ខេត្តកំពង់ឆ្នាំង៖ ពិធីបើកបវេសនកាលថ្មីឆ្នាំសិក្សា២០១៥និង២០១៦ និងទិវាដឹងគុណគ្រូ ត្រូវបានកំណត់ធ្វើនៅទូទាំងប្រទេស នៅព្រឹកថ្ងៃទី០១ ខែវិច្ឆិកា ឆ្នាំ២០១៥ ដោយឡែក នៅក្នុងវិទ្យាល័យព្រះបាទសុរាម្រឹត ដែលស្ថិតនៅក្នុងភូមិស្រែព្រីង សង្កាត់កំពង់ឆ្នាំង ក្រុងកំពង់ឆ្នាំង
មានសិក្សានុសិស្សចូលរួមចំនួន២.៦៧៥នាក់ ក្រោមអធិបតីភាពលោក ហ៊ី ណាត អភិបាលរងនៃគណៈអភិបាលខេត្តកំពង់ឆ្នាំង និងដោ យមានការចូលរួមពីលោកគ្រូអ្នកគ្រូ មាតាបីតាសិស្ស ប្រធានមន្ទីរអង្គភាពជុំវិញខេត្ត និងសិក្សានុសិ ស្សយ៉ាងច្រើនកុះករ។
លោក អឿ ម៉េងចុង នាយកវិទ្យាល័យព្រះបាទសុរាម្រឹត បានថ្លែងក្នុងពិធីបើកបវេសនកាលអោយដឹងថា៖ នៅក្នុងឆ្នាំសិក្សា២០១៥, ២០១៦ នេះវិទ្យាល័យបានទទួលសិស្សចូលរៀនចំនួន២.៦៧៥នាក់ ដោយឡែកឆ្នាំចាស់មានសិសចូលរៀនចំនួន២.៧៦១នាក់។ វិទ្យាល័យមានអាគារសិក្សាចំនួន១២ខ្នង សុទ្ធតែទ្រុតទ្រោម ចែកចេញជា៦៤បន្ទប់ និង៦០ថ្នាក់ មានលោកគ្រូអ្នកគ្រូជាបុគ្គលិកសិក្សារួមចំនួន១៨៦នាក់ស្រី៧៣នាក់។ សិស្សប្រឡងជាប់សញ្ញាប័ត្របឋមភូមិបាន៣៦១នាក់ ស្មើនិង៩៨,៣៦% ប្រឡងសញ្ញាប័ត្រទុតិយភូមិបាន២៥០នាក់ ស្មើ និង៦២,១៨% សិស្សបានទទួលនិទ្ទេសល្អណាស់ ( B ) ចំនួន៧នាក់ មានស្រី៤នាក់។
នៅក្នុងឆ្នាំសិក្សា២០១៤ , ២០១៥ សិស្សថ្នាក់ទី៩ ក្នុងវិទ្យាល័យបានប្រឡងជាប់ជាសិស្សពូកែថ្នាក់ជាតិចំនួន៣នាក់ មានស្រី១នាក់ គឺមុខវិទ្យារូបវិទ្យាជាប់ចំណាត់ថ្នាក់លេខ៧ មួយនាក់ ឈ្មោះ អ៊ឺង ម៉ាភីណែត ភេទប្រុស និងមុខវិទ្យាគណិតវិទ្យាជាប់ចំណាត់ថ្នាក់លេខ៦ មួយនាក់ជាសិស្សស្រីឈ្មោះ ឈួនគឹមសាំង និងជាប់ចំណាត់ថ្នាក់លេខ៧មួយនាក់ជាសិស្សប្រុសឈ្មោះ សៀក ពិសី ។
លោក ហ៊ី ណាត អភិបាលរងខេត្តកំពង់ឆ្នាំងបានផ្តាំផ្ញើ ដល់សិស្សានុសិស្សទាំងអស់ សូមខិតខំរៀនសូត្រអោយប្រឡងជាប់មាននិទ្ទេសល្អនៅក្នុងឆ្នាំសិក្សា២០១៥ , ២០១៦ខាងមុខនេះ ដោយត្រូវស្តាប់និងអនុវត្តតាមដំបូន្មានរបស់ឪពុកម្តាយ លោកគ្រូអ្នកគ្រូ ដើម្បីធ្វើខ្លួនអោយក្លាយជាកូនល្អ មិត្តល្អ សិស្សល្អ និងជាប្រជាពលរដ្ឋល្អ មានតំរិះវិជ្ជាខ្ពង់ខ្ពស់ទៅអនាគត ដើម្បីចូលរួមអភិវឌ្ឍន៍សង្គមជាតិអោយមានការរីកចំរើនលើគ្រប់វិស័យ ដោយត្រូវយល់ដឹងថា « វិជ្ជាជាអាហារ ប្រាជ្ញាជាអាវុធ , ទំពាំងស្នងឬស្សី កុលបុត្រប្រុសស្រីស្នងប្រទេសជាតិ »។ ទន្ទឹមនោះដែរត្រូវចូលរួមគោរពច្បាប់ចរាចរណ៍ជិះម៉ូតូពាក់មួកអោយបានទាំងអស់គ្នា និងត្រូវជៀសអោយឆ្ងាយពីគ្រឿងញៀន និងមិនត្រូវធ្វើខ្លួនជាក្មេងទំនើង ដែលសង្គមស្អប់ខ្ពើមនោះឡើយ។
ដោយឡែកនៅសាលាបឋមសិក្សាគំរូក្រុងកំពង់ឆ្នាំង ក្នុងថ្ងៃបើកបវេសនកាលថ្មី ឆ្នាំសិក្សា២០១៥-២០១៦នេះដែរ លោកគ្រូអ្នកគ្រូសិស្សនុសិស្សបាន ធ្វើពីធីដើរដង្ហែរក្បូនឃោសនា នៅក្នុងទីរួមខេត្តកំពង់ឆ្នាំង ដើម្បីអំពាវនាវសុំអោយមាតាបិតា អាណាព្យាបាល បញ្ជូនកូនចៅដែលគ្រប់អាយុ៦ឆ្នាំអោយមកចុះឈ្មោះចូលចូលរៀនដោយឥតបង់ប្រាក់ឡើយ។ នៅក្នុងពិធីដង្ហែក្បួនឃោសនានេះ មានការចូលរួមពីលោកគ្រូអ្នកគ្រូ និងសិស្សានុសិស្សសរុបជិត២០០នាក់ផងដែរ៕
