ខេត្តប៉ៃលិន៖ បុរសម្នាក់ដោយអាងខ្លួនជាប្អូនបង្កើតរបស់អធិការក្រុងប៉ៃលិន បានធ្វើសកម្មភាពជេរបញ្ជោរក្នុងផ្ទះគេ រួចវាយម្ចាស់ផ្ទះ ព្រមទាំងហៅបងដែលជាអធិការឲ្យនាំកម្លាំងមកចាប់កូនស្រីគេ យកទៅកាន់អធិការដ្ឋាននគរបាលក្រុង និងបញ្ជូនបន្តទៅស្នងការដ្ឋាននគរបាលខេត្ត ដោយធ្វើការឃុំខ្លួនរយៈពេល២យប់៣ថ្ងៃ ព្រោះតែការខ្ចីលុយ ចងការប្រាក់ ។ ហេតុការខាងលើនេះ បានកើតឡើងកាលពីវេលាម៉ោង១១ និង១០នាទីព្រឹក ថ្ងៃទី០២ ខែវិច្ឆិកា ឆ្នាំ២០១៥ ស្ថិតនៅផ្ទះស្ត្រីរងគ្រោះ ភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន ខេត្តប៉ៃលិន ។
ប្រភពព័ត៌មានពីកន្លែងកើតហេតុ បានឲ្យដឹងនៅព្រឹកថ្ងៃទី០៤ ខែវិច្ឆិកា ឆ្នាំ២០១៥ថា៖ នៅថ្ងៃកើតហេតុគេឃើញបុរសម្នាក់ដែលគេស្គាល់ថា ជាប្អូនរបស់លោកអធិការក្រុងប៉ៃលិន បានចូលទៅក្នុងផ្ទះស្រី្តរងគ្រោះ តែប្រភពមិនបានដឹងថា តើបុរសម្នាក់នេះចូលធ្វើអ្វីនោះឡើយ ។ ប្រភពព័ត៌មានបានបន្តថា៖ មួយសន្ទុះក្រោយមក ស្រាប់តែឮសំឡេងបុរសខាងលើជេរបញ្ជោរស្ត្រីរងគ្រោះ ព្រមទាំងលោតទៅទះកំភ្លៀងស្ត្រីរងគ្រោះមួយដៃ ព្រមទាំងប្រតាយប្រតប់គ្នាទៀតផង ។ បន្ទាប់មកគេឃើញស្ត្រីម្នាក់ទៀត ដែលគេស្គាលថាជាកូនស្រីរបស់ស្ត្រីរងគ្រោះ ស្ទុះមកជួយដោយគប់កែវថ្ម សម្រាប់ដាក់ស្លាប់ព្រាទៅលើបុរសនោះបណ្តាលឲ្យបែកឈាមហូរពេញអាវ ផ្នែកខាងក្រោយ ,ពេលនោះបុរសដែលជាជនសង្ស័យ និងជាជនរងគ្រោះ បានទេទូរស័ព្ទហៅបងប្រុសដែលជាអធិការក្រុង ឲ្យមកជួយដោះស្រាយ ។ ប្រភពព័ត៌មានបន្តទៀតថា៖ ភ្លាមនោះស្រាប់តែ គេឃើញមានកម្លាំងអធិការនគរបាលក្រុងចំនួន ០៣ រថយន្ត មកឈប់ ដោយមានក្រឡាបញ្ជីមកជាមួយ ហើយក៏ចាប់កូនស្រីស្ត្រីរងគ្រោះដាក់លើឡាន ដោយមិននិយាយឲ្យដឹងសាច់រឿង យកទៅកាន់អធិការដ្ឋាននគរបាលក្រុងប៉ៃលិនផងដែរ ។
បើតាមស្ត្រីរងគ្រោះឈ្មោះ ចាន់ ស៊ីវន អាយុ៥៨ឆ្នាំ រស់នៅភូមិប៉ាហ៊ីត្បូង បានរៀបរាប់ទាំងអ៊ួលដើមក ប្រាប់អ្នកយកព័ត៌មានកម្ពុជាថ្មីនៅព្រឹកថ្ងៃទី០៤ ខែវិច្ឆិកា ឆ្នាំ២០១៥ នេះថា៖ នៅថ្ងៃកើតហេតុគឺគាត់នៅបន្ទប់ខាងក្រោយផ្ទះកំពុងធ្វើម្ហូប ស្រាប់តែឮមានការឡូរឡា រូបគាត់ក៏ចេញមកមើល ក៏ឃើញកូនស្រីគាត់ឈ្មោះ ណាំ រីណា ហៅស្រីណូ កំពុងប្រកែកគ្នាជាមួយឈ្មោះ លឹម ដារា ពាក់ព័ន្ធលុយប្រចាំខែ ដែលបានខ្ចី ។ ពេលគាត់ចេញមកមិនបាននិយាយអ្វីផង ស្រាបតែឈ្មោះ លឹម ដារា បានស្រែកជេរប្រមាទរូបគាត់ថា«មីកញ្ចាស់ ពួកង៉ែងចង់ធ្វើអីអាញ់» ព្រមទាំងលោតទៅទះកំភ្លៀងគាត់មួយដៃ ហើយក៏មានការវាយគ្នាចុះឡើង ។ ស្ត្រីរងគ្រោះបន្តទៀតថា៖ ពេលនោះកូនរបស់គាត់ឈ្មោះ ណាំ រីណា ហៅស្រីណូ ឃើញដូច្នោះក៏ទាញកែវថ្ម សម្រាប់ដាក់ស្លាប់ព្រា គប់ទៅលើឈ្មោះ លឹម ដារា ដែលជាជនបង្ក ព្រោះដើម្បីជួយម្តាយ បណ្តាលឲ្យបែកឈាមហូរពេញអាវ ផ្នែកខាងក្រោយ ក្នុងគ្រានោះដែរឈ្មោះ លឹម ដារា បានទេទូរស័ព្ទហៅបងប្រុសដែលជាអធិការក្រុង ឲ្យមកជួយដោះស្រាយ ។ ភ្លាមនោះស្រាប់តែ មានកម្លាំងអធិការនគរបាលក្រុងចំនួន ០៣ រថយន្ត មកឈប់ ព្រមទាំងមានក្រឡាបញ្ជីមកជាមួយផង ក៏ចាប់កូនស្រីគាត់ដាក់លើឡាន ដោយមិននិយាយអ្វីទាំងអស់ យកទៅកាន់អធិការដ្ឋាននគរបាលក្រុងប៉ៃលិនបាត់តែម្តង ។
ប្រភពព័តមានសូមមិនបញ្ជេញឈ្មោះ បានបង្ហើប្រាប់អ្នកយកព័ត៌មានកម្ពុជាថ្មីនៅព្រឹកថ្ងៃទី០៤ ខែវិច្ឆិកា ឆ្នាំ២០១៥ នេះថា៖ បុរសដែលចូលទៅវាយស្ត្រីរងគ្រោះមានឈ្មោះ លឹម ដារា អាយុ៣៧ឆ្នាំ មុខរបរមិនពិតប្រាកដ ជាប្អូនរបស់លោកអធិការក្រុងប៉ៃលិន ឈ្មោះ លឹម វាសនា ។ ប្រភពព័ត៌មាន បានលើកជាសំនួរថា តើបុរសឈ្មោះលឹម ដារា អាងខ្លូនជាប្អូនរបស់អធិការឬ បានជាហ៊ានចូលទៅវាយគេដល់ក្នុងផ្ទះ ដោយមិនញញើតច្បាប់ ព្រមទាំងឲ្យបងប្រុសដែលជាអធិការក្រុងចាប់កូនស្រីគេ យកទៅកាន់អធិការដ្ឋាននគរបាលក្រុងប៉ៃលិនទៀតនោះ ៕
