ខេត្តប៉ៃលិន៖ ហេតុការណ៏ផ្ទុះម៉ូទ័របូមសាំងរបស់ស្ថានីយ៏ប្រេងឥន្ធនៈបូរីប៉ៃលិន បណ្តាលឲ្យកម្មករ២ទៅ៣នាក់ និងម្ចាស់រថយន្តភ័យព្រលឹងចុកសក់ ខណៈពេលកំពុងចាក់សាំងចូលក្នុងរថយន្ត ។ ហេតុការណ៏ដ៏កម្រមាននេះ បានកើតឡើងកាលពីវេលាម៉ោង៤និង៣០នាទី
រសៀល ថ្ងៃទី០៦ ខែវិច្ឆិកា ឆ្នាំ២០១៥ ស្ថិតនៅទល់មុខមីក្រូហិរញវត្ថុក្រេឌីត ក្នុងភូមិអូរតាពុកលើ សង្កាត់ប៉ៃលិន ក្រុងប៉ៃលិន ខេត្តប៉ៃលិន ។
ប្រភពព័ត៌មានពីកន្លែងកើតហេតុ បានឲ្យដឹងថា៖ មុនពេលកើតហេតុគេឃើញរថយន្តមួយគ្រឿងម៉ាកវីហ្គូ ចូលទៅចាក់ប្រេងនៅស្ថានីយ៏ ដែលមានយីហោបូរីប៉ៃលិន មិនយូរប៉ុន្មានក៏ឮសូរសំឡេងផ្ទុះដូចរន្ទះ ព្រមទាំងមានភ្លើងឆាបឆេះឡើង ធ្វើឲ្យកម្មករ និងម្ចាស់រថយន្តភិតភ័យ ស្រែកស្លន់ស្លោរឲ្យគេជួយ ។ ប្រភពព័ត៌មានបន្តថា៖ ក្រោយមកក៏មានកម្មករ២ទៅ៣នាក់ បានយកធុងពន្លត់អគ្គីភ័យ មកបាញ់ពីលើ ទើបបណ្តាលឲ្យរលត់អស់ ហើយក៏មិនបណ្តាលឲ្យមានគ្រោះថ្នាក់ដល់អាយុជីវិតមនុស្សឡើយ ។
បើតាមស្រី្តដែលជាម្ចាស់រថយន្តឈ្មោះ ស្រី យ៉ា អាយុ៣៤ឆ្នាំ បានរៀបរាប់ថា៖ នៅមុនពេលកើតហេតុរូបគាត់បានបើកបររថយន្តពីផ្ទះមកចាក់ប្រេងសាំង នៅស្ថានីប្រេងឥន្ធនៈយីហោបូរីប៉ៃលិន លុះពេលដែលកម្មករម្នាក់ កំពុងចាក់ប្រេងជិតរួច ស្រាប់តែលឺសូរសំឡេងផ្ទុះដូចរន្ទះ រួមទាំងមានអណ្ដាត់ភ្លើង យ៉ាងក្រហម ភ្លាម់ៗនោះកម្មករ២ទៅ៣នាក់ ដែលធ្វើការនៅទីនោះ បានរត់ទៅយកធុងពន្លត់អគី្គភ័័យចំនួន០៣ទៅ០៤ ធុង យកមកបាញ់ពីលើ ដើម្បីឲ្យរលត់ ។ រូបគាត់បន្តថា៖ គ្រានោះគាត់មានការភិតភ័យយ៉ាងខ្លាំង ដោយខ្លាចមានគ្រោះថ្នាក់ដល់អាយុជីវិត និងខូចខាតរថយន្ត ប៉ុន្តែសំណាងមិនមានបញ្ហាអ្វីទាំងអស់ ។ រូបគាត់បានសំណូមពរថា គ្រប់ស្ថានីយ៏ប្រេងឥន្ធនៈទាំងអស់ មេត្តាមុននិងចាក់សាំងឲ្យគេមិនថារថយន្ត ឬ ម៉ូតូ ត្រួវពិនិត្យមើលឧបករណ៏ឲ្យបានល្អ ដើម្បីជៀសវាងបញ្ហាផ្សេងៗជាយថាហេតុ ដូចករណីនេះ ៕
