ខេត្តសៀមរាប៖យោងតាមពាក្យបណ្តឹងរបស់ម្តាយក្មេងស្រីរងគ្រោះ ត្រូវបានកម្លាំងការិយាល័យនគរបាលប្រឆាំងការជួនដូរមនុស្ស និង ការពារអនីតិជន នៃស្នងការដ្ឋាននគរបាលខេត្តសៀមរាប បានធ្វើការ ស្រាវជ្រាវរហូតឈានដល់ឃាត់ខ្លួនស្ត្រីជាមេខ្យល់ម្នាក់
ពាក់ព័ន្ធទៅនិងការនាំក្មេងស្រីទៅដេកជាមួយភ្ញៀវ នៅតាមផ្ទះសំណាក់ និងសណ្ឋាគារ ក្នុងក្រុងសៀមរាប ។
ក្នុងការប្រតិបត្តិការនេះឃាត់ខ្លួនស្ត្រីជាមេខ្យល់នេះធ្វើឡើងនៅវេលាម៉ោង ១៤និង៥០នាទី ថ្ងៃទី០១ ខែវិច្ឆិការ ឆ្នាំ២០១៥ ស្ថិតនៅក្នុងផ្ទះជនសង្ស័យ ក្នុងភូមិតាភុល សង្កាត់ស្វាយដង្គំ ក្រុងសៀមរាប ដោយមានការបញ្ជាផ្ទាល់ពីលោក កើត សុវណ្ណារ៉េត ព្រះរាជអជ្ញារង អមសាលាដំបូងខេត្ត ដឹកនាំដោយលោកវរសេនីយ៍ត្រី ជា ហេង នាយរងការិយាល័យនគរបាលប្រឆាំងការជូញដូរមនុស្សនិងការពារអនីតិជន រួចនាំយកមកសួរនាំនៅស្នងការ។
លោកវរសេនីយ៍ត្រី ជា ហេង នាយរងការិយាល័យនគរបាលប្រឆាំងការជូញដូរមនុស្សនិងការពារអនីតិជនបានឱ្យដឹងថា កម្លាំងជំនាញបានធ្វើការឃាត់ខ្លួនស្ត្រីម្នាក់ ឈ្មោះ ចេន ម៉ី ភេទស្រី អាយុ៣៥ឆ្នាំ រស់នៅភូមិតាភុល សង្កាត់ស្វាយដង្គុំ ក្រុងខេត្តសៀមរាប ដោយយោងទៅតាមពាក្យប្ដឹង របស់អាព្យាបាលក្មេងស្រីរងគ្រោះ ។លោកបន្តថា ក្រោយពីធ្វើការឃាត់ខ្លួនជនសង្ស័យ រួចមកកម្លាំងសមត្ថកិច្ចបាននាំស្ត្រីដែលជាមេខ្យល់ មកកាន់ការិយាល័យជំនាញ ដើម្បីធ្វើការសាកសួរនាំ។នៅចំពោះមុខសមត្ថកិច្ច ជនសង្ស័យបានឆ្លើយសារភាពថា រួបគេពិតជាបាននាំក្មេងស្រីរងគ្រោះទៅដេកជាមួយភ្ញៀវពិតប្រាកដមែន ដោយក្មេងស្រីដេកជាមួយភ្ញៀវ ម្តងក្នុងតំលៃចាប់ពី ១០០ដុល្លា ទៅ ៣០០ដុល្លា ដោយរួបគេ បានគិតជាភាគរយទៅតាមតំលៃនិមួយៗចាប់ពី ១០ដុល្លា ដល់១០០ដុល្លា ។
បច្ចុប្បន្នជនសង្ស័យត្រូវបានកម្លាំងនគរបាលជំនាញ កសាងសំណុំរឿងបញ្ជូនទៅសាលាដំបូងខេត្តសៀមរាបនៅរសៀលថ្ងៃទី០២ ខែវិច្ឆិការ ឆ្នាំ២០១៥ ដើម្បីចាត់ការទៅតាមផ្លូវច្បាប់៕ 
ដោយ ខេង ឧត្តម
