ភ្នំពេញ ៖ នារីម្នាក់បានរងរបួសបែកមុខបែកមាត់និងរលត់ដៃរលត់ជើងដោយសារតែត្រូវជនសង្ស័យ២នាក់ធ្វើសកម្មភាពឆក់កាបូបពីរូបនាងដែលកំពុងជិះម៉ូតូធ្វើដំណើរតាមផ្លូវបណ្ដាលអោយដួលម៉ូតូអូសនិងថ្នល់ប្រហែលជា១០ម៉ែត្រហើយជនសង្ស័យនោះធ្វើសកម្មភាពបានសំរេចក៏គេចខ្លួនបានសម្រេចកាលពីវេលាម៉ោង៨និង៤០នាទីយប់ថ្ងៃទី៦ខែឧសភាឆ្នាំ២០១៤ ត្រង់ចំនុចមុខសកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច (សាលាច្បាប់) តាមបណ្ដោយផ្លូវព្រះមុនីវង្ស ស្ថិតក្នុងសង្កាត់បឹងត្របែក ខណ្ឌចំការមន។
ប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុគេឃើញនារីម្នាក់ជិះម៉ូតូមួយគ្រឿងម៉ាកហុងដា គុប ពណ៌ទឹកប្រាក់ ពាក់ស្លាកលេខ ភ្នំពេញ 1BT-2496 ដែលជិះធ្វើដំណើរតាមបណ្ដោយផ្លូវព្រះមុនីវង្ស ទិសដៅពីជើងទៅត្បូង ខណៈមកដល់មុខសកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច ដោយរូបនាងកំពុងតែជិះម៉ូតូយឺតៗ
នោះ ហើយនិងស្ពាយកាបូបជំហៀងខាងឆ្វេង ស្រាប់តែពេលនោះក៏លេចមុខជនសង្ស័យ២នាក់ជិះម៉ូតូមួយគ្រឿងម៉ាកហុងដាឌ្រីម ធុនសេ១២៥ ពណ៌ខ្មៅ មិនចាំស្លាកលេខ បានជិះពីក្រោយហើយវ៉ាម៉ូតូនារីរងគ្រោះ រួចធ្វើសកម្មភាពឆក់កាបូបពីនារីរងគ្រោះមួយទំហឹង ធ្វើអោយនារីរងគ្រោះដួលម៉ូតូអូសជាង១០ម៉ែត្របណ្ដាលអោយរងរបួសបែកមុខបែកមាត់និងរលត់ដៃរលត់ជើង រួចជននសង្ស័យទាំង២នាក់បានជិះម៉ូតូគេចខ្លួនបាត់ស្រមោលក្រោយពីធ្វើសកម្មភាពបានសម្រេច។
បន្ទាប់ពីកើតហេតុនារីរងគ្រោះខាងលើក៏បានស្រែកឆោឡោអោយគេអ្នកជិតខាងជួយនិងសមត្ថកិច្ចមូលដ្ឋានចុះអន្តរាគមន៍ភ្លាមៗនិងនាំនារីរងគ្រោះទៅដាក់ពាក្យបណ្ដឹងនៅប៉ុស្ដិ៍នគរបាលរដ្ឋាបាលបឹងត្របែក ដើម្បីសួរពីភិនភាគជនសង្ស័យ ដែលធ្វើសកម្មភាពឆក់កាបូបខាងក្នុងហេតុការណ៍នោះ៕
