សៀមរាប ៖ ក្រុមអង្គការការពារ សត្វព្រៃហៅកាត់ថា អង្គការវៃអេត សហការជាមួយរដ្ឋបាលព្រៃឈើនិងកងរាជអាវុធហត្ថបានចុះ ឆែកឆេរតាមហាងផឹកស៊ីចំនួន២កន្លែងនិងចាប់យកសត្វព្រៃបានមួយចំនួន ក្នុងក្រុងសៀមរាបដែលល្បី ខាងលក់សត្វព្រៃរាប់ឆ្នាំមកហើយនោះ រួច ទៅ
ប្រលែងនៅក្នុងតំបន់រមណីយដ្ឋានអង្គរវត្ត។
ប្រតិបត្តិការចុះបង្ក្រាបសត្វព្រៃក្នុងហាងមិនធ្លាប់មានពីមុខមកនោះបានធ្វើឡើងកាលពីថ្ងៃទី៥ ខែវិច្ឆិកា ឆ្នាំ២០១៥ត្រង់ចំណុចផ្លូវ៦០ម៉ែត្រ និងក្រោយស្តាតចាស់ នៃក្រុងសៀមរាប។
លោកម៉ុងប៊ុនលីមនាយផ្នែករដ្ឋបាលព្រៃឈើបន្ទាយស្រីបានឲ្យដឹងថា ហាងទី១ឈ្មោះម្លប់ស្បូវសៀមរាបថ្មី ទី២ឈ្មោះស្រីមុំ។លោកឲ្យដឹងថាហាងដែលល្បីល្បាញខាងលក់សាច់សត្វព្រៃឈ្មោះស្រីមុំ មានទីតាំងនៅផ្លូវ៦០ម៉ែត្រខាងជើងសាលាខេត្តសៀមរាបចម្ងាយ២០០ម៉ែត្រ។លោកឲ្យដឹងថា ចំណាត់ការនេះបានធ្វើទៅលើហាងផឹកស៊ីចំនួនពីរនិងទីតាំងលក់សត្វព្រៃ មួយកន្លែង។ ក្នុងនោះហាងម្លប់ស្បូវសៀមរាបថ្មីរកឃើញពោះវែករនាម១ក្បាលពោះ ថ្លាន់១ក្បាលសាច់ទន្សង១,៨គីឡូក្រាម។
លោកបានបញ្ជាក់ថា ចំពោះហាងឈ្មោះស្រីមុំវិញ កម្លាំងជំនាញបានចូលឆែកឆេរ ប៉ុន្តែពុំបានរកឃើញសាច់ឬសត្វព្រៃអ្វីនោះទេ។ លោកបន្ថែមថា ចំណែកនៅខាងក្រោយទីតាំងក្បែរព្រះអង្គចេកព្រះអង្គចមវិញ កម្លាំងសមត្ថកិច្ចជំនាញ បានរឹបអូសកូនអណ្តើក១៣៨ក្បាល,សារិកាកែវក្របី១៤ក្បាល។ សត្វទាំងនោះបានយកទៅប្រលែងនៅក្នុងរមណីយដ្ឋានអង្គរ។
លោកបានបញ្ជាក់ទៀតថា ចំពោះអ្នកលក់សត្វក្បែរព្រះអង្គចេកចម គឺឲ្យធ្វើកិច្ចសន្យាបញ្ឈប់ការចាប់សត្វមកលក់ តទៅទៀត ។ចំណែកម្ចាស់ហាងម្លប់ស្បូវសៀមរាបថ្មី គឺធ្វើការផាកពិន័យនិងឲ្យធ្វើកិច្ចសន្យាបញ្ឈប់នាំចូលសត្វព្រៃយកមកលក់តទៅទៀត។
គួរបញ្ជាក់ផងដែរ ជុំវិញករណីខាងលើត្រូវបានពលរដ្ឋសាទរយ៉ាងខ្លាំង ខណៈដែលសមត្ថកិច្ចបានចុះបង្ក្រាបនៅតាមហាង ផឹកស៊ីក្នុងក្រុងសៀមរាបនិងនៅខាងក្រោយព្រះអង្គចេក ព្រះអង្គចម ដែលពួកគាត់លើកឡើងពីការសោកស្តាយចំពោះការ ហិនហោចសត្វព្រៃទាំងនោះ ហើយពលរដ្ឋទទូចសុំឲ្យសមត្ថកិច្ចមានចំណាត់ការនេះបន្តទៅទៀតជា រៀងរហូតពីព្រោះថា ក្រៅពីហាងទាំងពីរខាងលើនៅក្នុងក្រុងសៀមរាបមានហាងផឹកស៊ីជាច្រើន កន្លែងទៀតដែលសុទ្ធសឹងតែលក់សត្វព្រៃដើម្បីធ្វើមានបានយ៉ាង ត្រជាក់ត្រជុំដែលមានកម្លាំងសមត្ថកិច្ចមួយចំនួនបានទៅយកលុយពីម្ចាស់ហាងថែមទៀតផង ប្តូនឹងការមិនចុះបង្ក្រាប៕
ដោយវេហាស៍
