ខេត្តប៉ៃលិន៖ ដោយមានការយកចិត្តទុកដាក់ពីថ្នាក់ដឹកនាំ និងភាពសាមគ្គីគ្នាក្នុងអង្គភាព នៅព្រឹកថ្ងៃទី ០៥ ខែវិច្ឆិកា ឆ្នាំ២០១៥ នេះ កម្លាំងដែលជានាយ និងពលអាវុធហត្ថខេត្តប៉ៃលិន បានចូលរួមគ្នាបរិច្ចាកឈាម ដើម្បីធ្វើការសង្គ្រោះដល់លោក ជា សុមេធ ដែលមានជំងឺលើសឈាមដួលសន្លប់ កាលពីថ្ងៃទី០៣ ខែវិច្ឆិកា ឆ្នាំ២០១៥ ហើយត្រួវបានកម្លាំងកងរាជអាវុធហត្ថដឹកបញ្ជូនមកសង្គ្រោះនៅមន្ទីរពេទ្យបង្អែកខេត្តប៉ៃលិនភ្លាមៗ ។
តាមប្រភពព័ត៌មានពីមន្ត្រីកងរាជអាវុធហត្ថខេត្ត បានឲ្យដឹងដែរថា៖ ដោយមើលឃើញពីទង្វើល្អរបស់លោក ជា សុមេធ និងដោយមានការយកចិត្តទុកដាក់ពីលោក វ៉ាន់ ណាឡុង មេបញ្ជាការកងរាជអាវុធហត្ថខេត្ត កម្លាំងកងរាជអាវុធហត្ថខេត្ត ដែលមាននាយអាវុធហត្ថ និងពលអាវុធហត្ថ បានចូលរួមបរិច្ចាកឈាម ធ្វើការសង្គ្រោះដល់លោក ជា សុមេធ ដែលកំពុងមានការខ្វះឈាម និងកំពុងសង្គ្រោះបន្ទាន់នៅមន្ទីរពេទ្យបង្អែកខេត្តប៉ៃលិន ។ តាមប្រភពព័ត៌មានបន្តថា៖ លោក ជា សុមេធ បានដួលសន្លប់ក្នុងពេលកំពុងបំពេញការងារនៅកន្លែងធ្វើការរបស់ខ្លួន ដោយជំងឺលើសឈាម កាលពីថ្ងៃទី ០៣ ខែវិច្ឆិកា ឆ្នាំ២០១៥ ក្នុងកងរាជអាវុធហត្ថខេត្ត ស្ថិតក្នុងភូមិទឹកថ្លា សង្កាត់ប៉ៃលិន ក្រុងប៉ៃលិន ខេត្តប៉ៃលិន ។ ប្រភពព័ត៌មានបានបន្តទៀតថា៖ ការដែលពួកគាត់មកបរិច្ចាកឈាមថ្ងៃនេះ គឺដើម្បីបញ្ជាក់ពីសាមគ្គីភាពគ្នាក្នុងអង្គភាពកងរាជអាវុធហត្ថ និងមើលឃើញពីទង្វើល្អរបស់លោក ជា សុមេធ ដែលជាមនុស្សស្មោះត្រង់ចំពោះថ្នាក់ដឹកនាំ និងជានាយអាវុធហត្ថម្នាក់ ដែលគោរពតួនាទី មានភាពម៉ើងម៉ាត់ក្នុងកាងារ សង្កមជាតិ ។ ប្រភពព័ត៌មានបន្តថា៖ ក្នុងការចូលរួមបរិច្ចាកឈាមនេះដែរ គឺមាននាយអាវុធហត្ថ និងពលអាវុធហត្ថសរុបចំនួន០៨នាក់ ហើយក្នុងការបរិច្ចាកឈាមនេះ គឺយកតែប្រភេទឈាមអូ(O) តែប៉ុណ្ណោះ ព្រោះឈាមលោក ជា សុមេធ ជាប្រភេទឈាមអូ(O) ។
សូមបញ្ជាក់ថា៖ លោក ជា សុមេធ ជានាយការិយាល័យប្រភពកម្លាំង នៃបញ្ជាការដ្ឋានកងរាជអាវុធហត្ថខេត្តប៉ៃលិន រូបគាត់មានជំងឺលើសឈាមជាយូមកហើយ នៅថ្ងៃកើតហេតុរូបគាត់បានដួលសន្លាប់នៅក្នុងកន្លែងធ្វើការ ហើយត្រួវបានកម្លាំងក្នុងបញ្ជាការដ្ឋានដឹកមកសង្គ្រោះនៅមន្ទីរពេទ្យបង្អែកខេត្តប៉ៃលិន ។ ដោយជំងឺមានសភាពធ្ងន់ធ្ងរ និងមានការខ្វះនូវឈាម ទើបកងកម្លាំងក្នុងបញ្ជាការដ្ឋានកងរាជអាវុធហត្ថ ចូលរួមគ្នា ដើម្បីបរិច្ចាកឈាម ជួយសង្គ្រោះតែម្តង និងដើម្បីបញ្ជាក់ពីសាមគ្គីភាពគ្នា ក្នុងអង្គភាព កងរាជអាវុធហត្ថខេត្តប៉ៃលិន ៕
