ខេត្តប៉ៃលិន៖ ថ្លែងក្នុងឪកាសពិធីបើកបវេសនាកាល សម្រាប់ ឆ្នាំសិក្សា ២០១៥–២០១៦ ដែលប្រព្រឹត្តទៅនៅវិទ្យាល័យ ហ៊ុន សែន សាលាក្រៅ នាព្រឹកថ្ងៃទី០២ ខែវិច្ឆិកា ឆ្នាំ២០១៥ លោកស្រី ពៅ សុខ សមាជិកក្រុមប្រឹក្សាខេត្តប៉ៃលិន បានឲ្យដឹងថាថ្ងៃបើកបវេសនាកាល ជាថ្ងៃដ៏មានសារៈសំខាន់ និងមានអត្ថន័យដ៏ធំធេងសម្រាប់វិស័យអប់រំនៅក្នុងព្រះរាជាណាចក្រកម្ពុជា ពីព្រោះជាថ្ងៃបើកបវេសនកាលឆ្នាំសិក្សាថ្មីសម្រាប់សិស្សានុសិស្សជាទីស្រឡាញ់របស់យើងទាំងអស់គ្នា ។ ដែលពិធីនេះបានប្រព្រិត្តទៅក្រោម អធិបតីភាព លោកស្រី ពៅ សុខ សមាជិកក្រុមប្រឹក្សាខេត្តប៉ៃលិន ,លោក សំ សារ៉េត អភិបាលស្រុកសាលាក្រៅ ,លោក ជា អ៊ិត អនុប្រធានមន្ទីរអប់រំ យុវជន និងកីឡាខេត្ត ព្រមទាំងមានចូលរួមពីសំណាក់លោកគ្រូ អ្នកគ្រូ សិស្សានុសិស្ស មាតាបិតាសិស្ស ប្រមាណជា7០០នាក់ ។
លោក កឹម លេន នាយកសាលាវិទ្យាល័យ ហ៊ុន សែន សាលាក្រៅ បានឲ្យដឹងថា៖ វិទ្យាល័យ ហ៊ុន សែន សាលាក្រៅ ជាវិទ្យាល័យមួយក្នុងស្រុកសាលាក្រៅ មានអាគារសិក្សាចំនួន៤ខ្នង ២៤ បន្ទុប ,ហើយក្នុងឆ្នាំសិក្សា២០១៥-២០១៦ នេះ មានសិស្សចំនួន៥៩០នាក់ ក្នុងនោះសិស្សស្រីចំនួន២៩០នាក់ ព្រមទាំងមានបុគ្គលិកសិក្សាចំនួន៤៥នាក់ ,ស្រី១០នាក់ ។ លោកនាយកសាលាបន្តទៀតថា៖ នៅឆ្នាំ២០១៣-២០១៤ នៅវិទ្យាល័យមួយនេះ ត្រួវបានរងគ្រោះដោយទឹកជំនន់ តែក្រោយមកដោយមានការចូលរួមពីសំណាក់ថ្នាក់ដឹកនាំខេត្ត , អង្កការដៃគូអភិវឌ្ឍន៏ ,ពិសេសមាតាបិតាសិស្ស និងសប្បុរសជនជួយ ថ្នាក់ដឹងនាំសាលាបាននិងកំពុងយកចិត្តទុកដាក់លើការអភិវឌ្ឍន៏ និងគុណភាពនៃសិក្សាផងដែរ ។ លោកបានសំណូមពរសុំឲ្យអាជ្ញាធរខេត្ត ស្រុក និងអង្កការដៃគូអភិវឌ្ឍន៏នាៗ មេត្តាជួយធ្វើផ្លូវចូលវិទ្យាល័យនេះផង ព្រោះវាមានការពិបាកសម្រាប់សិស្សានុសិស្សចេញ ចូលសាលា ។
លោក សំ សារ៉េត អភិបាលស្រុកសាលាក្រៅ បានអានសារលិខិតរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងឪកាសបើកបវេសនកាល ឆ្នាំសិក្សា ២០១៥–២០១៦ ដោយបញ្ជាក់ថា៖ នាកន្លងទៅថ្មីៗនេះ ក្រសួងអប់រំ ត្រួវបានដើរតួនាទីយ៉ាងសំខាន់ ប្រកបដោយការទទួលខុសត្រូវខ្ពស់ក្នុងការកែទម្រង់ការងាររៀបចំការប្រឡងសញ្ញាបត្រមធ្យមសិក្សាទុតិយភូមិ ហើយសម្រេចបានលទ្ធផលជាវិជ្ជមានដែលអាចទាក់ទាញមហាជនឲ្យមានការជឿជាក់កាន់តែខ្ពស់ចំពោះវិស័យអប់រំ នៅកម្ពុជា ។ ជាមួយគ្នានេះដែរ ក្នុងសារលិខិតរបស់សម្ដេច បានសម្ដែងនូវការអបអរសាទរ ព្រមទាំងលើកទឹកចិត្តចំពោះក្មួយៗសិស្សានុសិស្ស ដែលប្រឡងជាប់សញ្ញាបត្រមធ្យមសិក្សាទុតិយភូមិថ្មីៗនេះ គ្រប់និទ្ទេស និងសូមឲ្យក្មួយៗបញ្ចេញអស់ពីសមត្ថភាពដែលខ្លួនមាន ដើម្បីបន្តការសិក្សាឲ្យខ្ពង់ខ្ពស់បន្ថែមទៀត ។ ក្នុងសារលិខិតបញ្ជាក់ទៀតថា៖ សម្តេច គាំទ្រ និងជំរុញលើកទឹកចិត្តចំពោះក្រុមស្រាវជ្រាវអប់រំ ដែលជាធនាគារខួរក្បាលនៃការកែទម្រង់ការអប់រំ អភិវឌ្ឍជំនាញបច្ចេកទេស ហើយសូមបន្តនូវកិច្ចខិតខំប្រឹងប្រែងបន្ថែមទៀត ដើម្បីអភិវឌ្ឍវិស័យអប់រំរបស់យើងឲ្យឈានឆ្ពោះទៅមុខទៀត។ ក្នុងការបើកបវេសនកាលឆ្នាំសិក្សាថ្មីនេះ សម្តេច ក៏បានរំលឹកដាស់តឿន និងសូមផ្តាំទៅក្មួយៗ សិស្សានុសិស្ស និងយុវជន យុវនារីទាំងអស់ថា បើយើងស្រឡាញ់ខ្លួន ស្រឡាញ់ឪពុកម្តាយ និងស្រឡាញ់អនាគតដ៏រុងរឿង គឺនៅឲ្យឆ្ងាយពីគ្រឿងញៀន ចូរក្មួយៗប្រតិបត្តិច្បាប់ចរាចរណ៍ឲ្យបានខ្ជាប់ខ្ជួនដើម្បីធានាបាននូវសុវត្ថិភាព រក្សាបាននូវសេចក្តីថ្លៃថ្នូរដល់សង្គមជាតិយើងទាំងមូល។ លើសពីនេះទៀតសម្តេចសូមស្នើឲ្យមាតាបិតា ឬអាណាព្យាបាលសិស្ស សហគមន៍ និងអាជ្ញាធរដែនដីគ្រប់លំដាប់ថ្នាក់ត្រូវចូលរួមឲ្យសកម្ម ក្នុងការជួយអប់រំកូនចៅឲ្យបានល្អ ទាំងផ្នែកអនាម័យ សុខភាព ចំណេះដឹង និងសីលធម៌ ដើម្បីបន្តលើកកម្ពស់កិត្តិយសសង្គមជាតិកម្ពុជាស័ក្តិសម ជាប្រជាជាតិមួយដែលមានឈាមជ័របន្តពីសម័យអង្គរដ៏រុងរឿងនេះយើង។
ក្នុងឪកាសនោះដែរ លោកស្រី ពៅ សុខ សមាជិកក្រុមប្រឹក្សាខេត្តប៉ៃលិន មានប្រសាសន៏ថា៖ ប៉ៃលិនជាខេត្តមួយតូចជាងគេ ក៏ប៉ុន្តែប្រព័ននៃការអប់រំ មានការរីកចំរើនខ្លាំង នេះដោយសារថ្នាក់ដឹកនាំខេត្ត ពិសេសលោកគ្រូ អ្នកគ្រូ បានយកចិត្តទុកដាក់ក្នុងការបង្រៀនសិស្ស ដូច្នោះថ្ងៃបើកបវេសនកាលឆ្នាំនេះ ជាថ្ងៃដែលមានសារៈសំខាន់ និងអត្ថន័យធំធេងសម្រាប់វិស័យអប់រំនៅកម្ពុជាយើង ។ លោកស្រីបន្តថា៖ ការប្រឡងសញ្ញាបត្រមធ្យមសិក្សាទុតិយភូមិនៅឆ្នាំសិក្សា ២០១៥–២០១៦ នេះសិស្សប្រឡងបាននិទ្ទេស A មានចំនួនរហូតដល់ ១០៨នាក់ ក្នុងនោះខេត្តប៉ៃលិនក៏មានម្នាក់ដែរដែលទទូលបាននិទ្ទេស A រៀននៅវិទ្យាល័យ ហ៊ុន សែន ក្រុងទេពនិមិត្តប៉ៃលិន ចំណែកវិទ្យាល័យ ហ៊ុន សែន សាលាក្រៅ ដែលមានចំនួនសិស្សប្រឡងសញ្ញាបត្រមធ្យមសិក្សាទុតិយភូមិ ៣៧នាក់ យើងឃើញថាបានជាប់រហូតដល់ទៅ៣១នាក់ ដូច្នោះការអប់រំក្នុងខេត្តគឺមានការរីកចំរើនខ្លាំង ។ លោកស្រី បានស្នើឲ្យមាតាបិតា ឬអាណាព្យាបាលសិស្ស សហគមន៍ និងអាជ្ញាធរដែនដីគ្រប់លំដាប់ថ្នាក់ត្រូវចូលរួមឲ្យសកម្ម ក្នុងការជួយអប់រំកូនចៅឲ្យបានល្អ ទាំងផ្នែកអនាម័យ សុខភាព ចំណេះដឹង និងសីលធម៌ ដើម្បីបន្តលើកកម្ពស់កិត្តិយសសង្គមជាតិ ពិសេសខេត្តប៉ៃលិនយើង ៕
