ភ្នំពេញ: នៅព្រឹកថ្ងៃទី០៦ ខែឧសភា ឆ្នាំ ២០១៤ នេះ លោកវរសេនីត្រី ហៀក ថារ៉េត អធិការរងខណ្ឌចំការមនទទួលបន្ទុកបទល្មើសព្រហ្មទណ្ឌបានបញ្ជាក់ប្រាប់ឲ្យដឹងថាជន សង្ស័យ២នាក់ដែលសមត្ថកិច្ចនគរបាលប៉ុស្តិ៍ទួលទំពូងទី២សហការជាមួយប្រជាពលរដ្ឋ ចាប់ឃាត់ខ្លួនបានកាលពីល្ងាចថ្ងៃទី០៥ ខែ ឧសភា ឆ្នាំ២០១៤ នៅចំណុចមុខផ្ទះលេខ ៥៥៤ ផ្លូវលេខ១៦៣កែងផ្លូវលេខ៤៣២ សង្កាត់ទួលទំពូងទី២ ខណ្ឌចំការមន ពាក់ព័ន្ធនឹងបទល្មើសព្រហ្មទណ្ឌ គឺពួកជនសង្ស័យទាំង២នាក់នេះបានសហការគ្នាធ្វើសកម្មភាពកាច់កម៉ូតូរបស់ប្រជាពលរដ្ឋដែលទុកនៅមុខផ្ទះបានសម្រេច គឺត្រូវសមត្ថកិច្ចកសាងសំណុំរេឿងបញ្ជូនខ្លួនពួកគេទៅសាលាដំបូងរាជធានីភ្នំពេញនៅព្រឹកនេះ។
លោកអធិការរងបានបន្តថា ជនសង្ស័យ២នាក់ ខាងលើនេះទី១ ឈ្មោះ ជា សុខ ភេទប្រុសអាយុ ៣៦ឆ្នាំស្នាក់នៅផ្ទះគ្មានលេខ ភូមិក្រវា ឃុំក្រវា ស្រុកបារាយ ខេត្តកំពង់ធំ ទី២ ឈ្មោះ លឹម សំណាង ភេទប្រុសអាយុ ៣៤ ឆ្នាំ ស្នាក់នៅភូមិព្រែក
សំរោង ឃុំតាខ្មៅ ក្រុងតាខ្មៅ ខេត្តកណ្តាល ។ ចំណែកម្ចាស់ម៉ូតូឈ្មោះ ទូច ស៊ីណាត ភេទប្រុសអាយុ ២៤ ឆ្នាំ មុខរបរបុគ្គលិកក្រុមហ៊ុន តូតាល់ ស្នាក់នៅផ្ទះ ជួល សង្កាត់ទឹកថ្លា ខណ្ឌសែនសុខ នឹងម៉ូតូម៉ាកសេ ១២៥ ពណ៌ខ្មៅពាក់ស្លាកលេខ 1CJ 6651 ។
សមត្ថកិច្ចបានបន្តថាមុនពេលកើតហេតុគឺជនរងគ្រោះបានទុកម៉ូតូនៅលើចិញ្ចើមផ្លូវ ហើយដើរទៅក្រៅ បាត់ លុះបានប្រហែលជាងកន្លះម៉ោងស្រាប់តែលេចមុខជនសង្ស័យចំនួន២នាក់ ដើរស្មើរជើងមកដល់ចំណុចមុខ ផ្ទះលេខ ៥៥៤ ឃើញឱកាសល្អក៏ធ្វើសកម្មភាពកាច់ម៉ូតូបានសម្រេចហើយព្យាយាមជិះគេចខ្លួនប៉ុន្តែត្រូវបាន បងប្អូនអ្នករត់ម៉ូតូឌុប នឹង
ប្រជាពលរដ្ឋ បានសហការជាមួយនឹងសមត្ថកិច្ចនគរបាលមូលដ្ឋានដេញតាមចាប់ បាននៅចំណុចជាប់ផ្សារទួលទំពូង ដោយសារផ្លូវស្ទះចរាចរណ៍ខ្លាំងពេកហើយក្រុមចោរចុះពីលើម៉ូតូរត់គេចខ្លួន ឡើងលើផ្ទះប្រជាពលរដ្ឋ ៕
