះរត់គេចខ្លួនបាត់។ ក្នុងហេតុការណ៍គ្រោះថ្នាក់ចរាចរណ៍នេះ មន្ត្រីនគរបាលចរាចរណ៍ស្រុកអន្លង់វែង បានឱ្យដឹងថា រថយន្ត
តូយ៉ូតាកូរ៉ូណាសេរីឆ្នាំ១៩៩៦ ពណ៌ត្រីអ៊ីពាក់ស្លាក់លេខ ខ.ភ.ម០៦លេខ២-១៧១៩បើកបរដោយជនគ្រោះឈ្មោះ នួន លីម អាយុ៤៦ឆ្នាំ ប្រុស ជាមន្ត្រីយោធាពាក់ស័ក្តិ៤ កន្លះ និងអ្នករួមដំណើរម្នាក់ទៀតឈ្មោះ រឹម សំរ៉ស់ ភេទប្រុស ជាមន្ត្រីយោធា អ្នកទាំង២បានស្លាប់នៅក្នុងមន្ទីរពេទ្យជាមួយគ្នា និងអ្នករួមដំណើរ ២នាក់ទៀត បានរងរបួសធ្ងន់ ទី១.ឈ្មោះ ជួន ជាតិប្រុស
ជាមន្ត្រីយោធា និងទី២.ឈ្មោះ ប្រាង្គ ហៅបារាំង ប្រុស ជាមន្ត្រីយោធា ដែលអ្នកទាំង ៤នាក់ បម្រើការងារអង្គភាពយោធា ក្នុងកងពលតូចអន្តរាគមន៍លេខ៤ ហើយពួកគាត់ទាំង៤នាក់ ទើបនឹងតែត្រឡប់មកពីរៀន នៅកងពលធំអន្តរាគមន៍លេខ២ ខេត្តសៀមរាប រីឯរថយន្តក្រុងក្រុមហ៊ុន ហាវសាន់ ដឹកភ្ញៀវកាស៊ីណូ ពណ៌ខៀវឆ្នូតសរ ពាក់ស្លាក់លេខ ភ្នំពេញ ៣A-៣៤៦៩
ដែលអ្នកបើកបរ មិនត្រូវបានស្គាល់អត្តសញ្ញាណ ព្រោះបន្ទាប់ពីកើតហេតុតៃកុងរថយន្ត បានចុះរត់គេចខ្លួនបាត់ស្រមោលតែម្តង។ បន្ទាប់ពីកើតហេតុ សមត្ថកិច្ចផ្នែកចរាចរណ៍ស្រុកអន្លង់វែង បានចុះពិនិត្យដល់កន្លែងកើតហេតុ នឹងរឹបអូសយកវត្ថុតាង រថយន្តមករក្សាទុក នៅស្នាក់នគរបាលស្រុក រងចាំការដោះស្រាយគ្នានៅពេលក្រោយនៅពេលក្រោយ ៕
